Anupambharat News Bureau
ଭୁବନେଶ୍ୱର, ୩ା୩ (ସ୍ୱତନ୍ତ୍ର ପ୍ରତିନିଧି): ଓଡ଼ିଶାରେ ଦୀର୍ଘ ବର୍ଷ ହେଲା ନବୀନ ପଟ୍ଟନାୟକଙ୍କ ସରକାର କ୍ଷମତା ଉପଭୋଗ କରୁଛି । ବିରୋଧୀ ଯେତେ ଚେଷ୍ଟା କଲେ ବି ନବୀନଙ୍କ ପାଖରେ ପହଞ୍ଚି ପାରୁନାହାନ୍ତି । ବିଜେପି ସହ ମେଣ୍ଟ କରି ରାଜ୍ୟରେ କଂଗ୍ରେସକୁ ହଟାଇଥିବା ବିଜେଡିର ବିଜୟଧାରା ବିଜେପି ସହ ମେଣ୍ଟ ଭାଙ୍ଗିବା ପରେ ବି ଅବ୍ୟାହତ ରହିଛି । ନବୀନଙ୍କର ଏକ ନିର୍ମଳ ଭାବମୂର୍ତ୍ତି ରାଜ୍ୟରେ ବିଜେଡ଼ିକୁ ଦୀର୍ଘ ସମୟ ଧରି କ୍ଷମତାସୀନ କରି ରଖିବାରେ ସହାୟକ ହୋଇଛି । ସେହିପରି, ଗତ କିଛି ବର୍ଷ ମଧ୍ୟରେ ଭିଜିଲାନ୍ସ ସକ୍ରିୟ ହୋଇ କାର୍ଯ୍ୟ କରିବା ଫଳରେ ଦୁର୍ନୀତିଗ୍ରସ୍ତ ଅଧିକାରୀଙ୍କୁ ଧରିବା ଓ ସେମାନଙ୍କ ବିରୋଧରେ ମାମଲା ରୁଜୁ କରିବା ଓ ଦଣ୍ଡବିଧାନର ହାର ବଢିଛି । ହେଲେ ବାସ୍ତବରେ ଦୁର୍ନୀତିର ମାତ୍ରା କମିଛି ନା ବଢୁଛି? ଦୁର୍ନୀତି ନିବାରଣ ପାଇଁ ଗଠିତ ଭିଜିଲାନ୍ସ ଅତୀତରେ ମଧ୍ୟ ଚଢାଉ କରୁଥିଲା । ଲାଞ୍ଚଖୋର୍ ଦୁର୍ନୀତିଗ୍ରସ୍ତ ଅଧିକାରୀ ଧରା ପଡୁଥିଲେ । ବିଳାସପୂର୍ଣ୍ଣ କାର୍ ସହିତ ଦାମୀ ଫ୍ଲାଟ୍, ଆପାର୍ଟମେଣ୍ଟ୍ ଓ ଜମିଜମାର କାଗଜପତ୍ର ଜବତ ହେଉଥିଲା । ଜବତ ନଗଦ ଟଙ୍କାର ପରିମାଣ ଲକ୍ଷେ ଦୁଇ ଲକ୍ଷ ଛୁଇଁଗଲେ ସାଧାରଣ ଲୋକଙ୍କ ଆଖି ଖୋସି ହୋଇ ଯାଉଥିଲା । କିଛି ବର୍ଷ ତଳେ ବେଆଇନ ଉପାୟରେ କୋଟି କୋଟି ଟଙ୍କାର ସମ୍ପତ୍ତି ଠୁଳ ଅଭିଯୋଗରେ ସଚିବାଳୟର ଜଣେ ପିଅନକୁ ଭିଜିଲାନ୍ସ ଧରିଥିଲା । ସେତେବେଳେ ‘କୋଟିପତି ଲାଞ୍ଚୁଆ ପିଅନ ଗିରଫ’ ଖବର ବହୁଚର୍ଚ୍ଚିତ ହୋଇଥିଲା । ଆଜିକାଲି ଏହା ସାଧାରଣ କଥାରେ ପରିଣତ ହେଲାଣି । ଆଇଏଏସ୍, ଆଇଏଫ୍ଏସ୍, ସଚିବ, ବିଡିଓ, ତହସିଲଦାର, ସବ୍-ରେଜିଷ୍ଟ୍ରାର୍, ଯନ୍ତ୍ରୀ, ସୁପର୍ କ୍ଲାସ୍ ଠିକାଦାରଙ୍କ କଥା ଛାଡ଼ନ୍ତୁ ଦୁଧିଆଳି ବିଭାଗରେ କାର୍ଯ୍ୟରତ ତଳିଆ କର୍ମଚାରୀଙ୍କ ଘରୁ ବିପୁଳ ଆୟ ବହିର୍ଭୂତ ସମ୍ପତ୍ତି ଠାବ ହେଉଛି । ଏପରିକି ପିଅନ, କିରାଣୀ ଆଦିଙ୍କ ଘରୁ କୋଟିଏରୁ ଅଧିକ ପରିମାଣର ବେଆଇନ ସମ୍ପତ୍ତିର ହିସାବ ଫର୍ଦ୍ଦ ଜବତ ହେଉଛି । ତଳତଳିଆ ଗର୍ବର କର୍ମଚାରୀ ବା ତଥାକଥିତ ଚିଙ୍ଗୁଡ଼ିମାନେ ଭିତରେ ଭିତରେ ବିଶାଳ ତିମି ପାଲଟି ଯାଉଛନ୍ତି । ବଡ଼ବଡ଼ିଆ ଅଫିସର୍ଙ୍କ କ୍ଷମତା ପରିସର ଅଧିକ ଥିବାରୁ ଦୁର୍ନୀତିର ସୁଯୋଗ ବି ଅଧିକ ଥାଏ । ହେଲେ ଏବେ କନିଷ୍ଠ ଯନ୍ତ୍ରୀ, ଷ୍ଟେନୋ, ଟାଇପିଷ୍ଟ, ଡିଲିଂ ଆସିଷ୍ଟାଣ୍ଟ ଓ ପିଅନ ଘରୁ ବି କୋଟିଏ ବାହାରୁଛି । ଗତବର୍ଷ ନଭେମ୍ବର୍ରେ ଭିଜିଲାନ୍ସ ଗୋଟିଏ ବଡ଼ମାଛ ଧରିଥିଲା । ଆଇଏଫ୍ଏସ୍ ଅଭୟକାନ୍ତ ପାଠକ ଓ ତାଙ୍କ ପୁଅ ଠାରୁ ଜବତ ଆୟ ବହିର୍ଭୂତ ସମ୍ପତ୍ତିର ପରିମାଣ ନଗଦ ଟଙ୍କାକୁ ମିଶାଇ ପ୍ରାୟ ୨୦ କୋଟି ଛୁଇଁଥିଲା । ଗଲା ଫେବୃୟାରୀରେ ଜଣେ ସହରାଞ୍ଚଳ ଯୋଜନା ଅଧିକାରୀଙ୍କ ଠାରୁ ଠାବ ହେଲା କୋଟିଏରୁ ଅଧିକ ମୂଲ୍ୟର ସମ୍ପତ୍ତି । ମାର୍ଚ୍ଚ ୨ରେ ଗଜପତି ଜିଲ୍ଲା ରାୟଗଡ଼ ବ୍ଲକ୍ର କନିଷ୍ଠ ଯନ୍ତ୍ରୀଙ୍କ ଘରୁ ନଗଦ ପ୍ରାୟ ୬୧ ଲକ୍ଷ ସମେତ ମୋଟ ୨କୋଟି ୧୪ ଲକ୍ଷ ଟଙ୍କାର ଆୟ ବହିର୍ଭୁତ ସମ୍ପତ୍ତିର କାଗଜପତ୍ର ଜବତ କରିଥିଲା ଭିଜିଲାନ୍ସ । ଚଢାଉ କଥା ଛାଡନ୍ତୁ, ଲାଞ୍ଚ ନେବା ବେଳେ ହାତାହାତି ଧରା ପଡିବା ବା ଟ୍ରାପିଂ ମାମଲାରେ ବି ଲାଞ୍ଚୁଆ ଅଧିକାରୀମାନଙ୍କ କଳା କାର୍ନାମା ବେଶ୍ ଉଦ୍ବେଗଜନକ । ଆଗେ ଫାଇଲ୍କୁ ଉପରିସ୍ଥ ଅଧିକାରୀଙ୍କ ଟେବୁଲ୍କୁ ନେବା ପାଇଁ ପିଅନ, କିରାଣୀ ବା ଷ୍ଟେନୋକୁ ଶହେ ଦୁଇଶହ ଟଙ୍କା ସନ୍ତର୍ପଣରେ ଧରାଇ ଦିଆଯାଉଥିଲା । ଏହାକୁ ପାନଖିଆ ଖର୍ଚ୍ଚ କୁହା ଯାଉଥିଲା । ହେଲେ ଏବେ ଲାଞ୍ଚ ଦିଆନିଆ, ପିସି କାରବାର ଯେମିତି ଧରାବନ୍ଧା ହୋଇ ଗଲାଣି । ହାତାହାତି ଉତ୍କୋଚର ପରିମାଣ ସ୍ଥଳ ବିଶେଷରେ ଲକ୍ଷେ ଟପି ଯାଉଛି । ସହରାଞ୍ଚଳରେ ଗୃହନିର୍ମାଣ ନକ୍ସା ଅନୁମୋଦନ, ଜମି କିସମ ପରିବର୍ତ୍ତନ, ଖଣିଖାଦାନରୁ ବେଆଇନ ଖନନ ଓ ବାଲି ପଥର ମୋରମ ଚୋରା ଚାଲାଣରେ ସହାୟତା ଓ ବିନା ତନଖିରେ ଋଣ କିମ୍ବା ଆର୍ଥିକ ସହାୟତା ପ୍ରଦାନ ବଦଳରେ ଅଧିକାରୀମାନେ ମୋଟା ଅଙ୍କର ଲାଞ୍ଚ ନେଉଛନ୍ତି ।
ଅନ୍ଲାଇନ୍ ବ୍ୟବସ୍ଥା ଯୋଗୁ ଟେଣ୍ଡର୍ ପ୍ରକ୍ରିୟାରେ ସ୍ୱଚ୍ଛତା ବଢିଥିଲେ ବି ଜାଲ୍ ସାର୍ଟିିଫିକେଟ୍ରେ ନିଯୁକ୍ତି, ମଦ ଓ ଡ୍ରଗ୍ ଲାଇସେନ୍ସ, ଅଗ୍ନି ସୁରକ୍ଷା ପ୍ରମାଣପତ୍ର, ବସ୍ ରୁଟ୍ ପରମିଟ୍ ପ୍ରଦାନ ଆଦି କ୍ଷେତ୍ରରେ ଦୁର୍ନୀତି ଶୀର୍ଷ ସ୍ତରରେ ପହଞ୍ଚଛି । ରାଜ୍ୟ ସରକାରଙ୍କ ଦୁର୍ନୀତି ବିରୋଧୀ ଆସ୍ପାଳନ ସହ ଦୁର୍ନୀତି ନିବାରଣ ସପ୍ତାହ ପାଳନ ଓ ଲାଞ୍ଚ ନ ନେବା ପାଇଁ ଅଧିକାରୀ ଓ କର୍ମଚାରୀଙ୍କ ଶପଥ ଗ୍ରହଣର ପ୍ରହସନ ସତ୍ତେ୍ୱ ରାଜ୍ୟରେ ବ୍ୟାପକ ପିସି ଓ ଲାଞ୍ଚ କାରବାର ଚାଲିଛି । ଯାହାକୁ ଧରିଲେ ଯଦି ଅତି କମ୍ରେ କୋଟିଏ ଠାବ ହେଉଛି ତେବେ ଦୁର୍ନୀତି, ଲାଞ୍ଚ କାରବାର କମିଲା କେମିତି? ସରକାର ନିଜ ଭାବମୂର୍ତ୍ତି ରକ୍ଷା ପାଇଁ ଭିଜିଲାନ୍ସକୁ ବ୍ୟବହାର କରୁଛନ୍ତି ବୋଲି ବିରୋଧୀ ପାଟି କରୁଛନ୍ତି । ବାସ୍ତବ କ୍ଷେତ୍ରରେ ମଧ୍ୟ, ସରକାରୀ କଳର ତଳସ୍ତରରୁ ଉପର ସ୍ତର ପର୍ଯ୍ୟନ୍ତ ଦୁର୍ନୀତିର ଚେର ଗଭୀରକୁ ମାଡ଼ିବାରେ ଲାଗିଛି ।
