Anupambharat News Bureau
ରାଞ୍ଚି: ବିହାର ଓ ଝାରଖଣ୍ଡରେ ଆରଜେଡିର ଲଜ୍ଜାଜନକ ପରାଜୟ ପରେ ଜେଲ୍ରେ ଥିବା ଏହାର ପ୍ରତିଷ୍ଠାତା ଲାଲୁ ପ୍ରସାଦ କିଛି ବି ଖାଇ ନଥିଲେ । ତେବେ ଦୁଇ ଦିନ ଉପାସ ରହିବା ପରେ ଗତକାଲି ରାତିରେ ଲାଲୁ ଖାଦ୍ୟ ଗ୍ରହଣ କରିଛନ୍ତି । ସାଧାରଣ ନିର୍ବାଚନରେ ଆରଜେଡି ନୈରାଶ୍ୟଜନକ ପ୍ରଦର୍ଶନ ଭୋଟ୍ ଗଣତି ସମୟରେ ସାମ୍ନାକୁ ଆସିଥିଲା । ଏହାପରେ ଲାଲୁ ମନ ଦୁଃଖ କରି ଖାଇବା ଛାଡ଼ି ଦେଇଥିଲେ । ୨୩ ଓ ୨୪ ତାରିଖରେ କିଛି ଖାଇ ନଥିବା ଲାଲୁଙ୍କ ସ୍ୱ୍ୱାସ୍ଥ୍ୟାବସ୍ଥା ବିଗିଡ଼ିବା ଆରମ୍ଭ ହୋଇଥିଲା । ଡାକ୍ତରମାନେ ତାଙ୍କ ସ୍ୱାସ୍ଥ୍ୟାବସ୍ଥାକୁ ନେଇ ଚିନ୍ତା ପ୍ରକଟ କରିବାରୁ ଲାଲୁ ଗତକାଲି ଖାଇଛନ୍ତି । ଲାଲୁ ଦୁଇ ଦିନ ହେଲା ଖାଇ ନଥିବାରୁ କୌଣସି ମେଡିସିନ୍ ମଧ୍ୟ ଖାଇ ପାରୁ ନଥିଲେ । ଫଳରେ ତାଙ୍କ ସ୍ୱାସ୍ଥ୍ୟ ବିଗିଡ଼ି ଯାଇଥିଲା ବୋଲି ତାଙ୍କର ଚିକିତ୍ସା କରୁଥିବା ଟିମ୍ର ମୁଖ୍ୟ ଡା. ଉମେଶ ପ୍ରସାଦ କହିଛନ୍ତି । ଉଚ୍ଚ ରକ୍ତଚାପ, ମଧୁମେହ ଓ ଦୁର୍ବଳ କିଡ୍ନୀ ଭଳି ରୋଗରେ ଆକ୍ରାନ୍ତ ଲାଲୁ ପ୍ରସାଦ ଜେଲ୍ ଦଣ୍ଡ ପାଇବା ପରେ ୨୦୧୭ ଡିସେମ୍ବର ମାସରୁ ରାଞ୍ଚିର ରିମ୍ସ ହସ୍ପିଟାଲ୍ରେ ଚିକିତ୍ସିତ ହେଉଛନ୍ତି । ସାଧାରଣ ନିର୍ବାଚନରେ ଆରଜେଡି ଉଭୟ ବିହାର ଓ ଝାରଖଣ୍ଡରେ ପ୍ରାର୍ଥୀ ଦେଇଥିଲେ ହେଁ, ଉଭୟ ରାଜ୍ୟରେ ଦଳ ଖାତା ଖୋଲି ପାରି ନଥିଲା ।
