Anupambharat News Bureau
ପୁରୀ,୩ା୧୧(ଅନୁପମ ମିଡ଼ିଆ): ଆସନ୍ତା ଆଠ ତାରିଖରେ ଶ୍ରୀମନ୍ଦିରରେ ସ୍ୱତନ୍ତ୍ର ଭାବେ ଚନ୍ଦ୍ର ଗ୍ରହଣ ନୀତି ଅନୁଷ୍ଠିତ ହେବ । ଏହି ସମ୍ପର୍କରେ ଛତିଶା ନିଯୋଗ ବୈଠକରେ ନିଷ୍ପତ୍ତିି ନିଆଯାଇଛି । ଆସନ୍ତା ଆଠ ତାରିଖ ମଙ୍ଗଳବାର ସକାଳ ୫ଟା ୫୪ ମିନିଟ୍ ୫୩ ସେକେଣ୍ଡ ଠାରୁ ଅନ୍ନ ଭୋଜନ, ପାକ କର୍ମ ଓ ଦେବନୀତି ବାରଣ କରାଯାଇଛି । ଭୋର ୫ଟା ୫୦ ମିନିଟ୍ ପୂର୍ବରୁ ମହାପ୍ରସାଦ ଭୋଗ ମଣ୍ଡପରେ ଲାଗିବା ପାଇଁ ସ୍ଥିର ହୋଇଛି । ରାତି ସାଢ଼େ ଦିଟାରୁ ମହାପ୍ରଭୁଙ୍କ ସୁନାବେଶ ବା ରାଜାଧିବେଶ ଆରମ୍ଭ ହେବ । ରାତିରେ ଭକ୍ତଙ୍କ ଦର୍ଶନ ବନ୍ଦ ରଖାଯିବ । ଭୋଗ ମଣ୍ଡପ ନୀତି ଶେଷ ପରେ ସକାଳୁ ଭକ୍ତମାନେ ଶ୍ରୀମନ୍ଦିରକୁ ଯାଇ ସୁନାବେଶ ଦର୍ଶନ କରିପାରିବେ ବୋଲି ସ୍ଥିର ହୋଇଛି । ଅପରାହ୍ନ ୨ଟା ୩୮ ମିନିଟ୍ ୧୪ ସେକେଣ୍ଡରେ ଗ୍ରହଣ ସ୍ପର୍ଶ ପୂର୍ବରୁ ସୁନାବେଶ ମଇଲମ କରାଯିବ । ସନ୍ଧ୍ୟା ୬ଟା ୧୮ ମିନିଟ୍ ୪୭ ସେକେଣ୍ଡରେ ଗ୍ରହଣ ସର୍ବମୋକ୍ଷ ହେବ । ପରେ ମହାପ୍ରଭୁଙ୍କ ଗ୍ରହଣ ମହାସ୍ନାନ , ଗ୍ରହଣ ଭୋଗ ନୀତି ଓ ଅନ୍ୟାନ୍ୟ ନୀତିକାନ୍ତି ଆରମ୍ଭ ହେବ । ୭ ତାରିଖ ରାତି ୧୨ଟା ୧୦ ମିନିଟ୍ରେ ଦ୍ୱାର ଫିଟା ନୀତି, ୧୨ଟା ୨୫ରେ ଭିତର ଶୋଧ, ମଙ୍ଗଳ ଆଳତୀ, ରୋଷ ହୋମ, ମଇଲମ ଓ ତଡ଼ପଲାଗି ନୀତି ସମାପନ ହେବ । ରାତି ୨ଟାରେ ସୂର୍ଯ୍ୟ ପୂଜା ହୋଇ ୫ଟା ୫୦ ମିନିଟ୍ ସୁଦ୍ଧା ଭୋଗ ମଣ୍ଡପ ଶେଷ ହେବ । ଭୋର ୫ଟା ୫୦ ମିନିଟ୍ ପୂର୍ବରୁ ଡଙ୍ଗା ଭସା ଓ ଅନ୍ୟାନ୍ୟ ନୀତିକାନ୍ତି ଅନୁଷ୍ଠିତ ହେବ ବୋଲି ଜଣାପଡ଼ିଛି ।
