Anupambharat News Bureau
ଆବୁଧାବ,୩୦ା୭: ସଂଯୁକ୍ତ ଆରବ ଇମିରାଟ (ୟୁଏଇ)ରେ ପ୍ରବଳ ବର୍ଷା ଜନିତ ବନ୍ୟାରେ ଅତିକମ୍ରେ ୭ ଜଣ ବ୍ୟକ୍ତିଙ୍କ ମୃତୁ୍ୟ ଘଟିଥିବା ବେଳେ ଅନେକ ଲୋକଙ୍କ ନିଖୋଜ ଥିବା ଘଟଣା ଚାଞ୍ଚଲ୍ୟ ସୃଷ୍ଟି କରିଛି । ବହୁ ଅଞ୍ଚଳରେ ବିଭିନ୍ନ ନଗର ଓ ସହର ଗୁଡିକୁ ଯୋଗାଯୋଗ କରୁଥିବା ରାସ୍ତାଗୁଡିକ ଧୋଇ ହୋଇଯାଇଛି ଓ ଅନ୍ୟ କେତେକ ଅଞ୍ଚଳରେ ବାସଗୃହ ସମେତ ବହୁ ସଂଖ୍ୟକ କାର୍ ବନ୍ୟା ଜଳରେ ବୁଡି ରହିଥିବା ଭୟଙ୍କର ଚିତ୍ର ଦେଖିବାକୁ ମିଳିଛି । ବିଶେଷ କରି ସାରଜୈହ ଓ ଖୁଜେରିଆ ଅଞ୍ଚଳ ଅଧିକ କ୍ଷତିଗ୍ରସ୍ତ ହୋଇଛି । ଉକ୍ତ ଅଞ୍ଚଳଗୁଡିକ ସମ୍ପୂର୍ଣ୍ଣ ଜଳାର୍ଣ୍ଣବ ହୋଇପଡିିଛି । ଭୂତଳକୋଠା, ବିଭିନ୍ନ ସପିଂମଲ ଓ କାରଖାନା ମାନଙ୍କରେ ବନ୍ୟାଜଳ ପ୍ରବେଶ କରିବା ଯୋଗୁଁ ସାଧାରଣ ଲୋକଙ୍କ ସ୍ଥିତି ଅତ୍ୟନ୍ତ ଯନ୍ତ୍ରଣାଦାୟକ ହୋଇପଡିଛି । ଉଦ୍ଧାର କାର୍ଯ୍ୟ ଜାରି ରହିଥିବା ବେଳେ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଉଛି । କିନ୍ତୁ ବହୁ ଲୋକ ଏଯାବତ ନିଖୋଜ ଥିବା ଘଟଣା ଆଶଙ୍କା ସୃଷ୍ଟି କରିଛି । ଲୋକଙ୍କୁ ଉଦ୍ଧାର କରି ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଉଛି । ଏଥିଲାଗି ୫୦ଟି ସ୍ୱତନ୍ତ୍ର ବସ୍କୁ ନିୟୋଜିତ କରାଯାଇଛି । ସେହିପରି ଦୁବାଇ ଓ ଆବୁଧାବିରେ ଏହି ଦୁଇ ଅଞ୍ଚଳ ତୁଳନାରେ କମ୍ ବର୍ଷା ହୋଇଛି । ଅନେକ ଲୋକଙ୍କୁ ହୋଟେଲ ଓ ବିଭିନ୍ନ ସ୍ଥାନରେ ରଖାଯାଇଛି । ଫୁଜେରିୟାର ଜାତୀୟ ସଡ଼କ ଉପରେ ଅଟକି ରହିଥିବା ବହୁ ସଂଖ୍ୟକ ମୋଟର କାର୍ରେ ପାଣି ପଶିଯିବା ଫଳରେ ତାହା ବୁଡିଯାଇଥିବା ଅବସ୍ଥାରେ ରହିଛି । ସହରକୁ ପ୍ରବେଶ କରୁଥିବା ପଥ ଗୁଡିକ ମଧ୍ୟ ପାଣିରେ ଧୋଇହୋଇଯିବା ଫଳରେ ଉକ୍ତ ଅଞ୍ଚଳଗୁଡିକୁ ଯୋଗାଯୋଗ ସମ୍ପୂର୍ଣ୍ଣ ବିଚ୍ଛିନ୍ନ ହୋଇପଡିଛି । ଉଦ୍ଧାରକାରୀ ଦଳ ପ୍ରାୟ ୯୦୦ ଲୋକଙ୍କୁ ଉଦ୍ଧାର କରିଛନ୍ତି । ଶାରଜାହ ଓ ଫୁଜେରିୟାରେ ୩,୮୯୭ ଲୋକଙ୍କୁ ଉଦ୍ଧାର କରି ଅସ୍ଥାୟୀ ରୂପେ ତିଆରି ହୋଇଥିବା ଶିବିରରେ ରଖାଯାଇଛି । ସୂଚନାମୁତାବକ ୟୁଏଇର ପୂର୍ବାଞ୍ଚଳରେ ବର୍ଷା ଯୋଗୁ ଅଚାନକ ବନ୍ୟା ପାଣି ମାଡି ଆସିଛି । ଏହି କାରଣରୁ ଲୋକେ ପ୍ରବାଭିତ ହୋଇଥିବା ବେଳେ ସେମାନଙ୍କୁ ସ୍ଥାନାନ୍ତର କରିବା ପାଇଁ ନିୟୋଜିତ ଥିବା ସେନା ଗାଡିଗୁଡିକ ମଧ୍ୟ କ୍ଷତିଗ୍ରସ୍ତ ହୋଇଛି । ବର୍ଷା ପରେ ବନ୍ୟା ଯୋଗୁଁ ୭ ଜଣଙ୍କର ମୃତୁ୍ୟ ହୋଇଥିବା ସରକାରୀ ଭାବେ ସୂଚନା ଦିଆଯାଇଛି ।
