Anupambharat News Bureau
ଶ୍ରୀନଗର: କୁଖ୍ୟାତ ଆତଙ୍କୀ ସଂଗଠନ ଅଲ-କାଏଦର ସହଯୋଗୀ ଭାବେ ଜମ୍ମୁ-କଶ୍ମୀରରେ କାର୍ଯ୍ୟ କରୁଥିବା ଅନସାର ଘାଜୱାଟ ଉଲ ହିନ୍ଦ (ଏଜିଏଚ୍) ଏବେ ମୂଳପୋଛ ହୋଇଯାଇଛି । ଅଲ-କାଏଦର ସହଯୋଗୀ ଭାବେ ଏଜିଏଚ୍ କଶ୍ମୀରରେ ସକ୍ରିୟ ରହି ବିଭିନ୍ନ ଆତଙ୍କୀ କାର୍ଯ୍ୟକଳାପ ଓ ଯୁବକମାନଙ୍କୁ ନିଜ ସଂଗଠନରେ ସାମିଲ କରୁଥିଲା । ହେଲେ ଗତକାଲି ସୁରକ୍ଷାକର୍ମୀଙ୍କ ଗୁଳିରେ ଏଜିଏଚର ମୁଖ୍ୟ ଅବଦୁଲ ହମିଦ ଲେଲହାରି ନିପାତ ହେବା ପରେ ଏହି ସଂଗଠନ ଉପତ୍ୟକାରୁ ଶେଷ ହୋଇଯାଇଥିବା ଆଜି ଜମ୍ମୁ-କଶ୍ମୀର ପୁଲିସ୍ ମୁଖ୍ୟ ଦିଲବାଗ ସିଂହ କହିଛନ୍ତି ।
ସେ କହିଛନ୍ତି, ଅବଦୁଲ ସହ ଗତକାଲି ଆଉ ଦୁଇ ଜଣ ଆତଙ୍କୀ ନିହତ ହୋଇଥିଲେ । ଏମାନେ ସମସ୍ତେ ସ୍ଥାନୀୟ ଅଞ୍ଚଳର ଅଧିବାସୀ । ଏଜିଏଚର ମୁଖ୍ୟ ଜାକିର ମୂଷାର ମୃତ୍ୟୁପରେ ଅବଦୁଲ ହିଁ ଏହି ସଂଗଠନର ଉତ୍ତରାଧିକାରୀ ହୋଇଥିଲା । ସେ କଶ୍ମୀର ଯୁବକଙ୍କୁ ମୌଳବାଦୀ ଚିନ୍ତାଧାରାରେ ପ୍ରଭାବିତ କରି ନିଜ ସଂଗଠନରେ ସାମିଲ କରୁଥିଲା ।
ଏଥିସହ ବିଭିନ୍ନ ଆତଙ୍କବାଦୀ କାର୍ଯ୍ୟକଳାପରେ ସାମିଲ ମଧ୍ୟ ଥିଲା । ତେବେ ତା’ର ମୃତୁ୍ୟ ସହ ବର୍ତ୍ତମାନ ସ୍ଥିତିରେ ଏଜିଏଚ୍ ସଂପୂର୍ଣ୍ଣ ମୂଳପୋଛ ହୋଇଯାଇଛି । ଅବନ୍ତିପୁରାରେ ହୋଇଥିବା ଏନକାଉଣ୍ଟରରେ ଅବଦୁଲ ଓ ତା’ର ଦୁଇ ସହଯୋଗୀ ପ୍ରାଣ ହାରାଇଥିଲେ । ଅଲକାଏଦା ସହ ସମ୍ପର୍କ ରଖିଥିବା ଏହି ସଂଗଠନର ସଦସ୍ୟମାନେ ପାକିସ୍ତାନରେ ସକ୍ରିୟ ଜୈଶ-ଏ-ମହମ୍ମଦ ସହ ମିଶି କାମ କରୁଥିଲେ ।
ଜାକିର ମୂଷା ନିହିତ ହେବା ପରେ ଅବଦୁଲ ହିଁ ଏହି ସଂଗଠନକୁ ଚଳାଉଥିଲା । ୨୦୧୬ରୁ କଶ୍ମୀରରେ ସକ୍ରିୟ ଥିବା ଅବଦୁଲ ଏକାଧିକ ଆତଙ୍କୀ କାର୍ଯ୍ୟକଳାପରେ ସାମିଲ ଥିଲା । ସେ ଓ ତା’ର ଦୁଇ ସହଯୋଗୀ ଟ୍ରାଲରେ ଲୁଚି ଥିବା ଖବର ପାଇ ସୁରକ୍ଷାକର୍ମୀଙ୍କ ପକ୍ଷରୁ ଅପରେସନ ଆରମ୍ଭ ହୋଇଥିଲା । ଏଥିରେ ଅବଦୁଲ ଓ ତା’ର ସହଯୋଗୀ ନିହତ ହୋଇଛନ୍ତି । ଏବେ ଜମ୍ମୁ-କଶ୍ମୀର ଯୁବକମାନଙ୍କୁ ଆତଙ୍କୀ ସଂଗଠନରେ ସାମିଲ କରାଯିବାକୁ ଉସକା ଯାଉଛି । ଅଗଷ୍ଟ ୫ରେ ଜମ୍ମୁ-କଶ୍ମୀରରୁ ଧାରା ୩୭୦ ଉଚ୍ଛେଦ ହେବା ପରେ ଯୁବକମାନଙ୍କୁ ମିଛ କୁହାଯାଇ ଭାରତ ସରକାରଙ୍କ ବିରୋଧରେ କାର୍ଯ୍ୟ କରିବାକୁ କୁହାଯାଉଛି । ଏଥିପାଇଁ କିଛି ଯୁବକ ସେମାନଙ୍କ ଘର ଛାଡ଼ି ଚାଲି ଯାଇଛନ୍ତି । ହେଲେ ସେମାନେ ସମସ୍ତେ ଯେ ଆତଙ୍କୀ ସଂଗଠନରେ ସାମିଲ ହୋଇଛନ୍ତି, ତାହା ଭାବିବା ମଧ୍ୟ ଭୁଲ ବୋଲି ସେ କହିଛନ୍ତି । ପାକିସ୍ତାନ ପ୍ରସଙ୍ଗରେ ମତଦେଇ ସେ କହିଛନ୍ତି, ପାକିସ୍ତାନ ସେନା ଓ ଆଇଏସ୍ଆଇ ଭାରତରେ ଅଧିକରୁ ଅଧିକ ଆତଙ୍କବାଦୀଙ୍କୁ ଅନୁପ୍ରବେଶ କରାଇବାକୁ ଉଦ୍ୟମ କରୁଛନ୍ତି । ପିଓକେରେ ଥିବା ଆତଙ୍କୀ ଲଞ୍ଚ ପ୍ୟାଡVୁଡ଼ିକୁ ଦିନକୁ ଦିନ ସକ୍ରିୟ ହେବାରେ ଲାଗିଛି ବୋଲି ସେ କହିଛନ୍ତି ।
ଜମ୍ମୁ-କଶ୍ମୀରରେ ଛୋଟ ଛୋଟ ପିଲାଙ୍କୁ ଅଗଷ୍ଟ ୫ ପରେ ଅଟକ ରଖାଇଥିବା ପ୍ରସଙ୍ଗରେ ସେ କହିଛନ୍ତି, ଅନେକ ସମୟରେ କଶ୍ମୀରକୁ ନେଇ ଭୁଲ ତଥ୍ୟ ପ୍ରଚାର କରାଯାଉଛି । ଏହା ପଛରେ କିଛି ଲୋକ ଏବଂ ଦାୟିତ୍ୱହୀନ ଭାବେ ଖବର ପ୍ରସାରଣ କରୁଥିବା ମିଡିଆ ମଧ୍ୟ ଏହା ପଛରେ ରହିଛନ୍ତି । ତଥାପି କଶ୍ମୀରରେ ଯେଉଁ ପଦକ୍ଷେପ ନିଆଯାଇଛି, ତାହା ସମସ୍ତଙ୍କ ମଙ୍ଗଳ ପାଇଁ କରାଯାଇଛି । କାହାକୁ ଏଠାରେ ନିର୍ଯାତନା ଦିଆଯାଉନାହିଁ । ଯୁବକ, ଟିନଏଜର ଓ ନାବାଳକଙ୍କୁ ଆମ ପକ୍ଷରୁ ଗିରଫ କରାଯାଇନାହିଁ । ନାବାଳିକାମାନେ ଯେଉଁଠି ଗିରଫ ହୁଅନ୍ତି, ସେଠାରେ ନାବାଳକ ଜଷ୍ଟିସ ଆଇନ୍ କଡ଼ାକଡ଼ି ଭାବେ ପାଳନ କରାଯାଏ । ଯେତେବେଳେ କଶ୍ମୀରର ଯୁବକମାନେ ଆତଙ୍କବାଦର ପଥାକୁ ଅନୁସରରଣ କରିବେ ନାହିଁ, ସେତେବେଳେ ଉପତ୍ୟକାରେ ଶାନ୍ତି ସ୍ଥାପନ ହୋଇପାରିବ ।
