Anupambharat News Bureau
ଭଞ୍ଜନଗର,୧୧ ।୫(ଅନୁପମ ମିଡ଼ିଆ) : ଅନ୍ୟର ମୋବାଇଲ ନେଇ ଜଣକୁ ପ୍ରେମ ନିବେଦନ କରିବା ଶେଷରେ ମୋବାଇଲଧାରୀଙ୍କୁ ମହଙ୍ଗା ପଡ଼ିଲା । ମୋବାଇଲ ପ୍ରେମରୁ ଘଟିଲା ଅଘଟଣ । ମୋବାଇଲ ମାଗିନେଇ ପ୍ରେମ ନିବେଦନ କଲା ଜଣେ ହେଲେ ଏହି କାରଣରୁ ନିର୍ଦ୍ଧୁମ ମାଡ଼ ଖାଇଲା ଆଉଜଣେ । ଝିଅ ପରିବାରର ସଂଗଠିତ ଆକ୍ରମଣରେ ପ୍ରକୃତ ମୋବାଇଲଧାରୀ ଗୁରୁତର ଆହାତ ହୋଇ ସଂଜ୍ଞାହୀନ ଅବସ୍ଥାରେ ଏବେ ମେଡିକାଲରେ ଚିକିତ୍ସାଧୀନ ରହିଛି । ଏଭଳି ଏକ ଅଭାବନୀୟ ଘଟଣା ଗଞ୍ଜାମ ଜିଲ୍ଲା ତାରାସିଂ ଥାନା ଅନ୍ତର୍ଗତ ଗାଲେରୀ ଫାଣ୍ଡିର ବଦାଙ୍ଗୀ ହରିଜନ ସାହିରେ ଦେଖିବାକୁ ମିଳିଛି ।
ମିଳିଥିବା ସୁଚନା ପ୍ରକାରେ, ତାରାସିଂ ଥାନା ଅନ୍ତର୍ଗତ ବଦାଙ୍ଗୀ ହରିଜନ ସାହିର ସୁଜନ ନାଇକ ନାମକ ଜଣେ ୨୪ ବର୍ଷୀୟ ଯୁବକକୁ ସେହି ସାହିର ତା’ର ଅନ୍ୟତମ ସାଙ୍ଗ ଜଟିଆ ନାଇକ ମୋବାଇଲ୍ ଫୋନ୍ କିଛି ସମୟ ପାଇଁ ମାଗିଥିଲା । ଆଉ ସାଙ୍ଗଙ୍କ କଥାକୁ ଭାଙ୍ଗିନପାରି ସୁଜନ ଜଟିଆକୁ ତାର ମୋବାଇଲ ଦେଇଥିଲେ ।
ସୁଜନର ମୋବାଇଲରୁ ଜଟିଆ ସେହି ହରିଜନ ସାହିର ଜଣେ ନାବାଳିକା କନ୍ୟାକୁ ପ୍ରେମ ନିବେଦନ କରିବାପରେ ସୁଜନକୁ ତା’ର ମୋବାଇଲ ଫେରାଇ ଦେଇଥିଲା । ଏହି ଘଟଣାରେ ନାବାଳିକା ଜଣକ ପରିବାର ଲୋକଙ୍କୁ ଜଣାଇବାପରେ ଝିଅଘର ପରିବାର ସେହି ମୋବାଇଲ୍ ନମ୍ବରକୁ ଡାଏଲ୍ କରି ତାହା ସୁଜନର ମୋବାଇଲ ବୋଲି ଜାଣିପାରିଥିଲେ । ଏଥିରେ ଉତ୍କ୍ଷିପ୍ତ ହୋଇ ଝିଅ ପରିବାରର ୭ଜଣ ବ୍ୟକ୍ତିବିଶେଷ ସୁଜନକୁ ଖୋଜାଖୋଜି କରିଥିଲେ । ପରେ ସୁଜନ ବଦାଙ୍ଗୀ ଛକରେ ଥିବା ଜାଣିପାରି ସେଠାକୁ ଆସି ବାଦାଙ୍ଗୀ ଛକରୁ ହରିଜନ ସାହିଯାଏଁ ସୁଜନକୁ ପିଟି ପିଟି ଘୋଷାଡି ନେଇଥିଲେ । ନିଜର ଦୋଷ କ’ଣ ଜାଣିବା ପୂର୍ବରୁ ସୁଜନ ମାଡ଼ ଖାଇ ଲହୁ ଲୁହାଣ ହୋଇସାରିଥିଲା । ହରିଜନ ସାହି ଛକରେ ପ୍ରବଳ ମାଡ କାରଣରୁ ସୁଜନ ସଂଜ୍ଞାହୀନ ହୋଇପଡିବାରୁ ନାବାଳିକାର ପରିବାର ଲୋକମାନେ ତାକୁ ସେଠାରେ ଛାଡିଦେଇ ଚାଲିଯାଇଥିଲେ । ସଂଜ୍ଞାହୀନ ଅବସ୍ଥାରେ ସୁଜନକୁ ପରିବାର ଲୋକମାନେ ଗୁରୁବାର ସନ୍ଧ୍ୟାରେ ଭଞ୍ଜନଗର ମେଡିକାଲରେ ଭର୍ତ୍ତି କରିଥିଲେ । ଦୁଇ ଦିନ ପରେ ଅର୍ଥାତ୍ ଶନିବାର ସୁଜନର ଚେତା ଫେରିବାପରେ ଘଟଣା ଜଣାପଡ଼ିଥିଲା । ଏହାପରେ ସୁଜନର ମାଆ ସୁକାନ୍ତି ନାଇକ ଗାଲେରୀ ଫାଣ୍ଡିରେ ଏତଲା ଦେଇଥିଲେ । ଥାନା କେଶ ନମ୍ବର- ୬୮/୧୯ ପ୍ରକାରେ ଏକ ମାମଲା ରୁଜୁ କରାଯାଇ ଫାଣ୍ଡି ଅଧିକାରୀ ଅଶୋକ ତ୍ରିପାଠୀ ଘଟଣା ସମ୍ପର୍କରେ ଅନୁସନ୍ଧାନ ଆରମ୍ଭ କରିଛନ୍ତି ।
