Anupambharat News Bureau
ଛତ୍ରପୁର,୨୬ା୨(ଅନୁପମ ମିଡ଼ିଆ): ବନ୍ଦ ଘରୁ ମିଳିଛି ତିନି ଶବ । ପାରିବାରିକ କଳହ କେତେ ଭୟଙ୍କର ତାହା ଛତ୍ରପୁର ଥାନା ସ୍ଥିତ ପାଲିଆ ଛତ୍ରପୁରର ମଝି ସାହିରେ ଦେଖିବାକୁ ମିଳିଛି । ପତ୍ନୀ ଏବଂ ଝିଅକୁ ହତ୍ୟା ପରେ ନିଜେ ଗୃହକର୍ତ୍ତା ଆତ୍ମହତ୍ୟା କରିବା ଘଟଣା ଅଞ୍ଚଳରେ ଆଲୋଡ଼ନ ସୃଷ୍ଟି କରିଛି । ମୃତକମାନେ ହେଲେ ମଝି ସାହିର ବୃନ୍ଦାବନ ବେହେରା ତାଙ୍କ ସ୍ତ୍ରୀ ଉର୍ମିଳା ଓ ଝିଅ ସୁନିତା ।
ଉର୍ମିଳା ଓ ସୁନିତାଙ୍କ ମୃତ ଦେହ ରକ୍ତାକ୍ତ ଅବସ୍ଥାରେ ତଳେ ପଡ଼ିଥିବାବେଳେ ବୃନ୍ଦାବନଙ୍କୁ ଝୁଲନ୍ତା ଅବସ୍ଥାରେ ଉଦ୍ଧାର କରାଯାଇଛି । ଛତ୍ରପୁର ପୋଲିସ ଘଟଣା ସ୍ଥଳରେ ପହଞ୍ଚି ତିନି ଜଣଙ୍କ ଶବ ଉଦ୍ଧାର କରିବା ସହ ତଦନ୍ତ ଆରମ୍ଭ କରିଛି । ବୃନ୍ଦାବନ ସ୍ତ୍ରୀ ଓ ଝିଅଙ୍କୁ ଅତି ନିର୍ମମ ଭାବେ ହତ୍ୟା କରିବା ପରେ ଅନ୍ୟ ଏକ ରୁମରେ ନିଜ ବେକରେ ଗାମୁଛା ବାନ୍ଧି ଆତ୍ମହତ୍ୟା କରିଥିବା ପାରିପାଶ୍ୱର୍କ ସ୍ଥିତିରୁ ସ୍ପଷ୍ଟ ହୋଇଛି । ଛତ୍ରପୁର ଥାନା ପୋଲିସ ସାଇଣ୍ଟିିଫିକ ଟିମ ଓ ସନ୍ଧାନୀ କୁକୁର ସହାୟତାରେ ବିଭିନ୍ନ ପ୍ରକାର ତଦନ୍ତ ଚଳାଇଛି । ଘଟଣା ସ୍ଥଳରେ ଗଞ୍ଜାମ ଏସପି ବ୍ରିଜେଶ କୁମାର ରାଏ, ଅତିରିକ୍ତ ଏସପି ଠାକୁର ପ୍ରସାଦ ପାତ୍ର, ଛତ୍ରପୁର ଏସଡିପିଓ ଗୌତମ କିସାନ, ଛତ୍ରପୁର ଥାନାଧିକାରୀ ପ୍ରିୟସ ରଞ୍ଜନ ଛୋଟରାୟ ପହଞ୍ଚି ଅନୁଧ୍ୟାନ କରିଛନ୍ତି । ମିଳିଥିବା ସୂଚନା ମୁତାବକ ବୃନ୍ଦାବନଙ୍କ ଦୁଇଟି ଝିଅ, ଗୋଟିଏ ପୁଆ ବଡ଼ଝିଅ ସୁଜ୍ଞାନୀ ବେହେରା ଲାଠୀରେ ବିବାହ କରିଥିବାବେଳେ ସାନ ଝିଅ ସୁନିତା ଛତ୍ରପୁର ସରକାରୀ ବିଜ୍ଞାନ ମହାବିଦ୍ୟାଳୟରେ ଯୁକ୍ତ ୨ ବାଣିଜ୍ୟ ବିଭାଗର ଛାତ୍ରୀ । ମୃତ ବୃନ୍ଦାବନ ଗ୍ରାମରେ ଏକ କିରାଣି ଦୋକାନ କରି ଗୁଜରାଣ ମେଣ୍ଟାଉଥିଲେ । ଗତକାଲି ପୁଅ ସାଗର ବେହେରା କୁରୁଣ୍ଡି ଅଞ୍ଚଳର ଏକ ବିବାହ କାର୍ଯ୍ୟକ୍ରମରେ ଯୋଗଦାନ ନିମନ୍ତେ ଚାଲିଯାଇଥିବାବେଳେ ଘରେ ସ୍ତ୍ରୀ ଉର୍ମିଳା, ଝିଅ ସୁନିତା ଓ ନିଜେ ବୃନ୍ଦାବନ ରହିଥିଲେ । ତେବେ ପାରିପାଶ୍ୱର୍କ ସ୍ଥିତିରୁ ବୃନ୍ଦାବନ ଶୋଇଥିବା ଅବସ୍ଥାରେ ସ୍ତ୍ରୀ ଏବଂ ଝିଅକୁ ହତ୍ୟା କରିବା ପରେ ମାନସିକ ଭାରସାମ୍ୟ ହରାଇ ନିଜେ ଆତ୍ମହତ୍ୟା କରିଥିବା ଅନୁମାନ କରାଯାଉଛି ।
ଆଜି ସକାଳୁ ଭୋରୁ ଗ୍ରାମର ଏକ କୁନି ଝିଅ ପାଣି ଆସିଲା ବୋଲି ତାଙ୍କୁ ଡାକିବାକୁ ଗଲାବେଳେ ଘର ମଧ୍ୟରେ ମୃତ ଦେହ ଦେଖି ଗ୍ରାମବାସୀଙ୍କୁ କହିବା ପରେ ଘଟଣା ପଦାକୁ ଆସିଥିଲା । ଏହାପରେ ଗ୍ରାମବାସୀ ପୋଲିସକୁ ସୂଚିତ କରିଥିଲେ । ଗ୍ରାମବାସୀମାନେ କହିବା ଅନୁସାରେ ବୃନ୍ଦାବନ ଓ ତାଙ୍କ ସ୍ତ୍ରୀ ଭିତରେ ଛୋଟମୋଟ କଳି ଲାଗି ରହୁଥିଲା ।
ତେବେ ଗତ ରାତିରେ ଯାହା ଘଟିଲା କେହି କଳନା ସୁଦ୍ଧା କରିନଥିଲେ । ଅପରପକ୍ଷରେ ପୁଅ ସାଗର ଘଟଣାର ଖବର ପାଇ ଗାଁକୁ ଆସି ମର୍ମାହତ ହୋଇଯାଇଥିଲା । ବିବାହିତ ବଡ଼ଝିଅ ସୂଚନା ଦେଇଥିଲା ଯେ ସବୁବେଳେ ତାଙ୍କ ବାପା ମା କୁ ଅତ୍ୟାଚାର କରିଆସୁଥିଲେ । ଭଲଭାବେ ବି ଖାଇବାକୁ ମଧ୍ୟ ଦେଉନଥିଲେ । ବାପା ହୋଇ ମଧ୍ୟ ତାଙ୍କ କର୍ତ୍ତବ୍ୟ ପାଳନ କରୁନଥିଲେ ବୋଲି କହିଥିଲେ । ପୋଲିସ ତିନି ମୃତ ଦେହକୁ ଉଦ୍ଧାର କରି ଛତ୍ରପୁର ମେଡିକାଲକୁ ବ୍ୟବଚ୍ଛେଦ ନିମନ୍ତେ ପଠାଇଛନ୍ତି ।
