Anupambharat News Bureau
ନୂଆଦିଲ୍ଲୀ,୧୨ା୭: ସମଗ୍ର ଦେଶରେ କରୋନା ସଂକ୍ରମଣର ବ୍ୟାପକତା ମହାମାରୀର ରୂପ ଧାରଣ କରିସାରିଛି । ଏହା କବଳରେ ଭାରତରେ ଆଜିସୁଦ୍ଧା ୨୨ ହଜାର ୬୭୪ ସଂଖ୍ୟକ ଲୋକ ଜୀବନ ହରାଇଲେଣି । ୮ ଲକ୍ଷ ୪୯ ହଜାର ୫୫୩ ସଂଖ୍ୟକ ଲୋକ ଆକ୍ରାନ୍ତ ହୋଇ ଜୀବନ ସହ ସଂଘର୍ଷ କରୁଥିବା ଭଳି ଭୟଙ୍କର ସ୍ଥିତି ସୃଷ୍ଟି ହୋଇଛି । ଯଦିଓ ଏହାର ନିରାକରଣ ପାଇଁ ଦେଶରେ ଔଷଧ ପ୍ରସ୍ତìତ ଓ ଯୋଗାଣକୁ ସରକାର ରାଜି ହୋଇଛନ୍ତି, ତେବେ ଯଥେଷ୍ଟ ପରିମାଣରେ ରୋଗୀଙ୍କ ପାଖରେ ଔଷଧ ପହଞ୍ଚି ପାରି ନାହିଁ । ଦୈନିକ ଯେଭଳି ଆକ୍ରାନ୍ତ ଓ ମୃତକଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି । ଏହା ଦେଶବାସୀଙ୍କ ମଧ୍ୟରେ କେବଳ ଆତଙ୍କର ବାତାବରଣ ଖେଳି ଯାଇଛି । ପ୍ରଭାବିତ ରାଷ୍ଟ୍ରମାନଙ୍କ ତାଲିକାରେ ଭାରତ ମାତ୍ର କମ୍ ଦିନ ମଧ୍ୟରେ ତୃତୀୟ ସ୍ଥାନକୁ ଆସିଯାଇଛି , ତେଣୁ ଭାରତରେ ଆକ୍ରାନ୍ତଙ୍କ ସଂଖ୍ୟା ହୁ ହୁ ହୋଇ ବଢ଼ିବାରେ ଲାଗିଛି । ଗତ ୨୪ ଘଣ୍ଟାର ରିପୋର୍ଟ ଅନୁଯାୟୀ ଦେଶରେ ୫୫୧ ସଂଖ୍ୟକ ଲୋକ କରୋନା ରୋଗରେ ସଂକ୍ରମଣ ହୋଇ ଜୀବନ ହରାଇଛନ୍ତି । ଏହା ବ୍ୟତୀତ ଗତ ୨୪ ଘଣ୍ଟାରେ ୨୮,୬୩୭ ସଂଖ୍ୟକ ଲୋକ ନୂତନ ଭାବରେ କୋଭିଡ଼-୧୯ ପଜିଟିଭରେ ଚିହ୍ନଟ ହେବା ଯୋଗୁଁ ସମୁଦାୟ ଆକ୍ରାନ୍ତଙ୍କ ସଂଖ୍ୟା ୮ ଲକ୍ଷ ୪୯ ହଜାରରୁ ଉର୍ଦ୍ଧ୍ୱକୁ ଟପି ଯାଇଛି । ଦେଶର ସ୍ଥିତି ଅତ୍ୟନ୍ତ ଗମ୍ଭୀରଜନକ ରହିଛି । ପାଞ୍ଚ ପର୍ଯ୍ୟାୟ ଲକ୍ଡ଼ାଉନ୍ ଦେଶରେ କାର୍ଯ୍ୟକାରୀ ହୋଇଯିବା ପରେ ଦ୍ୱିତୀୟ ପର୍ଯ୍ୟାୟ ଅନ୍ଲକ୍ ଆରମ୍ଭ ହୋଇଛି । ଏପରିକି ସ୍ଥିତି ଅଧିକ ଅଣାୟତ ହେବା ଯୋଗୁଁ ପୁଣି କେତେକ ରାଜ୍ୟରେ ଲକ୍ଡ଼ାଉନ୍ ସମ୍ପ୍ରସାରଣ କରାଯାଉଥିବା ଦୁର୍ଭାଗ୍ୟଜନକ ସ୍ଥିତି ସୃଷ୍ଟି କରିଛି । ଭାରତରେ ସର୍ବାଧିକ ପ୍ରଭାବିତ ରାଜ୍ୟ ଭାବେ ମହାରାଷ୍ଟ୍ରର ସ୍ଥିତି ଦୈନିକ ସାଂଘାତିକ ରୂପ ଧାରଣ କରୁଛି । ଗତ ୨୪ ଘଣ୍ଟାର ରିପୋର୍ଟ ଅନୁଯାୟୀ ସମୁଦାୟ ୮୧୩୯ ସର୍ବାଧିଖ ହାରରେ ଲୋକମାନେ ନୂତନ ଭାବେ କୋଭିଡ଼-୧୯ ପଜିଟିଭ ତାଲିକାରେ ଯୋଡ଼ି ହୋଇଯାଇଛନ୍ତି । ଫଳରେ ମହରାଷ୍ଟ୍ରରେ ହିଁ ଆକ୍ରାନ୍ତଙ୍କ ସଂଖ୍ୟା ୨ ଲକ୍ଷ ୪୬ ହଜାର ୬୦୦କୁ ପହଞ୍ଚି ଯାଇଛି । ଠିକ୍ ସେହିଭଳି ଆଜିର ହସ୍ତଗତ ରିପୋର୍ଟ ଅନୁଯାୟୀ ଗୋଟିଏ ଦିନରେ ୨୨୩ ସଂଖ୍ୟକ ଲୋକ କରୋନା ରୋଗରେ ପୀଡିତ ହୋଇ ପ୍ରାଣ ହରାଇବା ଯୋଗୁଁ ମହାରାଷ୍ଟ୍ରରେ ଏଯାବତ ସମୁଦାୟ ମୃତକଙ୍କ ସଂଖ୍ୟା ୧୦,୧୧୬କୁ ବୃଦ୍ଧି ପାଇଛି । ଭାରତରେ ପ୍ରଥମ ଥର ପାଇଁ ମହାରାଷ୍ଟ୍ରରେ ମୃତକଙ୍କ ସଂଖ୍ୟା ୧୦ ହଜାର ଟପି ଯାଇଥିବା ଘଟଣା ଭୟଙ୍କର ସ୍ଥିତି ସୃଷ୍ଟି କରିଛି । ଦ୍ୱିତୀୟ ପ୍ରଭାବିତ ରାଜ୍ୟ ଭାବେ ତାମିଲନାଡ଼ୁରେ ପୁଡି ଆଜି ୬୯ ସଂଖ୍ୟକ ରୋଗୀ ଜୀବନ ହରାଇବା ପରେ ସମୁଦାୟ ମୃତକଙ୍କ ସଂଖ୍ୟା ୧୮୯୮କୁ ବୃଦ୍ଧି ପାଇଛି । ଠିକ୍ ସେହିଭଳି ପୁଣି ରାଜ୍ୟରେ ୩୯୬୫ ସଂଖ୍ୟକ ଲୋକ ଗତ ୨୪ ଘଣ୍ଟାରେ ପଜିଟିଭ ଚିହ୍ନଟ ହେବା ଯୋଗୁଁ ରାଜ୍ୟରେ ସମୁଦାୟ ଆକ୍ରାନ୍ତଙ୍କ ସଂଖ୍ୟା ୧ ଲକ୍ଷ ୩୪ ହଜାର ୨୨୬କୁ ବୃଦ୍ଧି ଘଟିଛି । ରାଷ୍ଟ୍ରୀୟ ରାଜଧାନୀନଗରୀ ଦିଲ୍ଲୀର ସ୍ଥିତି ମଧ୍ୟ ଗମ୍ଭୀରଜନକ ରହିଛି । ପୁଣି ୨୪ ଘଣ୍ଟାରେ ୧୭୮୧ ସଂଖ୍ୟକ ନୂତନ ପଜିଟିଭ ଚିହ୍ନଟ ହେବା ଯୋଗୁଁ ଦିଲ୍ଲୀରେ ସମୁଦାୟ ଆକ୍ରାନ୍ତଙ୍କ ସଂଖ୍ୟା ୧ ଲକ୍ଷ ୧୦ ହଜାର ଟପି ଯାଇଛି । ମୃତକଙ୍କ ସଂଖ୍ୟାରେ ପୁଣି ୩୪ ଜଣଙ୍କ ମୃତୁ୍ୟ ଘଟିବା ଯୋଗୁଁ ସମୁଦାୟ ମୃତକଙ୍କ ସଂଖ୍ୟା ୩୩୩୪ କୁ ବୃଦ୍ଧି ଘଟିଛି । ତେବେ ଦିଲ୍ଲୀରେ ଗତ ୨୪ ଘଣ୍ଟାରେ ୨୨୭୬ ସଂଖ୍ୟକ ଲୋକ ସୁସ୍ଥ ହୋଇଥିବା ଘୋଷଣା କରାଯାଇଛି । ଦିଲ୍ଲୀ ସରକାର କରୋନା ରୋଗୀଙ୍କ ମୃତୁ୍ୟ ସଂଖ୍ୟା ହ୍ରାସ କରିବାରେ ସମସ୍ତ ଉଦ୍ୟମ କରିଛି ବୋଲି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରୀୱାଲ୍ କହିଛନ୍ତି । ଦିଲ୍ଲୀରେ ଅକ୍ସିମିଟର ବ୍ୟବହାର କରାଯାଇ ଲୋକଙ୍କ ପରୀକ୍ଷା କରାଯାଇଛି । ପଶ୍ଚିମବଙ୍ଗର ସ୍ଥିତି ମଧ୍ୟ ଗମ୍ଭୀର ହେବାରେ ଲାଗିଛି । ଗତ ୨୪ ଘଣ୍ଟାରେ ରାଜ୍ୟରେ ସର୍ବାଧିଖ ୧୫୬୦ ସଂଖ୍ୟକ ନୂତନ କୋଭିଡ଼-୧୯ ପଜିଟିଭ ଚିହ୍ନଟ ହେବା ଯୋଗୁଁ ରାଜ୍ୟରେ ସମୁଦାୟ ଆକ୍ରାନ୍ତଙ୍କ ସଂଖ୍ୟା ୩୦ ହଜାର ଟପି ଯାଇଛି । କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣଳୟ ପକ୍ଷରୁ ଜାରି କରଯାଇଥିବା ରିପୋର୍ଟ ଅନୁଯାୟୀ ଦେଶରେ ୫,୩୪,୬୨୧ ସଂଖ୍ୟକ ଲୋକ ସୁସ୍ଥ ହୋଇଛନ୍ତି । ବିଭିନ୍ନ ରାଜ୍ୟ ମାନଙ୍କ ତୁଳନାରେ ମହାରାଷ୍ଟ୍ର, ଗୁଜୁରାଟ, ଦିଲ୍ଲୀ, ତାମିଲନାଡ଼ୁ, ମଧ୍ୟପ୍ରଦେଶ ଏବଂ ରାଜସ୍ଥାନ କୋଭିଡ଼-୧୯ ହଟ୍ସ୍ପଟ୍ ଭାବେ ଚିହ୍ନଟ ହୋଇଛନ୍ତି । ଭାରତୀୟ ଭେଷଜ ବିଜ୍ଞାନ ଗବେଷଣା ପରିଷଦ( ଆଇସିଏମ୍ଆର୍) ପକ୍ଷରୁ ଜୁଲାଇ ୧୧ ତାରିଖ ସୁଦ୍ଧା ୧ କୋଟି ୧୫ ଲକ୍ଷରୁ ଉର୍ଦ୍ଧ୍ୱ ନମୁନା ପରୀକ୍ଷଣ କରାଯାଇଛି । ମାତ୍ର ଗୋଟିଏ ଦିନ ଅର୍ଥାତ୍ ଶନିବାର ଦିନ ସମୁଦାୟ ୨ଲକ୍ଷ ୮୦ ହଜାର ୧୫୧ ନମୁନା ପରୀକ୍ଷଣ କରାଯାଇଥିବା ଆଇସିଏମ୍ଆର୍ କହିଛି ।
ଉତ୍ତରପ୍ରଦେଶରେ କୋଭିଡ଼-୧୯ କରୋନା ପଜିଟିଭ ସଂଖ୍ୟା ଆଜି ସୁଦ୍ଧା ୩୫ ହଜାର ଟପି ଯାଇଛି । କର୍ଣ୍ଣାଟକରେ ଏହି ପଜିଟିଭ ୩୬ ହଜାର ଟପି ଯାଇଥିବା ବେଳେ ତେଲେଙ୍ଗାନାରେ ଆକ୍ରାନ୍ତଙ୍କ ସଂଖ୍ୟା ୩୩ ହଜାରରୁ ଉର୍ଦ୍ଧ୍ୱକୁ ପହଞ୍ଚି ଯାଇଛି । ପ୍ରବାସୀମାନଙ୍କ ସ୍ଥାନାନ୍ତରଣ କାରଣ ଯୋଗୁଁ ଆସାମ, ବିହାର ଓ ଓଡ଼ିଶାରେ ଆକ୍ରାନ୍ତଙ୍କ ସଂଖ୍ୟା ଦୈନିକ ଆକାଶଛୁଆଁ ଭାବରେ ବୃଦ୍ଧି ଘଟିଛି । ଆସାମରେ ଆଜି ଗୋଟିଏ ଦିନରେ ୯୩୬ ପଜିଟିଭ ଚିହ୍ନଟ ହୋଇଥିବା ବେଳେ ବିହାରରେ ୭୯୮ ଓ ଓଡ଼ିଶାରେ ଗତ ୨୪ ଘଣ୍ଟାରେ ୫୭୦ ସଂଖ୍ୟକ ନୂତନ ପଜିଟିଭ ଚିହ୍ନଟ ହେବା ଯୋଗୁଁ ଏହି ତିନି ରାଜ୍ୟରେ ସ୍ଥିତି ଅତ୍ୟନ୍ତ ଗମ୍ଭୀର ହେବାରେ ଲାଗିଛି । ସମଗ୍ର ବିଶ୍ୱରେ ଏହି କରୋନା ଭାଇରସ ମାରାତ୍ମକ ରୂପ ନେଇଛି । ଆଜିସୁଦ୍ଧା ବିଶ୍ୱର ବିଭିନ୍ନ ରାଷ୍ଟ୍ରରେ କରୋନା ରୋଗରେ ସଂକ୍ରମଣ ହୋଇ ୫ ଲକ୍ଷ ୬୫ ହଜାର ୧୩୮ ଜଣ ରୋଗୀ ଜୀବନ ହରାଇଛନ୍ତି । ଯାହାକି କୌଣସି ବିଶ୍ୱ ଯୁଦ୍ଧରେ ମଧ୍ୟ ଏଭଳି ଜୀବନହାନୀ ଘଟି ନଥିଲା । ଏହି କୋଭିଡ଼-୧୯ର ସଂକ୍ରମଣରେ ପ୍ରଭାବିତ ରାଷ୍ଟ୍ରମାନଙ୍କରେ ୧ କୋଟି ୨୭ ଲକ୍ଷ
୧୭ ହଜାରରୁ ଉର୍ଦ୍ଧ୍ୱ ସଂଖ୍ୟକ ଲୋକ କରୋନା ରୋଗରେ ଆକ୍ରାନ୍ତ ହୋଇ ଜୀବନ ସହ ସଂଘର୍ଷ କରୁଥିବା ଦୁଖଃଦ ଘଟଣା ଦେଖିବାକୁ ମିଳିଛି । ବିଶ୍ୱର ସର୍ବାଧିକ ପ୍ରଭାବିତ ରାଷ୍ଟ୍ର ଭାବେ ଆମେରିକା ଅଧିକ ପ୍ରଭାବିତ ହୋଇଛି । ଦେଶରେ ୧ଲକ୍ଷ ୩୪ ହଜାର ୭୭୭ ସଂଖ୍ୟକ ଲୋକ କରୋନା ରୋଗରେ ମୃତୁ୍ୟବରଣ କରିଛନ୍ତି । ପୁଣି ୩୨ ଲକ୍ଷ ୪୫ ହଜାରରୁ ଉର୍ଦ୍ଧ୍ୱ ଆକ୍ରାନ୍ତ ହୋଇଥିବା ଭୟଙ୍କର ସ୍ଥିତି ସୃଷ୍ଟି ହୋଇଛି । ବ୍ରାଜିଲରେ ୭୧ ହଜାରରୁ ଉର୍ଦ୍ଧ୍ୱ ଲୋକ ଜୀବନ ହରାଇଥିବା ବେଳେ ୧୮ ଲକ୍ଷରୁ ଉର୍ଦ୍ଧ୍ୱ ଲୋକ ଆକ୍ରାନ୍ତ ହୋଇଛନ୍ତି । ତୃତୀୟ ପ୍ରଭାବିତ ରାଷ୍ଟ୍ର ଭାରତରେ ୮ ଲକ୍ଷରୁ ଉର୍ଦ୍ଧ୍ୱ ଲୋକ ଆକ୍ରାନ୍ତ ହୋଇଥିବା ବେଳେ ଏହାର ପରବର୍ତ୍ତୀ ଋଷିଆରେ ୭ ଲକ୍ଷରୁ ଅଧିକ ଲୋକ ଆକ୍ରାନ୍ତ ହୋଇଥିବା ଦେଖିବାକୁ ମିଳିଛି । ବିଶ୍ୱର ପ୍ରାୟତଃ ସମସ୍ତ ରାଷ୍ଟ୍ର ଅଳ୍ପବହୁତ ପ୍ରଭାବିତ ହୋଇଥିବା ଦୁର୍ଭାଗ୍ୟଜନକ ସ୍ଥିତି ସୃଷ୍ଟି ହୋଇଛି ।
