Anupambharat News Bureau
ବ୍ରହ୍ମପୁର/ଛତ୍ରପୁର, ୯ା୫(ଅନୁପମମିଡ଼ିଆ): ଗଞ୍ଜାମ ଜିଲ୍ଲାରେ କରୋନା ପଜିଟିଭ ବେକାବୁ ହେବାରେ ଲାଗିଛି । ଦିନକୁ ଦିନ ପଜିଟିଭ ସଂଖ୍ୟା ବୃଦ୍ଧିି ଜିଲ୍ଲାବାସୀଙ୍କ ମଧ୍ୟରେ ଛନକା ସୃଷ୍ଟି କରିବାରେ ଲାଗିଛି । ଅନ୍ୟପକ୍ଷେ ସମସ୍ତ ଆକ୍ରାନ୍ତ ସୁରତ ଫେରାନ୍ତ ରହିଥିବାରୁ ଜିଲ୍ଲାବାସୀଙ୍କୁ ଏହା ବଡ଼ ଆଶ୍ୱସ୍ତି ଦେଇଛି । ସମସ୍ତ ଆକ୍ରାନ୍ତ କ୍ୱାରେଣ୍ଟାଇନ କେନ୍ଦ୍ରରେ ରହୁଥିବାରୁ ସଂକ୍ରମଣ ବ୍ୟାପିବାର ଆଶଙ୍କା ନାହିଁ, ଜିଲ୍ଲାବାସୀ ଭୟଭୀତ ନହେବାକୁ ପୁଣି ଥରେ ଶନିବାରେ ଜିଲ୍ଲାପାଳ ବିଜୟ ଅମୃତ କୁଲାଙ୍ଗେ ଜଣାଇଛନ୍ତି । ଗତ ଦୁଇ ଦିନ ହେଲା କ୍ରମାଗତ ଭାବେ ରେକର୍ଡ଼ ପଜିଟିଭ ବାହାରିଥିବା ଜିଲ୍ଲାରେ ଆଜି ଦିନକ ମଧ୍ୟରେ ୧୮ ଆକ୍ରାନ୍ତ ଚିହ୍ନଟ ହୋଇଛନ୍ତି । ସମସ୍ତ ଆକ୍ରାନ୍ତଙ୍କୁ କୋଭିଡ଼ ହସ୍ପିଟାଲରେ ଭର୍ତ୍ତି କରାଯାଇଛି । ଆଜି ସକାଳେ ୧୨ ଜଣ କରୋନା ପଜିଟିଭ୍ ଚିହ୍ନଟ ହୋଇଥିବା ବେଳେ ଅପରାହ୍ନରେ ଜଣେ ଏବଂ ସନ୍ଧ୍ୟାରେ ଆଉ ୫ ଜଣ ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି । ଏଥି ସହିତ ଜିଲ୍ଲାରେ ମୋଟ୍ ଆକ୍ରାନ୍ତଙ୍କ ସଂଖ୍ୟା ୮୯କୁ ବୃଦ୍ଧି ପାଇଛି । ଏପରିକି ଗଞ୍ଜାମ ଜିଲ୍ଲା ରାଜ୍ୟର କରୋନା ଆକ୍ରାନ୍ତ ତାଲିକାରେ ଥିବା ଜିଲ୍ଲା ଗୁଡିକ ମଧ୍ୟରେ ଶୀର୍ଷରେ ରହିଛି ।ସନ୍ଧ୍ୟାରେ ଚିହ୍ନଟ ହୋଇଥିବା ୫ ଜଣ ସମସ୍ତେ ସୁରତ ଫେରନ୍ତା ଏବଂ ସେମାନଙ୍କର ବୟସ ୧୬ରୁ ୪୯ ବର୍ଷ ମଧ୍ୟରେ ରହିଛି । ଏମାନେ ସମସ୍ତେ ପୁରୁଷ ବୋଲି ଜଣାପଡିଛି । ସେହିପରି ଆଜି ସକାଳେ ଓ ଅପରାହ୍ନରେ ଚିହ୍ନଟ ହୋଇଥିବା ୧୩ ଜଣ ସମସ୍ତେ ପୁରୁଷ ଏବଂ ସମସ୍ତ ଆକ୍ରାନ୍ତଙ୍କର ସୁରତ ଲିଙ୍କ୍ ଥିବା ଜଣାପଡିଛି । ସୁରତରୁ ଫେରିବା ପରେ ଏମାନଙ୍କୁ ବିଭିନ୍ନ କ ୍ୱାରେଣ୍ଟାଇନ ସେଣ୍ଟରରେ ରଖାଯାଇଥିଲା । ନମୁନା ପରୀକ୍ଷା ରିପୋର୍ଟ ପଜିଟିଭ୍ ପରେ ସମସ୍ତ ଆକ୍ରାନ୍ତଙ୍କୁ ଶୀତଳାପଲ୍ଲୀସ୍ଥିତ କୋଭିଡ଼୍-୧୯ ହସ୍ପିଟାଲରେ ଭର୍ତ୍ତି କରାଯାଇଛି । ତେବେ ବର୍ତ୍ତମାନ ସୁଦ୍ଧା ଜିଲ୍ଲାର କୌଣସି ଆକ୍ରାନ୍ତ ସୁସ୍ଥ ହୋଇ ଫେରିନାହାଁନ୍ତି । ଏଠାରେ ଉଲ୍ଲେଖଯୋଗ୍ୟ, ଗତକାଲି ସୁଦ୍ଧା ଜିଲ୍ଲାରେ ଆକ୍ରାନ୍ତଙ୍କ ସଂଖ୍ୟା ୭୧ ଥିଲା । ତେବେ ଆଜି ଏହି ସଂଖ୍ୟା ୮୯ରେ ପହଞ୍ଚିଛି । ପ୍ରକାଶ ଥାଉକି ଗତ ରବିବାର ଜିଲ୍ଳାକୁ କରୋନା ଛୁଇଁଥିଲା, ମାତ୍ର ଛ’ ଦିନ ମଧ୍ୟରେ କରୋନା ପଜିଟିଭ ସଂଖ୍ୟା ୮୯ରେ ପହଞ୍ଚିବା ଜିଲ୍ଲାବାସୀଙ୍କ ମନରେ ଅଜଣା ଭୟ ସୃଷ୍ଟି କରିବାରେ ଲାଗିଛି ।
ରାଜ୍ୟରେ ହୁହୁ ବଢ଼ୁଛି କରୋନା ପଜିଟିଭ ନୟାଗଡକୁ ଛୁଇଁଲା କୋଭିଡ଼, ୧୯ ଜିଲ୍ଲାକୁ ବ୍ୟାପିଲା ଭୂତାଣୁ, ଆକ୍ରାନ୍ତ ସଂଖ୍ୟା ୨୯୪କୁ ଛୁଇଁଲା
Read More...
