Anupambharat News Bureau
ଭୁବନେଶ୍ୱର, ୨୮ା୬ (ଅନୁପମ ମିଡିଆ) : ରାଜ୍ୟ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ ୨୦୧୯-୨୦ ବର୍ଷ ପାଇଁ ୧ ଲକ୍ଷ ୩୯ ହଜାର କୋଟି ଟଙ୍କାର ପୂର୍ଣ୍ଣାଙ୍ଗ ବଜେଟ ବିଧାନସଭାରେ ଉପସ୍ଥାପନ କରିଛନ୍ତି । ଏହି ବଜେଟ୍ରେ ପୁଞ୍ଜି ନିବେଶ ଅଭିବୃଦ୍ଧି, ବିକାଶ ଓ ଭିତ୍ତିଭୂମି ଉନ୍ନୟୟନ ଉପରେ ଗୁରୁତ୍ୱ ଦିଆଯାଇଛି । ଏହା ଏକ ବିକାଶମୁଖୀ, ଜନ ମଙ୍ଗଳକାରୀ ଓ ସମତୁଲ ବଜେଟ୍ ବୋଲି ଅର୍ଥମନ୍ତ୍ରୀ କହିଛନ୍ତି । ଗତ ଆର୍ଥିକ ବର୍ଷର ବଜେଟ୍ ତୁଳନାରେ ଏହା ୧୫.୮ ପ୍ରତିଶତ ଅଧିକ । । ଅନ୍ୟପକ୍ଷରେ ଏହି ଆର୍ଥିକ ବର୍ଷ ପାଇଁ କୃଷି ବିଭାଗ ଲାଗି ୨୦ ହଜାର ୭୧୪ କୋଟି ଟଙ୍କାର ସ୍ୱତନ୍ତ୍ର ବଜେଟ୍କୁ ମଧ୍ୟ ମନ୍ତ୍ରୀ ଉପସ୍ଥାପନ କରିଛନ୍ତିି । ଯାହା ବିଗତ ବର୍ଷ ତୁଳନାରେ ୨୩.୫ ପ୍ରତିଶତ ବୃଦ୍ଧି ପାଇଛି । ୨୦୧୯-୨୦ ବର୍ଷ ପାଇଁ କୃଷି ବଜେଟ୍ ପୂର୍ଣ୍ଣାଙ୍ଗ ବଜେଟ୍ ୧୪.୯ ପ୍ରତିଶତ ରହିଛି । ପୂର୍ଣ୍ଣାଙ୍ଗ ବଜେଟ୍ରେ ପ୍ରଶାସନିକ ଖର୍ଚ୍ଚ ୫୭,୩୧୦ କୋଟି ଟଙ୍କା ଅଟକଳ କରାଯାଇଥିବାବେଳେ କାର୍ଯ୍ୟକ୍ରମ ଖର୍ଚ୍ଚ ର ପରିମାଣ ୭୦ ହଜାର ୬୦୦ କୋଟି ଟଙ୍କା ଅଟକଳ କରାଯାଇଛି । ଶିକ୍ଷା ଓ ଦକ୍ଷତା କ୍ଷେତ୍ର ପାଇଁ ୧୯ ହଜାର ୪୯୨ କୋଟି ଟଙ୍କାର ବ୍ୟୟ ବରାଦ କରାଯାଇଛି । ସେହିପରି ସ୍ୱାସ୍ଥ୍ୟକ୍ଷେତ୍ର ପାଇଁ ୬ହଜାର ୭୭୯ କୋଟି ଟଙ୍କା , ପାଇପ୍ ଯୋଗେ ଜଳ ଯୋଗାଣ ପ୍ରକଳ୍ପ ପାଇଁ ୫ ହଜାର କୋଟି ଟଙ୍କା , ଅନୁସୂଚିତ ଜନଜାତି ଓ ଜାତି ମାନଙ୍କ ପାଇଁ ଚିହ୍ନିତ ଯୋଜନା ଦାରା କାର୍ଯ୍ୟକ୍ରମ ବ୍ୟୟ ମାଧ୍ୟମରେ ୨୩ ହଜାର ୭୬୦ କୋଟି ଟଙ୍କାର ବ୍ୟୟ ବରାଦ କରାଯାଇଛି । ଉନ୍ନୟନଗତ ଖର୍ଚ୍ଚ ମୋଟ୍ ବଜେଟ୍ ଅଟକଳର ୭୫ ପ୍ରତିଶତରୁ ଅଧିକ ଅଟେ । ଟିକସ ଓ ରାଜ୍ୟ ସାମଗ୍ରିକ ଘରୋଇ ଉପିାଦର ଅନୁପାତ ୨୦୧୯-୨୦ ,ରେ ୬.୧ ପ୍ରତିଶତ ହେବା ପାଇଁ ଅଟକଳ କରାଯାଇଛି । ବତ୍ତୀୟ ନିଅଣ୍ଟ ଘରୋଇ ଉପିାଦର ୩.୪୯ ମଧ୍ୟରେ ସୀମିତ ରହିବ ବୋଲି ଅର୍ଥମନ୍ତ୍ରୀ ସୂଚନା ଦେଇଛନ୍ତି । ସେହିଭଳି ରାଜ୍ୟ ବଜେଟରେ ଜଳସେଚନ କ୍ଷେତ୍ର ପାଇଁ ମୋଟ ୯,୭୧୩ କୋଟି ଟଙ୍କାର ବ୍ୟୟ ବରାଦ କରାଯାଇଥିଲା ବେଳେ ପାର୍ବତୀଗିରି ବୃହତ ଉଠା ଜଳସେଚନ ପ୍ରକଳ୍ପ ପାଇଁ ୧,୭୭୭ କୋଟି ଟଙ୍କା, ୮ ଗୋଟି ତ୍ୱରିତ ଜଳସେଚନର ସୁବିଧା ଯୋଜନା ନିମନ୍ତେ ୧,୮୬୧ କୋଟି ଟଙ୍କା, ମୁଖ୍ୟମନ୍ତ୍ରୀ ଆଡ଼ିବନ୍ଧ ଯୋଜନାରେ ୩୩୪ କୋଟି ଟଙ୍କା, ଗଭୀର ନଳକୂପ ଖନନ ନିମନ୍ତେ ୫୪୦ କୋଟି ଟଙ୍କା, ବିଜୁ କୃଷକ ବିକାଶ ଅନ୍ତର୍ଗତ ଗୋଷ୍ଠୀ ଓ ଉଠା ଜଳସେଚନ ପ୍ରକଳ୍ପ ନିର୍ମାଣ ନିମନ୍ତେ ୪୨୦ କୋଟି ଟଙ୍କା, ଜଳସଞ୍ଚାଳନ କ୍ଷତିକୁ କମାଇବା ପାଇଁ ପ୍ରଚଳନ କରାଯାଇଥିବା କେନାଲ ଲାଇନିଂ ସିଷ୍ଟମ ରିହାବିଲିଟେସନ ପ୍ରୋଗ୍ରାମ ଓ କେନାଲ ଆସ୍ତରଣ କାର୍ଯ୍ୟ ସମ୍ପୂର୍ଣ୍ଣ କରିବା ନିମନ୍ତେ ୨୧୦ କୋଟି ଟଙ୍କା, ଜଳକ୍ଷେତ୍ର ଭିତ୍ତିିଭୂମି ଉନ୍ନୟନ କାର୍ଯ୍ୟକ୍ରମ ପାଇଁ ୧,୫୬୫ କୋଟି ଟଙ୍କା ବ୍ୟୟ ବରାଦ କରାଯାଇଛି । ସେହିପରି କୃଷି ଓ କୃଷକ କଲ୍ୟାଣ ଉପରେ ଅଗ୍ରାଧିକାର ଦିଆଯାଇଛି । କୃଷକ ସହାୟତା ଯୋଜନା ମାଧ୍ୟମରେ ୭୫ ଲକ୍ଷ କୃଷକଙ୍କୁ ସେମାନଙ୍କର ଜୀବିକା ନିର୍ବାହ ଓ ଆୟ ବୃଦ୍ଧି ପାଇଁ କାଳିଆ ନିମନ୍ତେ ୫,୬୧୧ କୋଟି ଟଙ୍କା ବ୍ୟୟ ବରାଦ କରାଯାଇଛି । ବାଣିଜି୍ୟକ ସମବାୟ ବ୍ୟାଙ୍କ ମାଧ୍ୟମରେ ଚାଷୀମାନଙ୍କୁ ସୁଧ ରିହାତି ନିମନ୍ତେ ୮୦୦ କୋଟି ଟଙ୍କାର ବ୍ୟୟ ବରାଦ ହୋଇଛି । ସାମାଜିକ
ନିରାପତ୍ତା ନିମିତ୍ତ ୪,୪୨୭ କୋଟି ଟଙ୍କା, ମଧୁବାବୁ ପେନ୍ସନ୍ ଯୋଜନା ବାବଦରେ ୨,୧୨୦ କୋଟି ଟଙ୍କା, ଏହି ଯୋଜନାରେ ୮୦ ବର୍ଷରୁ କମ୍ ବାର୍ଦ୍ଧକ୍ୟ, ବିଧବା ମାସିକ ଟଙ୍କା ହାରରେ ଭତ୍ତା ପ୍ରଦାନ ଓ ୮୦ ବର୍ଷରୁ ଉର୍ଦ୍ଧ୍ୱ ହିତାଧିକାରୀଙ୍କୁ ୭୦୦ ଟଙ୍କା ଭତ୍ତା ପ୍ରଦାନ ବ୍ୟବସ୍ଥା ହୋଇଛି ।
ସମସ୍ତଙ୍କ ପାଇଁ ସ୍ୱାସ୍ଥ୍ୟ ସେବା ଯୋଗାଇ ଦେବା ପାଇଁ ୬,୭୮୩ କୋଟି ଟଙ୍କାର ବ୍ୟୟ ବରାଦ କରାଯାଇଥିଲା ବେଳେ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ମାଧ୍ୟମରେ ମାଗଣା ଚିକିତ୍ସା ସୁବିଧା ପାଇଁ ପ୍ରତି ପରିବାରର ପୁରୁଷ ମାନଙ୍କ ଲାଗି ୫ ଲକ୍ଷ ଓ ମହିଳା ମାନଙ୍କ ପାଇଁ ୧୦ ଲକ୍ଷ ଟଙ୍କା ପ୍ରଦାନ ନିମନ୍ତେ ୧,୨୦୩ କୋଟି ଟଙ୍କା ବ୍ୟୟ ବରାଦ କରାଯାଇଛି । ମହିଳା ସଶକ୍ତି କରଣ ପାଇଁ ୨,୪୪୨ କୋଟି ଟଙ୍କା ବ୍ୟୟ ବରାଦ କରାଯାଇଥିଲା ବେଳେ ଚଳିତ ଆର୍ଥିକ ବର୍ଷରେ ମମତା ଯୋଜନା ପାଇଁ ୩୦୫ କୋଟି ଟଙ୍କା ବ୍ୟୟ ବରାଦ କରାଯାଇଛି ।
ପ୍ରତି ଗ୍ରାମ ପଞ୍ଚାୟତରେ ମିଶନ ଶକ୍ତି ଗୃହ ନିର୍ମାଣପାଇଁ ୧୩୦ କୋଟି ଟଙ୍କା, ଆଦିବାସୀ ଉନ୍ନୟନ ଯୋଜନା ପାଇଁ ଅନୁସୂଚିତ ଜନଜାତି, ଅନୁସୂଚିତ ଜାତି, ସବ୍ କମ୍ପୋନେଟ ଅଧିନରେ ୨୩,୭୬୦ କୋଟି ଟଙ୍କା ବ୍ୟୟ ବରାଦ କରାଯାଇଛି । ଆଦର୍ଶ ବିଦ୍ୟାଳୟର ସ୍ଥାପନା ଓ ପରିଚାଳନା ପାଇଁ ୩୦୦ କୋଟି ଟଙ୍କା, ପିଲାମାନଙ୍କୁ ମାଗଣା ବହି, ବ୍ୟାଗ୍, ଜୋତା, ସ୍କୁଲ ୟୁନିଫର୍ମ, ସରକାରୀ ଓ ବେସରକାରୀ ଅନୁଦାନ ପ୍ରାପ୍ତ ନବମ ଶ୍ରେଣୀ, ସଂସ୍କୃତ ଟୋଲ, ମଦ୍ରାସାରେ ପଢ଼ୁଥିବା ଛାତ୍ର ଛାତ୍ରୀ ମାନଙ୍କୁ ମାଗଣାରେ ସାଇକେଲ ପ୍ରଦାନ କରିବାକୁ ୨୩୯ କୋଟି ଟଙ୍କା ବ୍ୟୟ ବରାଦର ପ୍ରସ୍ତାବ ରହିଛି । ପାନୀୟ ଜଳ ଯୋଗାଣ ପାଇଁ ୫୦୦୦ କୋଟି ଟଙ୍କା ନିବେଶ କରାଯିବ । ବସୁଧା ଯୋଜନା ଅନ୍ତର୍ଗତ ଗ୍ରାମାଞ୍ଚଳରେ ଜଳ ଯୋଗାଣ ପାଇଁ ୨୭୪୦ କୋଟି ଟଙ୍କା ଓ ସହରାଞ୍ଚଳରେ ଜଳଯୋଗାଣ ପାଇଁ ୩୫୦ କୋଟି ଟଙ୍କା ବ୍ୟୟ ବରାଦ କରାଯାଇଛି । ଶିଳ୍ପ କ୍ଷେତ୍ରରେ ଉନ୍ନୟନ ଓ ପୁଞ୍ଜି ବିନିଯୋଗ ଉପରେ ଅଗ୍ରାଧିକାରୀ ଦିଆଯାଇ ୨୩୭ କୋଟି ଟଙ୍କା ବ୍ୟୟ ବରାଦ କରାଯାଇଛି । ଭୁବନେଶ୍ୱର ଓ ରାଉରକେଲା ସ୍ମାର୍ଟସିଟି ପାଇଁ ୪୦୦ କୋଟି ଟଙ୍କା, ବସ୍ତି ବାସିନ୍ଦାଙ୍କୁ ଭୂମି ଅଧିକାର ଦେବା ସହ ଭିତିଭୂମି ଓ ସେବା ଯୋଗାଇ ଦେବା ପାଇଁ ଜାଗା ମିଶନ କାର୍ଯ୍ୟକ୍ରମ ଅଧିନରେ ୧୦୦ କୋଟି ଟଙ୍କା, ଭିତ୍ତିଭୂମି କ୍ଷେତ୍ରର ଉନ୍ନତିପାଇଁ ୧୭,୮୦୯ କୋଟି ଟଙ୍କା ବ୍ୟୟ ବରାଦ କରାଯାଇଛି । ବିଜୁ ସେତୁ ଯୋଜନା ପାଇଁ ୫୦୦ କୋଟି ଟଙ୍କା, ବିପର୍ଯ୍ୟୟ ପ୍ରଶମନ ପାଇଁ ୪,୬୦୦ କୋଟି ଟଙ୍କା ବ୍ୟୟ ବରାଦ କରାଯାଇଛି ।
