Anupambharat News Bureau
ଭୁବନେଶ୍ୱର, ୨୭ା୧୧(ଅନୁପମ ମିଡ଼ିଆ): ପରୀ ପାଇଁ ପୁଣି ଆଜି ବିଧାନସଭା ଅଚଳ । କ୍ରମାଗତ ତୃତୀୟ ଦିନ ପାଇଁ ସମ ପ୍ରସଙ୍ଗରେ ଗୃହରେ ଅଚଳାବସ୍ଥା ଦେଖା ଦେଇଥିଲା । ଆଜିର ଦିବସରେ ମୁଖ୍ୟମନ୍ତ୍ରୀଙ୍କ ପାଇଁ ଉଦ୍ଦିଷ୍ଟ ଥିବାରୁ ମୁଲତବୀ ପ୍ରସ୍ତାବ କାର୍ଯ୍ୟସୂଚୀରେ ସ୍ଥାନିତ ହୋଇନଥିଲା । ସ୍ୱରାଷ୍ଟ୍ର ଓ ସାଧାରଣ ପ୍ରଶାସନ ବିଭାଗର ଖର୍ଚ୍ଚ ଦାବି ଆଲୋଚନା ବୈଠକ ଆରମ୍ଭରୁ ହେବାର ଥିଲେ ହେଁ ତାହା ମଧ୍ୟହୋଇ ପାରି ନଥିଲା । ଗୃହର ଅଚଳାବସ୍ଥାକୁ ଏଡାଇବା ପାଇଁ ବାଚସ୍ପତି ଓ ଚେୟାର ମ୍ୟାନ ପାଞ୍ଚ ଥର ଗୃହକୁ ମୁଲତବୀ ରଖିଥିଲେ । ତେବେ ଏଥିରେ କିଛି ଉନ୍ନତି ନହେବାରୁ ଶନିବାର ସକାଳ ଯାଏଁ ଗୃହକୁ ମୁଲତବୀ ଘୋଷଣା କରିଥିଲେ । ଆଜି ଗୃହର ବୈଠକ ଆରମ୍ଭ ହେବା ମାତ୍ରେ ଉଭୟ ବିରୋଧୀ ବିଜେପି ଓ କଂଗ୍ରେସ ବିଧାୟକ ମାନେ ମଧ୍ୟଭାଗକୁ ଚାଲି ଆସି ପରୀ ହତ୍ୟା ମାମଲାରେ କୃଷି ମନ୍ତ୍ରୀ ଅରୁଣ ସାହୁଙ୍କ ପରୋକ୍ଷ ସମ୍ପୃକ୍ତି ଥିବା ନେଇ ତାଙ୍କୁ ବହିଷ୍କାର ଓ ତଦନ୍ତ ଦାବି କରି ହୋହଲ୍ଲା କରିଥିଲେ । ଏଥିରୁ ନିବୃତ ରହିବାକୁ ଉଭୟ ବାଚସ୍ପତି ଓ ଚେୟାରମ୍ୟାନ ଅନୁରୋଧ କରିଥିଲେ ହେଁ ଏଥିରୁ କୌଣସି ଲାଭ ମିଳି ନଥିଲା । ଗୃହ କିପରି ସୁରୁଖୁରୁରେ ଚାଲିପାରିବ ସେଥି ନେଇ ବାଚସ୍ପତି ତାଙ୍କ ଚ୍ୟାମ୍ବରରେ ଏକ ସର୍ବ ଦଳୀୟ ବୈଠକ ଡାକିଥିଲେ । ତେବେ ସର୍ବ ଦଳୀୟ ବୈଠକ ପରେ ମଧ୍ୟ ଗୃହ ସ୍ୱଭାବିକ ହୋଇ ପାରିନଥିଲା । ବିେରୋଧୀ ଦଳ ନେତା ପ୍ରଦୀପ୍ତ ନାୟକ ମନ୍ତ୍ରୀଙ୍କୁ ତୁରନ୍ତ ବହିଷ୍କାର କରାଯାଉ ବୋଲି ଦାବି କରିଥିଲେ । ସେହିଭଳି କଂଗ୍ରେସ ବିଧାୟକ ଦଳର ନେତା ନରସିଂହ ମିଶ୍ର କହିଥିଲେ ଯେ, ପରୀ ଘଟଣା ସାରା ରାଜ୍ୟରେ ପ୍ରତିକ୍ରିୟା ଦେଖା ଦେଇଛି । ମନ୍ତ୍ରୀଙ୍କ ଇସ୍ତଫା ସବୁ ଆଡେ ଦାବି କରାଯାଉଛି । ମନ୍ତ୍ରୀଙ୍କ ନିରପେକ୍ଷ ତଦନ୍ତ ପାଇଁ ଆମେ ଏସଆଇଟି ଦାବି କରୁଛୁ । ଏହି ଅବସରରେ ସଂସଦୀୟ ବ୍ୟାପାର ମନ୍ତ୍ରୀ ବିକ୍ରମକେଶରୀ ଆରୁଖ ବାଚସ୍ପତିଙ୍କୁ କହିଥିଲେ ଯେ, ମୁଖ୍ୟମନ୍ତ୍ରୀ ଏହା ଉପରେ ବକ୍ତବ୍ୟ ରଖିବେ । ତେଣୁ ଶୃଙ୍ଖଳା ବଜାୟ ରଖାଯାଉ ।ବାଚସ୍ପତି କହିଥିଲେ ଯେ, ଆଜି ଗୁରୁତ୍ୱପୂର୍ଣ୍ଣ ବିଭାଗର ଖର୍ଚ୍ଚଦାବି ରହିଛି । ଆପଣ ମାନେ ନିଜ ଆସନକୁ ଯାଆ;ୁ । ମୁଖ୍ୟମନ୍ତ୍ରୀ ଦାବି ଉପରେ କିଛି ମନ୍ତବ୍ୟ ରଖିବାକୁ ଚାହୁଁଛନ୍ତି । ମୁଖ୍ୟମନ୍ତ୍ରୀ ଭିଡିଓ କନଫରେନସିଂ ମାଧ୍ୟମରେ କହିଥିଲେ ଯେ, ପରୀ ଘଟଣା ତାଙ୍କୁ ମର୍ମାହତ କରିଛି । ଏହି ଘଟଣା ଉପରେ କ୍ରାଇମବ୍ରାଞ୍ଚ ତଦନ୍ତ ଆରମ୍ଭ ହୋଇଥିଲେ ହେଁ ବିରୋଧୀ ଦଳ ଯେଉଁ ଦାବି କରିଛନ୍ତି ସେ ଦାବି ଅନୁଯାୟୀ ଯଦି ଆବଶ୍ୟକ ହୁଏ ତେବେ ଏହି ମାମଲାର ଏସଆଇଟି ଯାଞ୍ଚ କରା ଯିବ । ତାଙ୍କ ସରକାର ଆଇନକୁ ସମ୍ମାନ ଦିଏ । ପରୀ ପରିବାରକୁ ନ୍ୟାୟ ମିଳିବ ବୋଲି ସେ କହିଛନ୍ତି । ବିରୋଧୀ ଦଳର ସଦସ୍ୟ ମାନେ ଏଥିରେ ସ;ୁଷ୍ଟ ହୋଇ ନ ଥିଲେ । ବିଜେପି ବିଧାୟକ ମାନେ କହିଥିଲେ ଯେ ମନ୍ତ୍ରୀଙ୍କୁ ବହିଷ୍କାର କରା ଯାଉ ଓ ସିବିଆଇ ଯାଞ୍ଚ କରାଯାଉ । ଅନ୍ୟପକ୍ଷେ ଗୃହର ଦ୍ୱିତୀୟାର୍ଦ୍ଧ ବୈଠକରେ ମଧ୍ୟ ସମ ପରିସ୍ଥିତି ଦେଖିବାକୁ ମିଳିଥିଲା । ବିଜେପି
ଦଳର ସଦସ୍ୟ ମାନେ ନିଜ ଦାବିରେ ଅଟଳ ରହି ଗୃହ ଭିତରେ ନାରାବାଜୀ କରିବା ସହ କାଗଜ ଚିରି ପୋଡିୟମ ଉପରକୁ ଫିଙ୍ଗିବାର ଦେଖା ଦେଇଥିଲା । ଏହି ସମୟରେ କଂଗ୍ରେସ ସଭ୍ୟ ମାନେ ଗୃହରେ ଅନୁପସ୍ଥିତ ଥିବାର ଦେଖାଯାଇଥିଲା । ଫଳରେ ବାଚସ୍ପତି ଗୃହ କାର୍ଯ୍ୟକୁ ଦୁଇ ଥର ମୁଲତବୀ ଘୋଷଣା କରିଥିଲେ । ତେବେ ପରବର୍ତ୍ତୀ ସମୟରେ ମଧ୍ୟ ଗୃହକାର୍ଯ୍ୟ ସ୍ୱାଭାବିକ ନହେବାରୁ ଆସନ୍ତା କାଲି ସାଢ଼େ ୧୦ଟା ଯାଏ ମୁଲତବୀ ରହିଲା ବୋଲି ଘୋଷଣା କରିଥିଲେ ।
