Anupambharat News Bureau
କେନ୍ଦୁଝର/ଆନନ୍ଦପୁର/ଆସିକା,୧୫ା୫ (ଅନୁପମ ମିଡିଆ): ରାଜ୍ୟର ବିଭିନ୍ନ ସ୍ଥାନରେ ଆଜି ବଜ୍ରପାତ ଘଟି ପାଞ୍ଚ ଜଣଙ୍କ ମୃତୁ୍ୟ ଘଟିଛି । ଏହି ଘଟଣାରେ ଅନୁନ୍ୟ ୯ ଜଣ ଆହତ ହୋଇଥିବା ଜଣାପଡ଼ିିଛି । ମୃତଙ୍କ ମଧ୍ୟରେ ଗଞ୍ଜାମ ଜିଲ୍ଲା ଏବଂ ବାଲେଶ୍ୱର ଜିଲ୍ଲାର ପ୍ରତ୍ୟେକ ଦୁଇ ଜଣ ଲେଖାଏଁଙ୍କ ମୃତୁ୍ୟ ଘଟିଥିବା ବେଳେ କେନ୍ଦୁଝର ଜିଲ୍ଲାରେ ଜଣଙ୍କ ମୃତୁ୍ୟ ଘଟିଛି ।
କେନ୍ଦୁଝର ଜିଲ୍ଲାର ଟାଙ୍ଗିରିଆପାଳ ଅଞ୍ଚଳରେ ବୁଧବାର ଅପରାହ୍ନରେ ପ୍ରବଳ ଝଡତୋଫାନ ସହିତ ବଜ୍ରପାତ ହେବା ଫଳରେ ନବବିବାହିତ କୋଠଘାଟି ସାହିର ଜିତେନ୍ଦ୍ର ମୁର୍ମୁଙ୍କର ମୃତୁ୍ୟ ହୋଇଥିବାବେଳେ ଅନ୍ୟ ୫ଜଣ ଗୁରୁତର ଆହତ ହୋଇଛନ୍ତି । ଗୁରୁତରଙ୍କୁ ଚିକିସିା ପାଇଁ ଆନନ୍ଦପୁର ଡାକ୍ତରଖାନାରେ ଭର୍ତ୍ତି କରାଯାଇଛି । ମୃତ ଜିତେନ୍ଦ୍ର ଗତ ୧୩ ତାରିଖରେ ବିବାହ କରିଥିଲେ । ଆଜି ଜିତେନ୍ଦ୍ରଙ୍କ କୋଠଘାଟି ସାହି ସ୍ଥିତ ନିଜ ଘରେ ଭୋଜିଭାତର ଆୟୋଜନ ଚାଲିଥିଲା । ବନ୍ଧୁବାନ୍ଧବ ଓ ଆତ୍ମୀୟସ୍ୱଜନଙ୍କ ମେଳରେ ନାଚଗୀତ ଚାଲିଥିବାବେଳେ ହଠାତ ବଜ୍ରପାତ ହୋଇଥିଲା । ଫଳରେ ଘଟଣାସ୍ଥଳରେ ଜିତେନ୍ଦ୍ରଙ୍କର ମୃତୁ୍ୟ ହୋଇଥିବାବେଳେ ତାଙ୍କ ମାଇଁ ସୁଲୋଚନା, ମାମୁଁ ଫଗୁ ରାମ, ସାନ ଭାଇ ମୁନା ଓ ଅନ୍ୟଜଣେ ସମ୍ପର୍କୀୟ ଗୁରୁତର ହୋଇ ଅଚେତ ହୋଇ ପଡ଼ିଥିଲେ । ଗୁରୁତରମାନଙ୍କୁ ଚିକିସିା ପାଇଁ ୧୦୮ ଆମ୍ବୁଲାନ୍ସ ଯୋଗେ ଆନନ୍ଦପୁର ଡାକ୍ତରଖାନାରେ ଭର୍ତ୍ତି କରାଯାଇଥିବା ଜଣାପଡିଛି ।
ଏହି ଘଟଣା ସ୍ଥାନୀୟ ଅଞ୍ଚଳରେ ଶୋକାକୂଳ ପରିବେଶ ସୃଷ୍ଟି କରିଛି । ସେହିପରି ଘସିପୁରା ଥାନା ବାଟ ସାହିର ଜଣେ ଯୁବକ ସଞ୍ଜୟ ସୋରେନ ପୋଖରୀରୁ ଗାଧୋଇ ଫେରୁଥିବା ବେଳେ ବଜ୍ରପାତର ଶିକାର ହୋଇ ଗୁରୁତର ହୋଇଥିଲେ । ପରିବାର ଲୋକଙ୍କ ସହାୟତାରେ ତାଙ୍କୁ ଆନନ୍ଦପୁର ଡ଼ାକ୍ତର ଖାନାରେ ଭର୍ତ୍ତି କରିଥିବା ଜଣାଯାଇଛି । ତାଙ୍କର ଅବସ୍ଥା ସଙ୍କଟାପନ୍ନ ଥିବା ଜଣାଯାଇଛି । ସେହିଭଳି ଗଞ୍ଜାମ ଜିଲ୍ଲାର ସଦର ଥାନା ଅନ୍ତର୍ଗତ ରାଇଝଳ ଗାଁରେ ଅରାହ୍ନରେ ବଜ୍ରପାତ ଯୋଗୁ ବିଲରେ କାର୍ଯ୍ୟ କରୁଥିବା ନାରାୟଣ ଗୌଡ଼(୩୧)ଙ୍କ ମୃତୁ୍ୟ ଘଟିଛି ।
ଅନୁରୂପ ଭାବେ ବଜ୍ରପାତ ଯୋଗୁ ଆସିକା ଥାନା ଚେରମାରିଆ ଗ୍ରାମର ଅମୁଲି ଗୌଡ଼(୪୫)ଙ୍କ ମୃତୁ୍ୟ ହୋଇଛି । ଅମୁଲି ବିଲରେ କାମ କରି ଗାଇ ଜଗୁଥିବା ସ୍ୱାମୀ ଅରକ୍ଷିତ ଗୌଡ଼ଙ୍କ ପାଇଁ ଖାଦ୍ୟ ନେଇ ଯାଇଥିଲେ । ଅଚାନକ ବର୍ଷା ଘଡ଼ଘଡ଼ି ଆସି ଯାଇଥିବାରୁ ସେ ଗଛ ମୂଳେ ଆଶ୍ରୟ ନେଇଥିବା ବେଳେ ଘଡ଼ଘଡ଼ି ସହ ବଜ୍ରାଘାତରେ ଶିକାର ହୋଇଥିଲେ ଅମୁଲି । ଘଟଣାସ୍ଥଳରେ ହିଁ ତାଙ୍କ ପ୍ରାଣବାୟୁ ଉଡ଼ିଯାଇଥିଲା ଦିଗପହଣ୍ଡି ଥାନା ଛଣମେରି ଗ୍ରାମରେ ବଜ୍ରଘାତ ପ୍ରଭାବରେ ଜଣେ ମହିଳା ଗୁରୁତର ହୋଇଥିବା ଜଣାପଡିଛି ।
ମହିଳା ଜଣକ ହେଲେ ଜ୍ୟୋତ୍ସା ନାୟକ । ଜ୍ୟୋତ୍ସା ଗାଁ ପୋଖରୀକୁ ଗାଧୋଇ ଯାଇଥିବା ବେଳେ ରାସ୍ତାରେ ବଜ୍ରପାତ ହୋଇଥିଲା । ଚେତାଶୂନ୍ୟ ଅବସ୍ଥାରେ ସେ ତଳେ ପଡିଯାଇଥିଲେ । ପରିବାର ଲୋକେ ତାଙ୍କୁ ଦିଗପହଣ୍ଡି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ଚିକିତ୍ସା ପରେ ସେ ସୁସ୍ଥ ଥିବା ଜଣାପଡିଛି ।
ଅନ୍ୟପକ୍ଷେ ବାଲେଶ୍ୱର ଜିଲ୍ଲାର ସିଙ୍ଗଲା ଥାନାର ରାଣେଶ୍ୱରପୁର ଡିହଚସାର୍ଥ ଗାଁର ପାଞ୍ଚ ଜଣ ଆଜି ସନ୍ଧ୍ୟାରେ ଚିଙ୍ଗୁଡ଼ି ଘେରିକୁ ମେସିନ୍ ସଜାଡ଼ିବାକୁ ଯାଇଥିଲେ । ସେହି ସମୟରେ ବଜ୍ରାପତ ଘଟିବାରୁ ବାବୁରାମ ସିଂହ ଓ ବାସୁଦେବ ଜେନାଙ୍କ ଘଟଣାସ୍ଥଳରେ ମୃତୁ୍ୟ ଘଟିଥିବା ବେଳେ ଅନ୍ୟ ତିନି ଜଣ ଆହତ ହୋଇଛନ୍ତି । ଆହତଙ୍କୁ ବାଲେଶ୍ୱର ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ ।
