Anupambharat News Bureau
କେନ୍ଦୁଝର, ୬ା୬(ଅନୁପମ ମିଡିଆ): କେନ୍ଦୁଝରରେ ଜଣେ ମଦ୍ୟପଙ୍କ ଉନ୍ମକ୍ତ କାଣ୍ଡ ଦେଖିବାକୁ ମିଳିଛି । ନିଶାଶକ୍ତ ଯୁବକ ଜଣକ ଟାଙ୍ଗିଆରେ ହାଣି ଦୁଇଭାଇଙ୍କୁ ବିଭସି ଭାବେ ହତ୍ୟା କରିଥିବାବେଳେ ଗାଁ ଲୋକେ ହତ୍ୟାକାରୀକୁ କାବୁ କରି ପୁଲିସର ଜିମା ଦେଇଥିବା ଜଣାପଡିଛି । ମିଳିଥିବା ସୂଚନା ଅନୁସାରେ, ବାମେବାରୀ ଥାନା କାଶିଆ ଗ୍ରାମ ନାଏକ ସାହିର ଉଦ୍ଧବ ନାଏକ ଜଙ୍ଗଲରୁ କାଠ ନେଇ ଫେରିବା ପରେ ପ୍ରଚୁର ମଦ୍ୟପାନ କରି ନିଶାଶକ୍ତ ଆବସ୍ଥାରେ ସେହି ଗାଁର ସମ୍ଭାର ନାଏକଙ୍କ ଘରକୁ ଯାଇଥିଲା । ସେଠାରେ ସମ୍ଭାର ଓ ଉଦ୍ଧବଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା । ଏଥିରେ ଉଦ୍ଧବ ଉତ୍କ୍ଷିପ୍ତ ହୋଇ ସମ୍ଭାର ନାଏକ(୬୦)ଙ୍କୁ ଟାଙ୍ଗିଆରେ ଅତି ବିଭତ୍ସ ଭାବରେ ହାଣି ପକାଇଥିଲା । ସମ୍ଭାର ସେହିଠାରେ ହିଁ ଛଟପଟ ହୋଇ ମୃତୁ୍ୟବରଣ କରିଥିଲା । ଭାଇକୁ ଏଭଳି ମରଣାନ୍ତକ ଆକ୍ରମଣ ହେଉଥିବା ଦେଖି ସମ୍ଭାରର ସାନଭାଇ କରମୁ ନାଏକ(୫୫) ଉଦ୍ଧବକୁ ପ୍ରତିବାଦ କରିଥିଲା । ଫଳରେ କରମୁଙ୍କୁ ମଧ୍ୟ ଉଦ୍ଧବ ଟାଙ୍ଗିଆରେ ହାଣି ଦେବାରୁ ସେ ସେଠାରେ ପଡି ଯାଇଥିଲେ । ଗୁରୁତର ଅବସ୍ଥାରେ ଗାଁ ଲୋକେ କରମୁକୁ କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟକୁ ଆଣିଥିଲେ ମଧ୍ୟ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଗାଁ ଲୋକେ ହତ୍ୟାକାରୀ ଉଦ୍ଧବଙ୍କୁ କାବୁ କରି ପୁଲିସର ଜିମା ଦେଇଥିଲେ । ପୁଲିସ ଉଦ୍ଧବକୁ ଧରି ଝୁମ୍ପୁରା ଡାକ୍ତରଖାନା ଆଣିବାବେଳେ ସେ ନିଶାଶକ୍ତ ଅବସ୍ଥାରେ ସମସ୍ତଙ୍କୁ ମାରି ଗୋଡାଇଥିଲା । ତାକୁ ନିଶା ଔଷଧ ଦେଇ ଶୁଆଇ ଦିଆଯାଇଥିଲା । ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହେ ଜବତ କରି ବ୍ୟବଛେଦ ପାଇଁ ପଠାଇଥିବାବେଳେ ହତ୍ୟାକାଣ୍ଡର ପ୍ରକୃତ କାରଣ ଜଣାପଡିନାହିଁ ।
