Anupambharat News Bureau
ନୂଆଦିଲ୍ଲୀ,୧୬ା୨: ମଧ୍ୟପ୍ରଦେଶର ସମଗ୍ର ରାଜ୍ୟରେ ମଙ୍ଗଳବାର ସକାଳୁ ଶୋକାକୁଳ ବାତାବରଣ ସୃଷ୍ଟି ହୋଇଛି । ପ୍ରତ୍ୟେକ ନଗରୀ ଓ ସହରରେ କେବଳ ଏହି ଦୁଃଖଦ ଦୁର୍ଘଟଣାକୁ ନେଇ ଆଲୋଚନା । ମଧ୍ୟପ୍ରଦେଶର ସିଦ୍ଧି ଜିଲ୍ଲାରେ ଏକ ବସ୍ ହଠାତ୍ ରାସ୍ତାକଡ଼ର ଗଭୀର କେନାଲ ମଧ୍ୟକୁ ଓଲଟି ପଡ଼ିବା ଫଳରେ ୨୦ ଜଣ ମହିଳାଙ୍କ ସମେତ ସମୁଦାୟ ୪୭ ଜଣ ଯାତ୍ରୀଙ୍କ ଘଟଣାସ୍ଥଳରେ ହିଁ ମୃତୁ୍ୟ ଘଟିଛି । ରେୱା ଡିଭିଜିନରେ ଏହି ଦୁର୍ଘଟଣା ଘଟିଛି । ସିଦ୍ଧି ଜିଲ୍ଲା ସଦର ମହକୁମାଠାରୁ ୮୦ କିଲୋମିଟର ଦୂର ପାଟନା ଗ୍ରାମ ନିକଟରେ ଆଜି ସକାଳ ୮.୩୦ ମିନିଟ୍ ସମୟରେ ବନ୍ସାଗର କେନାଲ ମଧ୍ୟକୁ ଯାତ୍ରୀବାହୀ ବସ୍ଟି ନିୟନ୍ତ୍ରଣ ହରାଇ ଓଲଟି ପଡ଼ିଥିଲା । ତେବେ ତୁରନ୍ତ ମାଛ ଜାଲ ପକାଇ ଲୋକମାନଙ୍କୁ ସ୍ଥାନୀୟ ଲୋକମାନେ ଉଦ୍ଧାର କରିଥିଲେ । ୨୪ ଜଣ ପୁରୁଷ, ୨୦ ଜଣ ମହିଳା ଓ ଜଣେ ଶିଶୁଙ୍କୁ ମୃତ ଅବସ୍ଥାରେ ଉଦ୍ଧାର କରାଯାଇଥିଲା । ସେଠାରେ ୭ ଜଣ ବ୍ୟକ୍ତି ପହଁରି ପହଁରି ନିଜ ଜୀବନକୁ ରକ୍ଷା କରିପାରିଛନ୍ତି । ଘଟଣା ସମଗ୍ର ଦେଶରେ ପ୍ରଚାରିତ ହେବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗଭୀର ଶୋକ ପ୍ରକାଶ କରିଛନ୍ତି । ମୃତକଙ୍କ ଉଦ୍ଦେଶ୍ୟରେ ସେମାନଙ୍କୁ ଆତ୍ମୀୟଙ୍କୁ ସହାୟତା ପାଇଁ ୨ ଲକ୍ଷ ଟଙ୍କା ଲେଖାଏଁ ଦିଆଯିବ ବୋଲି ଘୋଷଣା କରିଛନ୍ତି । ସିଦ୍ଧିର ବସ୍ ଦୁର୍ଘଟଣା ଅତ୍ୟନ୍ତ ହୃଦୟବିଦାରକ ବୋଲି ସେ କହିଛନ୍ତି । ସ୍ଥାନୀୟ ପ୍ରଶାସନ ଉଦ୍ଧାର କାର୍ଯ୍ୟରେ ନିୟୋଜିତ ରହିଥିବା ଜଣାଯାଇଛି । ଗୁରୁତର ଆହତଙ୍କ ଉଦ୍ଦେଶ୍ୟରେ ମଧ୍ୟ ୫୦ ହଜାର ଟଙ୍କା ଲେଖାଁଏ ସହାୟତା ଦିଆଯିବ ବୋଲି ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଟ୍ୱିଇଟ୍ କରି ସୂଚନା ଦିଆଯାଇଛି । କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହା ମଧ୍ୟ ସିଦ୍ଧି ବସ୍ ଦୁର୍ଘଟଣାକୁ ଅତ୍ୟନ୍ତ ଦୁର୍ଭାଗ୍ୟଜନକ କହି ଶୋକ ପ୍ରକାଶ କରିଛନ୍ତି । ଅମିତ ଶାହା ଏହା ମଧ୍ୟ କହିଛନ୍ତି ଯେ ମଧ୍ୟ ପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ୍ଙ୍କ ସହିତ ସେ ଯୋଗାଯୋଗ କରିଛନ୍ତି । କେନ୍ଦ୍ର ପକ୍ଷରୁ ଆବଶ୍ୟକ ସହାୟତା ଯୋଗାଇ ଦିଆଯିବ ବୋଲି ମଧ୍ୟ ପ୍ରତିଶ୍ରୁତି ଦେଇଛନ୍ତି । ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ୍ ବନ୍ସାଗର ଡ୍ୟାମ୍ର ଜଳସ୍ରୋତକୁ ସମ୍ପୂର୍ଣ୍ଣ ବନ୍ଦ ରଖିବା ପାଇଁ ନିର୍ଦ୍ଦେଶ ଦେଇଛନ୍ତି । ଫଳରେ ଉଦ୍ଧାର କାର୍ଯ୍ୟ ସହଜସାଧ୍ୟ ହେବ ବୋଲି କହିଛନ୍ତି । ଏସ୍ଡିଆର୍ଏଫ୍
ପକ୍ଷରୁ ଉଦ୍ଧାର କାର୍ଯ୍ୟ ଜାରି ରହିଛି ବୋଲି ଚୌହାନ୍ ସୂଚନା ଦେଇଛନ୍ତି । ଏହା ମଧ୍ୟ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଘୋଷଣା କରିଛନ୍ତି ଯେ ବସ୍ ଦୁର୍ଘଟଣାରେ ମୃତୁ୍ୟବରଣ କରିଥିବା ଆତ୍ମୀୟଙ୍କ ଉଦ୍ଦେଶ୍ୟରେ ୫ ଲକ୍ଷ ଲେଖାଁଏ ପ୍ରଦାନ କରାଯିବ । ଘଟଣା ସ୍ଥଳରେ ଶୋକାକୁଳ ବାତାବରଣ ସୃଷ୍ଟି ହୋଇଛି । ତେବେ ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ ବସ୍ଟି ସକାଳ ସମୟରେ ସମ୍ପୂର୍ଣ୍ଣ କେନାଲ୍ ଭିତରକୁ ବୁଡ଼ିଯାଇଥିଲା । ତେବେ ଜଳସ୍ରୋତକୁ ବନ୍ଦ କରାଯିବା ପରେ ହିଁ ବସ୍ଟି ଦେଖାଯାଇଥିଲା ବୋଲି ସେ କହିଛନ୍ତି ।
