Anupambharat News Bureau
ଭଦ୍ରକ,୧୭ା୧୦(ଅନୁପମ ମିଡିଆ): ଏହି ଜିଲାର ତିହିଡି ଥାନା ଅଧୀନସ୍ଥ ପାଳିଆବିନ୍ଧାସ୍ଥିତ ବିରଞ୍ଚି ନାରାୟଣ ମାଧବାର୍ଜୁନ ମହାବିଦ୍ୟାଳୟର ଜଣେ ନାବାଳିକା ଛାତ୍ରୀକୁ ବିବାହର ପ୍ରଲୋଭନ ଦେଖାଇ ଅପହରଣ କରିଥିବା ଅଭିଯୁକ୍ତକୁ ପୁଲିସ୍ ଗିରଫ କରିଛି । ଏବଂ ୭ ସପ୍ତାହ ପରେ ସୁଦୂର ହାଇଦ୍ରାବାଦର ଗୁଣ୍ଠୁରୁ ଅଂଚଳରୁ ଉଦ୍ଧାର କରିଛି । ପ୍ରାପ୍ତ ଖବରରୁ ଯାହା ଜଣାଯାଏ ବାସୁଦେବପୁର ଥାନା ଅଧୀନସ୍ଥ ରାଧାବଲ୍ଲଭପୁର ଗାଁର ନାବାଳିକ ଛାତ୍ରୀ ଜଣକ ପାଳିଆବିନ୍ଧା କଲେଜରେ ପାଠ ପଢନ୍ତି । ଧାମନଗର ଥାନା ଅଧୀନସ୍ଥ ବାବୁରି ଗାଁର ଶ୍ରୀକାନ୍ତ ଜେନାଙ୍କ ସହ ତାଙ୍କର ପ୍ରେମ ସଂପର୍କ ଗଢିଉଠିଥିଲା । ବିବାହର ପ୍ରତିଶ୍ରୁତି ଦେଇ ଶ୍ରୀକାନ୍ତ ଛାତ୍ରୀ ଜଣକୁ ଗତ ଅଗଷ୍ଟ ୧୯ ତାରିଖ ଦିନ ଅପହରଣ କରିଥିଲା । ନାବାଳିକା ପରିବାର ପକ୍ଷରୁ ଆଗତ ଏତଲା ମୂଳେ ତିହିଡି ଥାନାରେ ଏକ ମାମଲା ୩୮୩/୧୯, ଦଫା ୩୬୩ ମୂଳେ ରୁଜୁ ହୋଇଥିଲା । ତେବେ ନାବାଳିକା ପରିବାର ପକ୍ଷରୁ ଅପହୃତା ସଂପର୍କରେ ସୂଚନା ଦିଆଯାଇଥିଲା । ଫଳରେ ପୁଲିସ୍ ସୁଦୂର ହାଇଦ୍ରାବାଦ ଯାଇ ଗୁଣ୍ଠୁରୁ ଅଂଚଳରୁ କନ୍ୟାକୁ ଉଦ୍ଧାର କରି ଅପହୃତାକୁ ଗିରଫ ପୂର୍ବକ କୋର୍ଟ ଚାଲାଣ କରିଛି । ନାବାଳିକାଟିକୁ ମାଜିଷ୍ଟ୍ରେଟ୍ଙ୍କ ନିକଟରେ ହାଜର କରିବା ପରେ ତାଙ୍କ ପରିବାରକୁ ହସ୍ତାନ୍ତର କରାଯାଇଛି ।
