Anupambharat News Bureau
ଭଦ୍ରକ, ୨୯ା୧୨ (ଅନୁପମ ମିଡିଆ): ଭଦ୍ରକ ଜିଲା ତିହିଡି ବ୍ଲକ୍ ବାରୋ ପଂଚାୟତର କାର୍ଯ୍ୟରତ କାର୍ଯ୍ୟନିର୍ବାହୀ ଅଧିକାରୀ (ପିଇଓ) ନିରଂଜନ ନାୟକଙ୍କୁ ଜିଲାପାଳ ନିଲମ୍ବନ କରିଥିବା ସୂଚନା ମିଳିଛି । ଏନେଇ ଜିଲାପାଳ ଜ୍ଞାନ ଦାସ ତାଙ୍କ ସୋସିଆଲ ମିଡିଆରେ ଶନିବାର ରାତି ପ୍ରାୟ ୮ ଘଟିକାରେ ଅପ୍ଲୋଡ କରି ଜନସାଧାରଣଙ୍କୁ ଅବଗତ କରିଥିବା ଜଣାପଡିଛି । ପ୍ରକାଶ ଥାଉକି ବାରୋ ପଂଚାୟତରେ ବିଭିନ୍ନ ଅନିୟମିତତା ନେଇ ଉଭୟ ପିଇଓ ଏବଂ ଜିଆରଏସ୍ଙ୍କ ବିରୁଦ୍ଧରେ ଅଭିଯୋଗ ହୋଇଥିଲା । ଏପରିକି ଉକ୍ତ ଅନିୟମିତତାରେ ସଂପୃକ୍ତ ପଂଚାତୟର ଜିଆରଏସ୍ ଓ ବ୍ଲକ୍ ପ୍ରଶାସନର କେତେକ ପଦାଧିକାରୀ ସାମିଲ ଥିବା ନେଇ ମଧ୍ୟ ଗୁଂଜରଣ ଉଠିଛି । ପ୍ରଧାନମନ୍ତ୍ରୀ ଆବାସ ଯୋଜନାରେ ଶ୍ରୀ ନାୟକ ବ୍ୟାପକ ଅନିୟମିତତା କରିଥିବା ନେଇ ଅଭିଯୋଗ ହୋଇଥିଲା । ୨୦୧୬-୧୭, ୨୦୧୭-୧୮ ଆର୍ଥିକ ବର୍ଷରେ ଏହି ପଂଚାୟତର ପ୍ରଧାନମନ୍ତ୍ରୀ ଆବାସ ଯୋଜନାରେ ପ୍ରକୃତ ହିତାଧିକାରୀଙ୍କୁ ବାଦ୍ ଦେଇ ଅଯୋଗ୍ୟଙ୍କୁ ଏକାଧିକ ଗୃହ ପ୍ରଦାନ କରିବା ତଥା ଅର୍ଥ ଲୋଭରେ ସେ ଏଭଳି ବ୍ୟାପକ ଅନିୟମିତତା କରିଥିବା ସମିତି ସଭ୍ୟ ଉଦ୍ଧବ ନାୟକ, ବିଜୟ ଜେନା, ବିଷ୍ଣୁ ନାୟକ ଓ ଯୋଜନାରୁ ବାଦ୍ ପଡିଥିବା ହିତାଧିକାରୀ ଅଭିଯୋଗ କରିଥିଲେ । କେବଳ ସେତିକି ନୁହେଁ ବିଗତ ୨ ବର୍ଷ ହେଲା ସେମାନେ ଜିଲାପାଳଙ୍କ ଦ୍ୱାରସ୍ଥ ହୋଇ ଉକ୍ତ ଅନିୟମିତତାର ତଦନ୍ତ ଦାବି କରିଥିଲେ । କିଛିଦିନ ତଳେ ତଦନ୍ତ କରାଯାଇ ଅନିୟମିତତାର ସୁରାକ ପାଇଥିଲା ଜିଲା ପ୍ରଶାସନ । ପରେ ସଂପୃକ୍ତ ପିଇଓଙ୍କୁ କୈଫତ ତଲବ କରାଯାଇଥିଲା । ମାତ୍ର ଉପଯୁକ୍ତ ଉତ୍ତର ମିଳିନଥିବାରୁ ତାଙ୍କୁ ନିଲମ୍ବନ କରାଯାଇଥିବା ଜଣାଯାଇଛି ।
