Anupambharat News Bureau
କବିସୂର୍ଯ୍ୟନଗର,୧୪ା୬(ଅନୁପମମିଡ଼ିଆ): ବାପାର ନିର୍ଯାତନା ଅସହ୍ୟ ହେବାରୁ ଶେଷରେ ଦୁଇ ଝିଅ ଆତ୍ମହତ୍ୟା ଭଳି ଚରମପନ୍ଥା ଆପଣାଇଥିବା ଘଟଣା ଆଲୋଡ଼ନ ସୃଷ୍ଟି କରିଛି । ଏଭଳି ଲୋମଟାଙ୍କୁରା ଘଟଣା ଗଞ୍ଜାମ ଜିଲ୍ଲାର କବିସୂର୍ଯ୍ୟନଗର ଥାନାର ଗୁଡ଼ିଆଳିରେ ଘଟିଛି ।
ମିଳିଥିବା ସୂଚନାନୁଯାୟୀ ଗୁଡ଼ିଆଳର ପଦ୍ମନାଭ ଭୂୟାଁଙ୍କ ଦୁଇ ଝିଅ ଦୀପା(୧୬) ଏବଂ ଗୀତା (୧୨) ନିଜ ଘରେ ବିଷ ପିଇ ଆତ୍ମହତ୍ୟା କରିଥିଲେ । ଆଜି ସକାଳେ ସେମାନଙ୍କ ମୃତଦେହ ଉଦ୍ଧାର କରାଯାଇଥିଲା । କବିସୂର୍ଯ୍ୟନଗର ଥାନା ପୋଲିସ ଘଟଣା ସ୍ଥଳରେ ପହଞ୍ଚି ଦୁହିଁଙ୍କ ଶବ ଉଦ୍ଧାର କରି ଆସିକା ଏବଂ ବ୍ରହ୍ମପୁର ବଡ଼ମେଡିକାଲକୁ ପଠାଇଥିଲେ । ତେବେ ଦୁଇ ଝିଅ ଏଭଳି ହଠାତ୍ ଆତ୍ମହତ୍ୟା ଘଟଣାକୁ ନେଇ ଗ୍ରାମରେ ଚର୍ଚ୍ଚା ହେଉଛି ଯେ, ବାପା ପଦ୍ମନାଭ ସେମାନଙ୍କୁ ନିର୍ଯାତନା ଦେଇ ଆସୁଥିଲା । ଏପରିକି ଜନ୍ମକଲା ବାପା ଦୁଇ ଝିଅକୁ କୌଣସି ସ୍ଥାନରେ ବିକ୍ରି କରିବାକୁ ଉଦ୍ୟମ କରିଥିଲା । ଏନେଇ ସେମାନେ ଗ୍ରାମର କିଛି ଲୋକଙ୍କ ଆଗରେ ପ୍ରକାଶ କରିଥିଲେ । ଏହାକୁ ନେଇ ପଦ୍ମନାଭ ସେମାନଙ୍କୁ ନିର୍ଧୁମ ପିଟିବା ସହ ଦୈନିକ ଦୁଇ ଶହ ରୋଜଗାର କରି ଆଣ ତାପରେ ଘରେ ରହିବ ବୋଲି ତାଗିଦ କରିଥିଲା । ଫଳରେ ନିରୁପାୟ ହୋଇ ବଡ଼ ଝିଅ ଏକ ମିକ୍ସର ଫେକଫି୍ରରେ କାର୍ଯ୍ୟ କରୁଥିଲା । ତେବେ ଦିନକୁ ଦିନ ବାପାର ନିର୍ଯାତନା ଅସହ୍ୟ ହେବାରୁ ଶେଷରେ ଦୁଇ ଝିଅ ଏଭଳି ଚରମ ପଦକ୍ଷେପ ଆପଣାଇଥିବା
କୁହାଯାଇଛି । ତେବେ ଏନେଇ ଥାନରେ ଅଭିଯୋଗ ହୋଇନଥିବା ଆଇଆଇସି ତପନ କୁମାର ପାଢ଼ୀ ପ୍ରକାଶ କରିଛନ୍ତି । ପ୍ରକାଶ ଥାଉକି ପଦ୍ମନାଭଙ୍କ ପ୍ରଥମ ପତ୍ନୀଙ୍କ ଔରସରୁ ଦୁଇ ଝିଅ ଜନ୍ମ ହୋଇଥିଲେ । ତେବେ ପ୍ରଥମ ପତ୍ନୀଙ୍କ ଦେହାନ୍ତ ପରେ ସେ ଦ୍ୱିତୀୟ ବିବାହ କରିଛନ୍ତି ।
