Anupambharat News Bureau
ଭୁବନେଶ୍ୱର, ୨୬ା୧୦ (ଅନୁପମ ମିଡିଆ) : ଏ ବର୍ଷ ମୌସୁମୀ ଡେରିରେ ପ୍ରତ୍ୟାବର୍ତ୍ତନ କଲା । ତା ପ୍ରଭାବରେ ଓଡ଼ିଶାକୁ ଶୀତ ଛୁଇଁ ନଥିଲା । ଯେହେତୁ ଲଘୁଚାପ ଜନିତ ବର୍ଷ ଛାଡ଼ି ଯାଇଛି, ତେଣୁ ନିଶ୍ଚିତ ଭାବେ ପାଗର ପରିବର୍ତ୍ତନ ଘଟିବ । ଆଶା କରୁଛୁ ଯେ ଦୁଇରୁ ତିନି ଦିନ ମଧ୍ୟରେ ଆଶିଂକ ଭାବେ ଶୀତର ପ୍ରଭାବ ପଡ଼ିବ । ଶନିବାର ଦିନ ଭୁବନେଶ୍ୱର ସ୍ଥିତ ଆଞ୍ଚଳିକ ପାଣିପାଗ କେନ୍ଦ୍ରର ଡୁ୍ୟଟି ଅଫିସର ମଦନମୋହନ ଦାସ ଏହି ସୂଚନା ଦେଇଛନ୍ତି । ସେ କହିଛନ୍ତି ଯେ ମୌସୁମୀ ବାୟୁ ଓଡ଼ିଶାରୁ ବିଦାୟ ନେଇସାରିଛି । ହେଲେ ଏକ ଲୋପ୍ରେସର ପ୍ରଭାବରେ ରାଜ୍ୟରେ ବର୍ଷା ଲାଗି ରହିଥିଲା । ବର୍ତ୍ତମାନ ଲଘୁଚାପ ନିଷ୍କ୍ରିୟ ହୋଇ ଯାଇଛି । କେବଳ ଆଭ୍ୟନ୍ତରୀଣ ଓଡ଼ିଶାରେ ଗୋଟିଏ ଘୂର୍ଣ୍ଣିବଳୟ ରହିଛି । ଦାସ କହିଛନ୍ତି ଯେ ଆଗାମୀ ଏକ ସପ୍ତାହ ଯାଏ କୌଣସି ବାତ୍ୟାର ସୂଚନା ନାହିଁ । ବାତ୍ୟା ନେଇ ଯେଉଁ ପ୍ରଚାର ଚାଲିଛି ତାହା ଠିକ୍ ନୁହେଁ । ସୂଚନାଯୋଗ୍ୟ ଲଘୁଚାପ ପ୍ରଭାବରେ ରାଜ୍ୟର ବିଭିନ୍ନ ସ୍ଥାନରେ ବୁଧବାର ଓ ଗୁରୁବାର ପ୍ରବଳ ବର୍ଷା ହୋଇଥିଲା । ବର୍ଷା ଯୋଗୁ ଅନେକ ସ୍ଥାନରେ ସ୍ଥିତି ବେହାଲ୍ ହୋଇଯାଇଥିଲା । ତେବେ ଏଥିଯୋଗୁ କୌଣସି ସ୍ଥାନରେ ବନ୍ୟା ସ୍ଥିତି ନଥିଲା ବୋଲି ଶୁକ୍ରବାର ସ୍ୱତନ୍ତ୍ର ରିଲିଫ୍ କମିଶନର ପ୍ରଦୀପ ଜେନା କହିଥିଲେ ।
