Anupambharat News Bureau
ଚୁରୁ: ରାଜସ୍ଥାନର ଚୁରୁଠାରେ ଏକ ଭୟଙ୍କର ଘଟଣା ଘଟିଛି । ଜଣେ ଦଳିତ ମହିଳାଙ୍କୁ ପୁଲିସ୍ ଥାନାରେ ଅଟକ ରଖି ଗଣଦୁଷ୍କର୍ମ କରିଛନ୍ତି । ଖାଲି ସେତିକି ନୁହେଁ, ପୁଲିସ୍ ପକ୍ଷରୁ ମହିଳାଙ୍କୁ ଅକଥନୀୟ ନିର୍ଯାତନ ମଧ୍ୟ ଦିଆଯାଇଥିବା ଅଭିଯୋଗ ହୋଇଛି । ଅଭିଯୋଗ ଅନୁଯାୟୀ, ପ୍ରଥମେ ପୁଲିସ୍ ମହିଳାଙ୍କ ୨୨ ବର୍ଷୀୟ ଦିଅରଙ୍କୁ ପକେଟ ମାର ଅଭିଯୋଗରେ ଜୁନ୍ ୩୦ରେ ଅଟକ ରଖିଥିଲା । ଏହାପରେ ତାଙ୍କୁ ପ୍ରବଳ ମାଡ଼ ମାରିଥିଲା । ଜୁଲାଇ ୩ରେ ପୁଲିସ୍ ଉକ୍ତ ୨୨ ବର୍ଷୀୟ ଯୁବକଙ୍କୁ ଧରି ତାଙ୍କ ଘରେ ପହଞ୍ଚିଥିଲା । ସେଠାରୁ ଯୁବକଙ୍କ ଭାଉଜଙ୍କୁ ମଧ୍ୟ ପୁଲିସ୍ ଉଠାଇ ନେଇଥିଲା । ସେବେଠାରୁ ପୁଲିସ୍ ଦିଅର ଓ ଭାଉଜଙ୍କୁ ନିର୍ଯାତନା ଦେବା ଆରମ୍ଭ କରିଥିଲା । ନିର୍ଯାତନ ସହି ନପାରି ଜୁଲାଇ ୬-୭ ତାରିଖରେ ଯୁବକ ଜଣଙ୍କ ଥାନାରେ ପ୍ରାଣ ହରାଇଥିଲେ । ଏହାକୁ ନିଜ ଆଖିରେ ଦେଖିଥିବା ତାଙ୍କ ଭାଉଜଙ୍କୁ ମଧ୍ୟ ପୁଲିସ୍ ଛାଡ଼ି ନଥିଲା । ପୁଲିସ୍ ଉକ୍ତ ମହିଳାଙ୍କୁ ଗଣଦୁଷ୍କର୍ମ କରିବା ସହ ତାଙ୍କ ନଖ ତାଡ଼ି ଦେଇଥିଲେ । ଏତିସହ ତାଙ୍କ ଆଖି ଏବଂ ଆଙ୍ଗୁଠିରେ ମଧ୍ୟ ଆଘାତ ଦେଇଥିଲେ । ଜୁଲାଇ ୧୦ ତାରିଖ ଯାଏ, ତାଙ୍କ ସହ ଏଭଳି ଅମାନବୀୟ କାଣ୍ଡ ପୁଲିସ୍ ଥାନା ମଧ୍ୟରେ କରିଥିବା ଅଭିଯୋଗ ହୋଇଛି । ଏହି ଘଟଣା ପରେ ଚୁରୁ ଏସ୍ପି ରାଜେନ୍ଦ୍ର କୁମାର ଶର୍ମାଙ୍କୁ ନିଜ ପଦରୁ ହଟାଇ ଦିଆଯାଇଛି । ସେହିପରି ଉକ୍ତ ପୁଲିସ୍ ଷ୍ଟେସନର ଅଫିସର, ଜଣେ ହେଡ୍ କନଷ୍ଟେବଲ ଓ ୬ ଜଣ କନଷ୍ଟେବଲଙ୍କୁ ମଧ୍ୟ ନିଲମ୍ବିତ କରାଯାଇଛି ।
