Anupambharat News Bureau
ନୂଆଦିଲ୍ଲୀ: ସମଗ୍ର ଦେଶରେ କୋଭିଡ଼-୧୯ ପଜିଟିଭ ନମୁନା ଏକ ଭୟଙ୍କର ମହାମାରୀ ରୋଗର କାରଣ ଘଟିଛି । ପ୍ରତିଦିନ ଭାରତରେ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି । ଯଦିଓ ୟୁରୋପୀୟ ଓ ଆମେରିକୀୟ ରାଷ୍ଟ୍ର ଭଳି ସାଂଘାତିକ ମୃତୁ୍ୟ ସଂଖ୍ୟା ବଢ଼ି ନାହିଁ ତେବେ ଆକ୍ରାନ୍ତଙ୍କ ସଂଖ୍ୟା କିନ୍ତୁ ଭାରତବର୍ଷରେ ବୃଦ୍ଧି ପାଇବାରେ ଲାଗିଛି । ସାମାଜିକ ଦୂରତାକୁ ବଜାୟ ରଖିବା ପାଇଁ କେନ୍ଦ୍ର ସରକାରଙ୍କ କଡ଼ା ନିର୍ଦ୍ଦେଶ ରହିଛି । ଗୋଟିଏ ପଟରେ ଲକ୍ଡ଼ାଉନ୍କୁ କାର୍ଯ୍ୟକାରୀ କଡ଼ାକଡ଼ି ଭାବରେ ଜାରି ରହିଛି । ଅନ୍ୟ କେତେକ ଜନବହୁଳ ନଗରୀରେ ଏହା ଅଣାୟତ ହେବାରେ ଲାଗିଛି । ଏଣୁ ଭାରତର କେତେକ ପ୍ରମୁଖ ନଗରୀ ତଥା ମୁମ୍ବାଇ, ପୁନେ, ଇନ୍ଦୋର, ଜୟପୁର, କୋଲ୍କାତା ପ୍ରଭୃତି ନଗରୀରେ କୋଭିଡ଼ -୧୯ ଆକ୍ରାନ୍ତଙ୍କ ସଂଖ୍ୟା ପ୍ରତିଦିନ ବୃଦ୍ଧି ପାଉଛି । ତେଣୁ ଉକ୍ତ ନଗରୀ ଗୁଡିକ ଅତ୍ୟଧିକ ସମ୍ବେଦନଶୀଳକ ହୋଇପଡିଛି । ଏପରିକି କରୋନା ଭାଇରସ ସଂକ୍ରମଣର ସମ୍ଭାବନା ଥିଲେ ମଧ୍ୟ କେନ୍ଦ୍ର ସରକାରଙ୍କ ପକ୍ଷରୁ ଜାରି କରାଯାଇଥିବା ଲକ୍ଡ଼ାଉନ୍କୁ କେତେକ ଅଞ୍ଚଳରେ କଡ଼ାକଡ଼ି ଭାବରେ ପାଳନ କରାଯାଉ ନାହିଁ । ପଶ୍ଚିମବଙ୍ଗର ନଗରୀମାନଙ୍କରେ ଏହାକୁ ହାଲୁକା ଭାବେ ଗ୍ରହଣ କରାଯାଇଛି ବୋଲି ସୋମବାର କେନ୍ଦ୍ର ପକ୍ଷରୁ କୁହାଯାଇଛି । ରାଜସ୍ଥାନର ଜୟପୁର ଏବଂ ପଶ୍ଚିମବଙ୍ଗର କୋଲ୍କାତା, ହାୱଡ଼ା, ପୂର୍ବ ମେଦିନାପୁର, ଉତ୍ତର ଚବିଶପର୍ଗଣା, ଦାର୍ଜିଲିଂ, କାଲିମପଙ୍ଗ ଏବଂ ଜଲ୍ପାଇଗୁଡ଼ି ଅଞ୍ଚଳ ଗୁଡିକରେ ତାଲାବନ୍ଦକୁ ଉଲଂଘନ କରାଯାଇଛି । କେତେକ ନଗରୀରେ ସ୍ୱାସ୍ଥ୍ୟକର୍ମୀମାନଙ୍କୁ ଆକ୍ରମଣ ହେଉଛି ଓ ସାମାଜିକ ଦୂରତ୍ୱକୁ ସମ୍ପୂର୍ଣ୍ଣ ରୂପେ ପାଳନ କରାଯାଉ ନାହିଁ । ଏପରିକି ନଗରାଞ୍ଚଳରେ ଯାନବାହାନ ଚଳାଚଳ ହେଉଥିବା କେନ୍ଦ୍ର ପକ୍ଷରୁ ଇଙ୍ଗୀତ ହୋଇଛି । ଇତିମଧ୍ୟରେ ଭାରତରେ କରୋନା ମୃତକଙ୍କ ସଂଖ୍ୟା ୫୫୯କୁ ପହଞ୍ଚି ଯାଇଛି । ଆକ୍ରାନ୍ତଙ୍କ ସଂଖ୍ୟା ୧୭୬୫୬କୁ ପହଞ୍ଚିଛି । ତେଣୁ କଡ଼ାକଡ଼ି ଭାବେ ସତର୍କତା ଅବଲମ୍ବନ କରାଯିବା ନିହାତି ଆବଶ୍ୟକ ବୋଲି କେନ୍ଦ୍ରମନ୍ତ୍ରଣାଳୟ ପକ୍ଷରୁ କୁହାଯାଇଛି । ଇତିମଧ୍ୟରେ ମହାରାଷ୍ଟ୍ରରେ ସର୍ବାଧିକ ୨୨୩ ଲୋକ ପ୍ରାଣ ହରାଇଥିବା ବେଳେ, ରାଜ୍ୟରେ ୪୨୦୩ ସଂଖ୍ୟକ ଲୋକ ଆକ୍ରାନ୍ତ ହୋଇଛନ୍ତି । ମଧ୍ୟପ୍ରଦେଶରେ ୬୦ଜଣ ପ୍ରାଣ ହରାଇଥିବା ବେଳେ ଏହି କରୋନା ରୋଗରେ ୧୪୦୭ ସଂଖ୍ୟକ ଆକ୍ରାନ୍ତ ହୋଇଛନ୍ତି ବୋଲି କେନ୍ଦ୍ର ସ୍ୱାସ୍ଥ୍ୟମନ୍ତ୍ରଣାଳୟ ପକ୍ଷରୁ ତଥ୍ୟ ପ୍ରକାଶ କରାଯାଇଛି ।
ଭାରତରେ କରୋନା ଭାଇରସର ବ୍ୟାପକତା ବହୁ ରାଜ୍ୟରେ ବ୍ୟାପିବାରେ ଲାଗିଛି । ପ୍ରଥମ ପର୍ଯ୍ୟାୟ ଲକ୍ଡ଼ାଉନ୍ରେ ଆକ୍ରାନ୍ତଙ୍କ ସଂଖ୍ୟା ହ୍ରାସ ନପାଇବା ଯୋଗୁଁ ଦେଶରେ ଦ୍ୱିତୀୟ ପର୍ଯ୍ୟାୟ ତାଲାବନ୍ଦ ନୀତି ଜନିତ ସାମାଜିକ ଦୂରତା କଡ଼ାକଡ଼ି ଭାବେ ପାଳନ କରାଯାଉଛି । ଏବେ ମଧ୍ୟ ଭାରତରେ ଆକ୍ରାନ୍ତଙ୍କ ସଂଖ୍ୟା ସୋମବାର ସୁଦ୍ଧା ୧୭୬୫୬କୁ ପହଞ୍ଚି ଯାଇଛି ଏବଂ ମୃତକଙ୍କ ସଂଖ୍ୟା ୫୫୯କୁ ସ୍ପର୍ଶ କରିଛି । ଭାରତରେ କେତେକ ରାଜ୍ୟର ଏବଂ ଜିଲ୍ଲାର ଅଣପ୍ରଭାବିତ କୋଭିଡ଼-୧୯ ଅଞ୍ଚଳରେ କୋହଳତା ପ୍ରଦର୍ଶନ କରାଯାଇଛି । ଅନ୍ୟପକ୍ଷରେ ଆଜି ହିଁ ଭାରତରେ ସର୍ବାଧିକ ସଂକ୍ରମଣ ସଂଖ୍ୟା ଚିହ୍ନଟ ହୋଇଛି । ଗତ ୨୪ ଘଣ୍ଟାରେ ଦେଶରେ ୧୫୫୩ ସଂଖ୍ୟକ ନୂଆ କୋଭିଡ଼-୧୯ ପଜିଟିଭ ଆକ୍ରାନ୍ତ ବ୍ୟକ୍ତିଙ୍କୁ ଚିହ୍ନଟ କରାଯାଇଥିବା ବେଳେ ଗତ ୨୪ ଘଣ୍ଟାରେ ୩୬ ଜଣ ଲୋକ ଏହି ରୋଗରେ
ପ୍ରାଣହରାଇଛନ୍ତି । ତେବେ ସମଗ୍ର ଦେଶରେ କୋଭିଡ଼-୧୯ରୁ ମାତ୍ର ୨୮୪୨ ସଂଖ୍ୟକ ଲୋକ ସୁସ୍ଥ ହୋଇ ଘରକୁ ଫେରିଥିବା ଜଣାପଡିଛି । ସର୍ବାଧିକ ମହାରାଷ୍ଟ୍ରରେ ହିଁ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଇଁ ପାଞ୍ଚ ହଜାର ପାଖାପାଖି ପହଞ୍ଚିଛି । ଏହାପରେ ଦିଲ୍ଲୀରେ ୨୦୦୦ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ୪୫ ଜଣ ଲୋକ ପ୍ରାଣ ହରାଇଛନ୍ତି ।
ସାମାଜିକ ଦୂରତ୍ୱକୁ କଡ଼ାକଡ଼ି ଭାବେ ପାଳନ କରିବା ପାଇଁ ଭାରତରେ ତାଲାବନ୍ଦ ନୀତି ଜାରି ରହିଛି । କରୋନା ରୋଗରୁ ମୁକ୍ତ ପାଇବା ପାଇଁ ବିଭିନ୍ନ ରାଜ୍ୟରେ ସାମାଜିକ ଦୂରତାକୁ ଜନସାଧାରଣ ମଧ୍ୟ ପ୍ରାଧାନ୍ୟତା ଦେଇଛନ୍ତି । କୌଣସି ଧାର୍ମିକ ସମ୍ମିଳନୀ, ପୂଜାପାଠ ଏବଂ ମନ୍ଦିରରେ କେବଳ ଦୈନିକ ନୀତିକାନ୍ତିକୁ ଅନୁମତି ଦିଆଯାଇଥିବା ବେଳେ ଭକ୍ତଙ୍କ ଦର୍ଶନ ଉପରେ କଟକଟା ଲାଗୁ କରାଯାଇଥିଲା । ତେବେ ମଇ ମାସ ୧୪ ତାରିଖ ଠାରୁ ଉତ୍ତରାଖଣ୍ଡର କେଦାରନାଥ ମନ୍ଦିରର ଫାଟକ ସର୍ବସାଧାରଣଙ୍କ ଉଦ୍ଦେଶ୍ୟରେ ଆଜି ମନ୍ଦିର ପ୍ରଶାସନ ପକ୍ଷରୁ କୁହାଯାଇଛି । କୋଭିଡ଼-୧୯ ମହାମାରୀର ବ୍ୟାପକତା ଯୋଗୁଁ ମନ୍ଦିରକୁ ବନ୍ଦ କରାଯାଇଥିଲା । ଏହା ପୁନର୍ବାର ଖୋଲାଯିବ ବୋଲି ଘୋଷଣା କରାଯାଇଛି । ସୂଚନା ଯେ, ଉଭୟ କେଦାରନାଥ ଓ ବଦ୍ରୀନାଥର ମୁଖ୍ୟ ପୂଜକମାନେ କ୍ୱାରାଣ୍ଟାଇନ୍ରେ ରହିଥିଲେ । ତେଣୁ ଲକ୍ଡ଼ାଉନ୍ ହଟିବା ପରେ ତତ୍କ୍ଷଣାତ୍ ମନ୍ଦିରକୁ ଖୋଲା ନଯାଇ ୧୪ ତାରିଖରେ ଖୋଲାଯିବ ବୋଲି ଧାର୍ଯ୍ୟ କରାଯାଇଛି ।
ଚୀନ୍ରୁ ସୃଷ୍ଟି ହୋଇଥିବା କରୋନା ଭାଇରସ କ୍ରମେ ସମଗ୍ର ବିଶ୍ୱକୁ ବ୍ୟାପି ଯାଇଛି । ବିଶ୍ୱରେ ୨୪ ଲକ୍ଷ ଲୋକ କୋଭିଡ଼-୧୯ରେ ଆକ୍ରାନ୍ତ ହୋଇଥିବା ବେଳେ ୧,୬୫,୦୦୦ ଲୋକ ବିଭିନ୍ନ ଦେଶରୁ ପ୍ରାଣହରାଇଛନ୍ତି । ଆମେରିକାରେ ସର୍ବାଧିକ ମୃତକଙ୍କ ସଂଖ୍ୟା ୪୦ ହଜାର ଟପି ଯାଇଛି । ଆମେରିକାରେ ଆକ୍ରାନ୍ତଙ୍କ ସଂଖ୍ୟା ୭,୫୮,୭୨୦କୁ ପହଞ୍ଚିଛି । ଏହାପରେ ସ୍ପେନ୍ର ପରିସ୍ଥିତି ମଧ୍ୟ ସାଂଘାତିକ ରହିଛି । ଏଠାରେ ଆକ୍ରାନ୍ତଙ୍କ ସଂଖ୍ୟା ୧,୯୮,୦୦୦ ଥିବା ବେଳେ ଇଟାଲୀରେ ଆକ୍ରାନ୍ତଙ୍କ ସଂଖ୍ୟା ୧,୭୮,୯୭୨କୁ ସ୍ପର୍ଶ କରିଛି । ମାତ୍ର ୪ ଦିନ ମଧ୍ୟରେ ୧୦ ହଜାର ଲୋକ କୋଭିଡ଼୍-୧୯ରେ ପ୍ରାଣ ହରାଇଛନ୍ତି । ସମଗ୍ର ବିଶ୍ୱରେ ଆମେରିକାର ସ୍ଥିତି ଅତ୍ୟନ୍ତ ସମ୍ବେଦନଶୀଳକ ରହିଛି । ବିଶ୍ୱରେ ଆନ୍ତର୍ଜାତୀୟ ବିମାନ ଉଡ଼ାଣ ସେବା ବନ୍ଦ ରହିଛି ।
ଆଖିବୁଜିଲେ ୪୪ତମ ଆକ୍ରାନ୍ତ, କରୋନା ନୁହେଁ କ୍ୟାନ୍ସରେ ମୃତୁ୍ୟ, ପଶ୍ଚିମବଙ୍ଗରୁ ଆସି ଭୁବନେଶ୍ୱରରେ ଚିକିତ୍ସିତ ହେଉଥିଲେ
Read More...
