Anupambharat News Bureau
ଅନୁଗୋଳ ,୧୦ା୫(ଅନୁପମ ମିଡିଆ): ଅନୁଗୋଳ ଜିଲା ପୁରୁଣାକୋଟ ଥାନା ଅନ୍ତର୍ଗତ ସାତକୋଶିଆ ଅଭୟାରଣ୍ୟର ଜଗନ୍ନାଥପୁର ଗ୍ରାମ ନିକଟ ଜଙ୍ଗଲରୁ ଏକ ଦନ୍ତାହାତୀର ଗଳିତ ଶବ ଉଦ୍ଧାର କରାଯାଇଛି । କିଛି ଜଙ୍ଗଲ ଜଗୁଆଳି ଆଜି ହାତୀର ଗଳିବ ଶବ ପଡ଼ିଥିବା ଦେଖିବାକୁ ପାଇଥିଲେ । ଏ ସଂପର୍କରେ ଉଚ୍ଚ ଅଧିକାରୀଙ୍କୁ ଜଣାଇବା ପରେ ଘଟଣାସ୍ଥଳେ ବନ ଅଧିକାରୀମାନେ ପହଞ୍ଚି ଶବର ପଞ୍ଚନାମା କରିବା ସହିତ ବ୍ୟବଚ୍ଛେଦ କରାଇଛନ୍ତି । ମୃତ ହାତୀର ଦାନ୍ତ ଗୁଡ଼ିକ ସୁରକ୍ଷିତ ଥିବାବେଳେ କେଉଁ ପରିସ୍ଥିତିରେ ଦନ୍ତାର ମୃତ୍ୟୁ ହୋଇଛି ତାହା ବ୍ୟବଚ୍ଛେଦ ପରେ ଜଣାପଡ଼ିବ । ତେବେ ଆଜକୁ ପ୍ରାୟ ୫/୬ ଦିନ ତଳୁ ହାତୀଟିର ମୃତ୍ୟୁ ହୋଇଥିବା ଅନୁମାନ କରାଯାଉଛି । ଗତ କିଛିଦିନ ହେଲାଣି ପ୍ରବଳ ଗ୍ରୀଷ୍ମ ପ୍ରବାହ ଯୋଗୁଁ ଅଂଶୁଘାତରେ ଶିକାର ହୋଇ ହାତୀଟି ମୃତ୍ୟୁ ବରଣ କରିଥାଇପାରେ ବୋଲି ଆଶଙ୍କା କରାଯାଉଛି । ବନ ବିଭାଗ ପଶୁ ବିଶେଷଜ୍ଞଙ୍କ ସହାୟତାରେ ବ୍ୟବଚ୍ଛେଦ କରିବା ପରେ ଶବଟିକୁ ମାଟିରେ ପୋତି ଦିଆଯାଇଛି । ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ହାତୀ ମୃତ୍ୟୁର ପ୍ରକୃତ କାରଣ ଜଣାପଡ଼ିବ ବୋଲି ବନ ବିଭାଗ ସୂତ୍ରରୁ ପ୍ରକାଶ ।
