Anupambharat News Bureau
ଅନୁଗୋଳ ,୧୪ା୫(ଅନୁପମ ମିଡିଆ): ସାତକୋଶିଆ ଅଭୟାରଣ୍ୟର ରାଇଗୁଡ଼ାର ଏନ୍କ୍ଲୋଜର ଭିତରେ ବନ୍ଦୀ ଥିବା ବାଘୁଣୀ ସୁନ୍ଦରୀ ପାଇଁ ଗୃହପାଳିତ ପଶୁ ଶିକାର କରାଯାଇଥିବା ଭଳି ସାଂଘାତିକ ଅଭିଯୋଗ ହୋଇଛି । ବନ୍ତଳା ଥାନାରେ ଅଭିଯୋଗ ହେବାକୁ ୨ ଦିନ ଅତିକ୍ରାନ୍ତ ହୋଇଛି । ହେଲେ ଏପର୍ଯ୍ୟନ୍ତ ମାମଲା ରୁଜୁ ହୋଇନାହିଁ । ଏହାକୁ ନେଇ ସାତକୋଶିଆ କ୍ଷତିଗ୍ରସ୍ତ ପ୍ରଜା ସୁରକ୍ଷା ସମିତି ଉଦ୍ବେଗ ପ୍ରକାଶ କରିଛି । ସୁରକ୍ଷା ସମିତି ର ସଭାପତି ଜନାର୍ଦ୍ଦନ ସାହୁଙ୍କ ନେତୃତ୍ୱରେ ଏହାର ସଭ୍ୟ ଓ ନରସିଂହପୁର ଅଞ୍ଚଳର ଲୋକେ ବନ୍ତଳା ଥାନାକୁ ଯାଇ ଶୀଘ୍ର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି । ପୁଲିସ କାର୍ଯ୍ୟାନୁଷ୍ଠାନ ଗ୍ରହଣ ନକଲେ ଆମେ ଚୁପ୍ ହୋଇ ରହିବୁ ନାହିଁ । ଆନ୍ଦୋଳନକୁ ଓହ୍ଲାଇବୁ ବୋଲି ଶ୍ରୀ ସାହୁ ଗଣମାଧ୍ୟମକୁ କହିଛନ୍ତି । ଉଲ୍ଲେଖଯୋଗ୍ୟ ଯେ, କଟକ ଜିଲା ନରସିଂହପୁର ଥାନା ଦେବଭୂଇଁ ପାଖ ଭୁସ୍କା ଗାଁର ଶେଷ ରାଉଳ (୫୫)ଙ୍କ ଅଭିଯୋଗ ହେଲା, ବହୁ ବର୍ଷ ହେଲା ମଇଁଷି ପାଳନ କରି ଆସୁଛନ୍ତି । ଏବେ ତାଙ୍କର ସେ ୩୫ରୁ ଅଧିକ ମଇଁଷି ରହିଛନ୍ତି । ଆରମ୍ଭରୁ ସେ ମଇଁଷିଙ୍କୁ ଚରିବା ପାଇଁ ଗାଁ ପାଖ ଜଙ୍ଗଲରେ ଛାଡ଼ି ଦେଇଥାନ୍ତି । ମଇଁଷି ସାତକୋଶିଆ ଜଙ୍ଗଲରୁ ଚରି ସନ୍ଧ୍ୟାରେ ଗାଁକୁ ଫେରିଆସନ୍ତି । ବେଳେବେଳେ ରାତିରେ ଜଙ୍ଗଲରେ ମଧ୍ୟ ରହି ଯାଇଥାନ୍ତି । ଗତ ୯ ତାରିଖ ଦିନ କି;ୁ ଗୋଟିଏ ମଇଁଷି ଓ ଗୋଟିଏ ପୋଢ଼ ଆଉ ଜଙ୍ଗଲରୁ ଫେରିନଥିଲେ । ୧୧ ତାରିଖ ଶେଷ ସାତକୋଶିଆ ଜଙ୍ଗଲକୁ ଖୋଜିବାକୁ ଯାଇଥିଲେ । ପ୍ରତ୍ୟକ୍ଷଦର୍ଶୀଙ୍କଠାରୁ ସେ ଜାଣିବାକୁ ପାଇଥିଲେ ଯେ, ବନ ବିଭାଗର କର୍ମଚାରୀମାନେ ସେମାନଙ୍କୁ ନେଇଯାଇଛନ୍ତି । ମଇଁଷିକୁ ମାରି କିଛି ଅଂଶ ଖାଇବାକୁ ଦେଇଥିବା ବେଳେ ପୋଢ଼କୁ ଏନ୍କ୍ଲୋଜର ପାଖ ଘରରେ ରଖାଯାଇଥିବା ସଂକ୍ରାନ୍ତରେ ଅନୁଗୋଳ ଜିଲା ବନ୍ତଳା ଥାନାରେ ଶେଷ ଅଭିଯୋଗ କରିଛନ୍ତି । ଏତଲାରେ ସେ ରାଇଗୁଡ଼ା ରେଞ୍ଜ ଅଫିସର, ବନ ବିଭାଗର ଡ଼ାକ୍ତର ଓ ବନ କର୍ମଚାରୀମାନଙ୍କ ବିରୋଧରେ ଅଭିଯୋଗ କରିଛନ୍ତି । ଘଟଣା ସଂକ୍ରାନ୍ତରେ ଦୃଷ୍ଟି ଆକର୍ଷଣ କରିବାକୁ ବନ୍ତଳା ଥାନା ପୁଲିସ ମାମଲାକୁ ଏଡ଼େଇବାକୁ ପ୍ରୟାସ କରୁଛି । ଘଟଣା ଘଟିଥିବା ଅଞ୍ଚଳ ବନ୍ତଳା ଥାନା ପରିସରରେ ଆସୁ ନଥିବା କହିଛି । କେବଳ ସେତିକି ନୁହେଁ, ଥାନାରେ ଅଭିଯୋଗ ନକରି ଘଟଣା ସଂକ୍ରାନ୍ତରେ ବନ ବିଭାଗର ଦୃଷ୍ଟି ଆକର୍ଷଣ କରାଯାଇଲେ ଉଚିତ ହୋଇଥାନ୍ତା ବୋଲି କୁହାଯାଇଛି ।
ଉଲ୍ଲେଖଯୋଗ୍ୟ ଯେ, ୨୦୧୮ ଜୁନ୍ ଶେଷ ସପ୍ତାହରେ ସାତକୋଶିଆକୁ ଆସିଥିବା ସୁନ୍ଦରୀ ଦୀର୍ଘ ୫୦ ଦିନ ପର୍ଯ୍ୟନ୍ତ ଏନ୍କ୍ଲୋଜରରେ ରହିବା ପରେ ୧୭ ଅଗଷ୍ଟ ଦିନରେ ଜଙ୍ଗଲରେ ଛଡ଼ାଯାଇଥିଲା । ମାତ୍ର ଏହା ପରେ ଜଙ୍ଗଲ ମଧ୍ୟରେ ରହିବା ପରିବର୍ତ୍ତେ ଜନବସତି ମୁହାଁ ହେବା ସହିତ ଗାଈଗୋରୁ ଆଉ ମଣିଷ ଶିକାର କରିଥିଲା । ତାକୁ ଟ୍ରାଙ୍କୁଲାଇଜ୍ କରାଯିବା ପରେ ଗତ ୬ ନଭେମ୍ବରରୁ ସୁନ୍ଦରୀକୁ ରାଇଗୁଡ଼ା ଏନ୍କ୍ଲୋଜରରେ ରଖାଯାଇଛି । ବନ ବିଭାଗର ଅଧିକାରୀ ଓ କର୍ମଚାରୀମାନଙ୍କୁ ସୁରକ୍ଷା ଦେବା ପାଇଁ ପୁଲିସ ନିରବତା ଅବଲମ୍ବନ କରୁଥିବା ସୁରକ୍ଷା ସମିତି ଅଭିଯୋଗ ଆଣିଛି ।
