Anupambharat News Bureau
ନୂଆଦିଲ୍ଲୀ: ମହାରାଷ୍ଟ୍ରରେ ବିଜେପି ପୁଣିଥରେ ସରକାର ଗଠନ କରିବାକୁ ଥିବା ବେଳେ ହରିଆଣାରେ ବିରୋଧୀ ଉକ୍ତ ଦଳକୁ କଡ଼ା ଟMର ଦେବେ ବୋଲି ଇଣ୍ଡିଆ ଟୁଡେ ଏକଜିଟ୍ ପୋଲ ପୂର୍ବାନୁମାନ କରିଛି । ପ୍ରାୟ ଅଧିକାଂଶ ସଂସ୍ଥା ନିଜର ଏକଜିଟ୍ ପୋଲରେ ହରିଆଣାରେ ପୁଣିଥରେ ମନହୋରଲାଲ ଖଟ୍ଟର ସରକାର ଗଠନ କରିବେ ବୋଲି କହିଥିବା ବେଳେ ଇଣ୍ଡିଆ ଟୁଡେ ଏଥିରେ ଏକମତ ହୋଇପାରି ନାହିଁ । ହରିଆଣାର ୯୦ଟି ଆସନରୁ କୌଣସି ଦଳକୁ ସରକାର ଗଠନ ପାଇଁ ମ୍ୟାଜିକ ନମ୍ବର ୪୬ ମିଳିବ ନାହିଁ ବୋଲି ଏହି ସଂସ୍ଥା ନିଜର ଏକଜିଟ୍ ପୋଲରେ ପୂର୍ବାନୁମାନ କରିଛି । ୨୦୧୯ ସାଧାରଣ ନିର୍ବାଚନରେ ଠିକ୍ ପୂର୍ବାନୁମାନ କରିଥିବା ଏହି ସଂସ୍ଥାର ଆକଳନ ଯଦି ସତ ହୁଏ, ତା’ହେଲେ ବିଜେପି ଛୋଟ ଛୋଟ ଦଳଗୁଡ଼ିକ ସହ ମିଶି ସରକାର ଗଠନ କରିବାକୁ ବାଧ୍ୟ ହେବ । ଅନ୍ୟପକ୍ଷରେ ଏହାର ଫାଇଦା ମଧ୍ୟ କଂଗ୍ରେସ ଉଠାଇ ସରକାର ଗଠନ କରିବାକୁ ଉଦ୍ୟମ ମଧ୍ୟ କରିପାରିବ । ତେବେ ଆସନ୍ତାକାଲି ଫଳାଫଳ ପ୍ରକାଶ ପାଇବା ପରେ ସବୁ କିଛି ସ୍ପଷ୍ଟ ହୋଇଯିବ । ଇଣ୍ଡିଆ ଟୁଡେର ଏକଜିଟ୍ ପୋଲ ଆକଳନ ଅନୁଯାୟୀ, ବିଜେପିକୁ ୩୨ରୁ ୪୪ଟି ଆସନ ମିଳିବାକୁ ଥିବା ବେଳେ କଂଗ୍ରେସ ୩୦ରୁ ୪୨ଟି ଆସନ ଜିତିବ । ସେହିପରି ଦ୍ୟୁଷନ୍ତ ଚୌଟାଲାଙ୍କ ଜନନାୟକ ଜନତା ପାର୍ଟି ୬ରୁ ୧୦ଟି ଆସନ ଜିତିବ । ଏପରି ହେଲେ ଜନନାୟକ ଜନତା ପାର୍ଟି ହିଁ ହରିଆଣାରେ କିଙ୍ଗ ମେକର ସାଜିବ । ଦଳ ଯାହାକୁ ସମର୍ଥନ କରିବ, ସେ ହିଁ ଏଠାରେ ସରକାର ଗଠନ କରିବ । ଭୋଟ ଆବଣ୍ଟନ କଥା ବିଚାରକୁ ନେଲେ ବିଜେପି ୩୩%, କଂଗ୍ରେସ ୩୨% ଓ ଜନନାୟକ ଜନତା ପାର୍ଟି ୧୪% ଭୋଟ ପାଇବ ବୋଲି ଏହି ସଂସ୍ଥା କହିଛି । ୨୦୧୪ରେ ବିଜେପି ୪୭ଟି ଆସନ ଜିତିଥିବା ବେଳେ କଂଗ୍ରେସକୁ ମାତ୍ର ୧୫ଟି ସିଟ୍ ମିଳିଥିଲା ।
