Anupambharat News Bureau
ଶ୍ରୀନଗର, ୧୨ା୬: ଦକ୍ଷିଣ କାଶ୍ମୀରର ଅନନ୍ତନାଗ ଜିଲ୍ଲାର ଅନ୍ୟତମ ଜନଗହଳି ପୂର୍ଣ୍ଣ କେପି ରୋଡ଼ରେ ବୁଧବାର ଅପରାହ୍ନରେ ସଂଗଠିତ ଆତଙ୍କବାଦୀ ଆକ୍ରମଣରେ ପାଞ୍ଚ ସିଆପିଏଫ ଯବାନ ସହିଦ୍ ହୋଇଛନ୍ତି । ଏହି ଘଟଣାରେ ଅନ୍ୟ ତିନି ଜଣ ଯବାନ ଆହତ ହୋଇଥିବା ଜଣାପଡ଼ିଛି ।
ଆଲ୍ଉମାର ମୁଜାହିଦ୍ଦିନ୍ ଆତଙ୍କବାଦୀ ସଂଗଠନ ଏଥି ପାଇଁ ନିଜକୁ ଦାୟୀ କରିଥିଲେ ସୁଦ୍ଧା ଏହା ଜୈସେ ଇ ମହମ୍ମଦର କାର୍ଯ୍ୟ ବୋଲି ଆନୁଷ୍ଠାନିକ ଭାବେ କୁହାଯାଇଛି । ଅନନ୍ତନାଗର କେପି ରୋଡ଼ରେ ସିଆରପିଏଫ ଯବାନମାନେ ପାଟ୍ରୋଲିଂ ଡୁ୍ୟଟିରେ ଥିବା ବେଳେ ବାଇକ୍ରେ ଆସିଥିବା ଦୁଇ ଆତଙ୍କବାଦୀ ସେମାନଙ୍କ ଉପରକୁ ଗୁଳି ମାଡ଼ କରିଥିଲେ । ଫଳରେ ଘଟଣା ସ୍ଥଳରେ ପାଞ୍ଚ ଯବନଙ୍କ ମୃତୁ୍ୟ ଘଟିଥିବା ବେଳେ ବହୁ ଆହତ ହୋଇଥିଲେ । ସିଆପିଏଫର ୧୧୬ ବାଟଲିୟାନ ଏବଂ ରାଜ୍ୟ ପୋଲିସ ମିଳିତ ଭାବେ ସେଠାରେ ପିକେଟିଂ କାର୍ଯ୍ୟରେ ନିୟୋଜିତ ଥିବା ବେଳେ ଏଭଳି ଆକ୍ରମଣ ଘଟିଥିଲା । ତେବେ ସିଆରପିଏଫ ଯବାନମାନେ ଆତଙ୍କବାଦୀଙ୍କ ଉଚିତ ମୁକାବିଲା କରିଥିଲେ ସୁଦ୍ଧା ପାଞ୍ଚ ଜଣ ସହିଦ୍ ହୋଇଥିଲେ । ଏଥିରେ ଆହତଙ୍କୁ ୯୨ ବେସ୍ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା । ଘଟଣାସ୍ଥଳକୁ ଅତିରକ୍ତି ବାହିନୀ ପହଞ୍ଚିଥିଲେ ସୁଦ୍ଧା ଆତଙ୍କବାଦୀମାନେ ସେମାନଙ୍କ ଉପରକୁ ଆଖିବୁଜା ଗୁଳି ମାଡ଼ ସହ ଗ୍ରେନେଡ଼ ମାଡ଼ କରିଥିଲେ । ତେବେ ଉଭୟଙ୍କ ମଧ୍ୟରେ ହୋଇଥିବା ଗୁଳିବିନିମୟରେ ଜଣେ ଆତଙ୍କବାଦୀ ନିହତ ହୋଇଥିବା ବେଳେ ଅନ୍ୟଜଣେ ସେଠାରୁ ଫେରାର ହେବାରେ ସକ୍ଷମ ହୋଇଥିଲେ । ଉଲ୍ଲେଖ୍ ଥାଉକି ଜାମ୍ମୁ-କାଶ୍ମୀରର ପୁଲୱାମା ଠାରେ ଆତ୍ମଘାତୀ ବିସ୍ପୋରଣ ଘଟାଇ ୪୦ଜଣ ସିଆର୍ପିଏଫ୍ ଯବାନଙ୍କୁ ହତ୍ୟା କରିବାର କିଛି ମାସ ପରେ ପୁଣି ଆଜି ମୁତୟନରତ ଯବାନଙ୍କ ଉପରକୁ ଆକ୍ରମଣ କରିଛନ୍ତି । ଘଟଣାର ତଦନ୍ତ ଆରମ୍ଭ ହୋଇଛି । ନିକଟରେ ଆତଙ୍କବାଦର ମୂଳପୋଛ କରିବା ପାଇଁ କେନ୍ଦ୍ର ସରକାରଙ୍କ ପକ୍ଷରୁ ସେନାବାହିନୀର ଏକ ବୃହତ୍ତ ଯୋଜନା ପ୍ରସ୍ତìତ କରାଯାଉଛି । ଏହା ବ୍ୟତୀତ ଆନ୍ତର୍ଜାତୀୟ ସ୍ତରରେ ମଧ୍ୟ କେନ୍ଦ୍ର ପକ୍ଷରୁ ଏଦିଗରେ ଉଦ୍ୟମ ଜାରି ରହିଛି ।
