Anupambharat News Bureau
କୋଲାକାତା,୧୫ା୫: ଚଳିତ ବର୍ଷର ସାଧାରଣ ନିର୍ବାଚନରେ ନିର୍ବାଚନୀ ହିସାଂକୁ ନେଇ ପ୍ରଥମରୁ ଶେଷ ପର୍ଯ୍ୟାୟ ପର୍ଯ୍ୟନ୍ତ ଚର୍ଚ୍ଚାରେ ଥିବା ପଶ୍ଚିମ ବଙ୍ଗରେ ଆଜି ପର୍ଯ୍ୟନ୍ତ ଶାନ୍ତି ପରିସ୍ଥିତି ସୃଷ୍ଟି ହୋଇପାରି ନାହିଁ । ଲୋକସଭା ନିର୍ବାଚନର ୭ ଟି ପର୍ଯ୍ୟାୟର ଶେଷ ପର୍ଯ୍ୟାୟ ନିର୍ବାଚନ ୧୯ ତାରିଖରେ ପରିଚାଳିତ ହେବାକୁ ଯାଉଛି । ଆଉ ମାତ୍ର ଗୋଟିଏ ଦିନ ପ୍ରଚାର ଜାରି ରହିବ । ଶେଷ ମୁହୁର୍ତ୍ତରେ ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ବିଜେପି ପକ୍ଷରୁ ଏକ ର୍ୟାଲିର ଆୟୋଜନ କରାଯାଇଥିଲା ବେଳେ ଆଜି ହଠାତ କେତେକ ବିରୋଧୀ ଗୋଷ୍ଠୀର କର୍ମୀ ମାନେ ତାଙ୍କ ର୍ୟାଲି ହେବାକୁ ଥିବା ମଞ୍ଚକୁ ଭାଙ୍ଗିଦେଇଛନ୍ତି ।
ଏହି ବିଶାଳ ମହାସମାବେଶର ସମସ୍ତ ସାଜସଜ୍ଜା କରୁଥିବା ଡେକରେଟରକୁ ଆଜି କୋଲକାତାରେ କେତେକ ଦୁର୍ବୃତ୍ତ ନିଦ୍ଧୁମ ମାଡ ମାରି ଲହୁଲୁହାଣ କରିଦେଇଛନ୍ତି । ଏ ସମ୍ପର୍କରେ ବିଜେପି ପକ୍ଷରୁ ଯୋଗୀଙ୍କ ର୍ୟାଲିକୁ ଆଜି ଅପରାହ୍ନ ହିଁ ବାତିଲ ଘୋଷଣା କରାଯାଇଛି ।
କୋଲକାତା ନଗରୀର ଫୁଲବାଗାନ ଅଞ୍ଚଳର ବିଟି ରୋଡ ଠାରେ ଏକ ସାଧାରଣ ସଭାର ଆୟୋଜନ ହେବାର ଥିଲା । ଆଦିତ୍ୟନାଥ ପଶ୍ଚିମବଙ୍ଗର ଉତ୍ତର ୨୪ ପ୍ରର୍ଗଣା ଜିଲ୍ଲାର ହାବରା, ଉତ୍ତର କୋଲକାତାର ଫୁଲବାଗାନ ଗେଟ ଓ ଦକ୍ଷିଣ କୋଲକାତାର ବେହଲାଠାରେ ର୍ୟାଲି କରିଥିଲେ ।
ତେବେ ଫୁଲବାଗାନ ର୍ୟାଲିକୁ ବାତିଲ କରାଯାଇଛି । ଏଥି ମଧ୍ୟରେ ଶାହାଙ୍କ ରୋଡ ସୋରେ ହିଂସା ଘଟଣାକୁ କେନ୍ଦ୍ର କରି ପଶ୍ଚିମବଙ୍ଗରେ ସୃଷ୍ଟି ହୋଇଥିବା ରାଜନୈତିକ ସଂର୍ଘଷ ସମ୍ପର୍କରେ ବିଜେପି ପକ୍ଷରୁ ନିର୍ବାଚନ ଆୟୋଗର ଦୃଷ୍ଟି ଆକର୍ଷଣ କରାଯାଉଛି ।
