Anupambharat News Bureau
ଗଞ୍ଜାମ/ରମ୍ଭା,୩୦ା୬(ଅନୁପମ ମିଡ଼ିଆ): ରମ୍ଭା ଶ୍ରୀଜଗନାଥ ମହାବିଦ୍ୟାଳୟର ଡେମନେଷ୍ଟ୍ରେଟର ଅଶ୍ମୀନି କୁମାର ମିଶ୍ର(୫୭)ଙ୍କ ଶବ ରବିବାର ପୂର୍ବାହ୍ନରେ ବିରୁଳି ଗଡ଼ ମୁଖ୍ୟ ରାସ୍ତା ପଣସ ଢିଅ ନିକଟରୁ ପୋଲିସ ଉଦ୍ଧାର କରିଛି । ପାରିପାଶ୍ୱିକ ସ୍ଥିତିରୁ ଏହା ଏକ ସୁଚିନ୍ତିତ ହତ୍ୟାକାଣ୍ଡ ବୋଲି ପୋଲିସ ଅନୁମାନ କରି ସନ୍ଦେହରେ ଜଣେ ଯୁବକଙ୍କୁ ଅଟକ ରଖି ତଦନ୍ତ ଜାରି ରଖିଛି ।
ମିଳିଥିବା ସୂଚନାନୁଯାୟୀ ଖଲ୍ଳିକୋଟ ବ୍ଳକର କୁଶଢ଼ିପାର କାହ୍ନୁଚରଣ ମିଶ୍ରଙ୍କ ପୁଅ ଅଶ୍ମିନୀ(୫୧) ରମ୍ଭା ଶ୍ରୀଜଗନାଥ ମହାବିଦ୍ୟାଳୟର ଡେମନେଷ୍ଟ୍ରେଟର ରୂପେ କାର୍ଯ୍ୟ କରି ଆସୁଥିଲେ । ବିବାହିତ ଅଶ୍ମିନୀ ନିଜ ପରିବାରଠାରୁ ଅଲଗା ରମ୍ଭାରେ ଏକାକୀ ରହୁଥିଲେ । ଗତକାଲି ରାତିରେ ସେ ନିଜ ଗ୍ରାମକୁ ଯାଇ ପୁଣି ରମ୍ଭାକୁ ଫେରିଥିଲେ । ଏପରିକି ରାତିରେ ‘ଗ୍ରୀନେୱ’ ଢ଼ାବାରେ ଖାଇଥିଲେ ।
ତେବେ ସକାଳୁ ପଣସ ଢିଅ ନିକଟରୁ ଅଶ୍ମିନୀଙ୍କ ମୃତ ଦେହ ପଡ଼ି ରହିଥିବା ବେଳେ ବୁଲେଟ ତାଙ୍କ ଗୋଡ଼ ଉପରେ ପଡିଥିବା ଦେଖିବାକୁ ମିଳିଥିଲା । ହତ୍ୟାକାରୀମାନେ ସମ୍ଭବତଃ ଏହାକୁ ଦୁର୍ଘଟଣାର ରୂପ ଦେବାକୁ ଉଦ୍ୟମ କରିଥିଲେ । ଖବର ପାଇ ଏସ୍ଡ଼ିପି ଓ ଉତ୍କଳ କେଶରୀ ଦାସ, ଛତ୍ରପୁର ଥାନା ଅଧିକାରୀ ପ୍ରିୟସ ରଞ୍ଜନ ଛୋଟରାୟ ଓ ରମ୍ଭା ପୋଲିସ ଘଟଣା ସ୍ଥଳରେ ଫରେନସିକ ଟିମ୍ ଓ ସନ୍ଧାନୀ କୁକୁର ସହ ପହଞ୍ଚି ଛାନଭିନ୍ କରି ଫେରିଛନ୍ତି । ଘଟଣା ସ୍ଥଳରୁ ଅଶ୍ମିନୀଙ୍କ ବୁଲେଟ, ଚାବି ଓ ପର୍ସ ଆଦି ପୋଲିସ ଜବତ କରିଛି । ଅନ୍ୟପଟେ ମୃତକଙ୍କ ଭାଇ ରେବନ କୁମାର ମିଶ୍ରଙ୍କ ଅଭିଯୋଗକୁ ଭିତ୍ତି କରି ପୋଲିସ ହତ୍ୟା ମାମଲା ରୁଜୁ ସହ ମଧୁର ଚୁଆଁର ଜଣେ ଯୁବକକୁ ଅଟକ ରଖି ତଦନ୍ତ ଜାରି ରଖିଛି । ଘଟଣାକୁ ନେଇ ପୋଲିସକୁ ତଦନ୍ତରୁ ମିଳିଥିବା ସୂଚନାନୁଯାୟୀ ଜଣେ ମହିଳାଙ୍କ ସହ ଅନୈତିକ ସମ୍ପର୍କରୁ ଅଶ୍ମିନୀ ହତ୍ୟାର ଶିକାର ହୋଇଛନ୍ତି । ଏପରିକି ପୋଲିସ ଯାହାକୁ ଅଟକ ରଖିଛି ପୂର୍ବରୁ ସେ ଅଶ୍ମିନୀଙ୍କୁ ଆକ୍ରମଣ କରିଥିବା ନେଇ ଥାନାରେ ଅଭିଯୋଗ ହୋଇଥିଲା । ଅଟକ ଯୁବକଙ୍କ ସହ ଅଶ୍ମିନୀଙ୍କ ଭଲ ସମ୍ପର୍କ ରହିଥିଲା । ଏପରିକି ଉଭୟ କଲେଜ ରୋଡ଼ରେ ପଡୋଶୀ ଭାବେ କିଛି ବର୍ଷ ରହିଥିଲେ । ତେବେ ଯୁବକ ଜଣକ ଯେଉଁ ମହିଳାଙ୍କ ସହ ରହୁଥିଲେ କାଳକ୍ରମେ ଅଶ୍ମିନୀଙ୍କ ମଧ୍ୟ ସମ୍ପର୍କ ଗଢ଼ିଉଠିଥିଲା । ଏହା ଜାଣିବା ପରେ ଯୁବକ ଜଣକ ଅଶ୍ମିନୀଙ୍କୁ ମାରପିଟ କରିଥିଲା । ଫଳରେ ଅଶ୍ମିନୀ ଗତ କିଛି ମାସ ହେବ ପାନ୍ଥନିବାସ ରୋଡ଼ରେ ଥିବା ଅନ୍ୟ ଏକ ଘରକୁ ଚାଲି ଆସିଥିଲେ । ଏହି ଘଟଣାକୁ ନେଇ ଅଶ୍ମିନୀଙ୍କୁ ହତ୍ୟା କରାଯାଇଛି ନା ଏହା ପଛରେ ଅନ୍ୟ କିଛି କାରଣ ରହିଛି ତଦନ୍ତ ପରେ ଉନ୍ମୋଚିତ ହେବ ବୋଲି ପୋଲିସ ପ୍ରକାଶ କରିଛି ।
