Anupambharat News Bureau
ଭୁବନେଶ୍ୱର,୨ ।୬(ଅନୁପମ ମିଡିଆ): ଚଳିତ ନିର୍ବାଚନରେ ଦୁଇଟି ବିଧାନସଭା ଆସନରୁ ଲଢ଼ିଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରବିବାର ବିଜେପୁର ଆସନରୁ ଇସ୍ତଫା ଦେଇଛନ୍ତି । ଫଳରେ ନବୀନ କେଉଁ ଆସନ ଛାଡିବେ ତାହାକୁ ନେଇ ଚାଲିଥିବା ଚର୍ଚ୍ଚାରେ ବିରାମ ଦେଇଛନ୍ତି । ବିଜେପୁରରୁ ଇସ୍ତଫା ସମ୍ପର୍କିତ ପତ୍ର ବାଚସ୍ପତି ସୂର୍ଯ୍ୟ ନାରାୟଣ ପାତ୍ରଙ୍କ ନିକଟକୁ ପଠେଇ ଦେଇଛନ୍ତି । ସୂଚନା ଯୋଗ୍ୟ ଯେ, ମୁଖ୍ୟମନ୍ତ୍ରୀ ଗତ ଚାରି ପାଳିରେ ଗୋଟିଏ ହିଞ୍ଜିଳି ଆସନରୁ ହିଁ ଲଢ଼ିଥିଲେ । ତେବେ ପ୍ରଥମ ଥର ପାଇଁ ସେ ଦୁଇଟି ଆସନରେ ଚଳିତ ନିର୍ବାଚନରେ ଲଢ଼ିଥିଲେ ।
ପୂର୍ବ ହିଞ୍ଜିଳି ସମେତ ବିଜେପୁରରେ ନବୀନ ଚଳିତ ନିର୍ବାଚନରେ ପ୍ରାର୍ଥୀ ହୋଇଥିଲେ । ଉଭୟ ଆସନରୁ ସେ ବିପୁଳ ଭୋଟ ବ୍ୟବଧାନରେ ବିଜୟୀ ହୋଇଥିଲେ । ଏହା ଫଳରେ ନବୀ ନକେଉଁ ଆସନ ଛାଡ଼ିବେ ତାକୁ ନେଇ ଚାଲିଥିବା ବ୍ୟାପକ ଚର୍ଚ୍ଚା । ତେବେ ଆଜି ନବୀନ ହିଞ୍ଜିଳି ଆସନକୁ ରଖିବା ସହ ବିଜେପୁରରୁ ଇସ୍ତଫା ଦେଇଛନ୍ତି । ଅପରପକ୍ଷରେ ବିଜେପୁର ବାସୀ ତାଙ୍କୁ ଭଲ ପାଇବା ଏବଂ ସମର୍ଥନ ଦେଇଥିବାରୁ ସେମାନଙ୍କୁ ନିଜର କୃତଜ୍ଞତା ଜଣାଇଛନ୍ତି । ଖବର ନେବାରେ ଜଣାଯାଏ ଯେ, ନିର୍ବାଚନ ହୋଇପାରିନଥିବା କେନ୍ଦ୍ରାପଡ଼ା ଜିଲ୍ଲାର ପାଟକୁରା ବିଧାନସଭା ନିର୍ବାଚନ ମଣ୍ଡଳୀ ଏବଂ ବିଜେପୁର ବିଧାନସଭା ନିର୍ବାଚନ ମଣ୍ଡଳୀର ନିର୍ବାଚନ ଏକା ସଙ୍ଗରେ ହୋଇପାରେ ବୋଲି ବିଶ୍ୱସ୍ତ ସୂତ୍ରରୁ ଜଣାପଡ଼ିଛି । ମୁଖ୍ୟମନ୍ତ୍ରୀ ବିଜେପୁର ଆସନ ଛାଡ଼ିଥିବା ସମ୍ପର୍କରେ ଆସନ୍ତା କାଲି ରାଜ୍ୟ ନିର୍ବାଚନ ଅଧିକାରୀଙ୍କୁ ବିଧିବଦ୍ଧ ଭାବେ ଜଣାଇବେ । ଗତ ତିନି ଦିନ ତଳେ ମୁଖ୍ୟମନ୍ତ୍ରୀ ବିଜେପୁର ଲାଗି ସ୍ୱତନ୍ତ୍ର ପ୍ୟାକେଜ୍ ଘୋଷଣା କରିବା ପରେ ଏହି ଆସନକୁ ଛାଡିବା ନେଇ ବେଶ୍ କଳ୍ପନାଜଳ୍ପନା ପ୍ରକାଶ ପାଇଥିଲା । ଏଠାରେ ଉଲ୍ଲେଖଯୋଗ୍ୟ ଯେ ପଞ୍ଚମ ଥର ପାଇଁ ଶପଥ ନେବା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କାଳିଆ ଯୋଜନାରେ ଅଧିକ ଚାଷୀ ପରବାରକୁ ସାମିଲ କରିବା ସହ ମହିଳା ଏସଏଚଜି ଗ୍ରୁପଙ୍କୁ ୧ ହଜାର କୋଟି ଟଙ୍କାର କାମ ଦେବା ପାଇଁ ଅନୁମୋଦନ କରିବା ପରେ ଗୂରୁବାର ବିଜେପୁର ଲାଗି ନିର୍ବାଚନରେ ଦେଇଥିବା ପ୍ରତିଶ୍ରୁତିକୁ କାର୍ଯ୍ୟକାରୀ କରିବା ଲାଗି ପ୍ୟାକେଜ ଘୋଷଣା କରିଥିଲେ ।
