Anupambharat News Bureau
ଭୁବନେଶ୍ୱର,୫ ।୧୧(ଅନୁପମ ମିଡିଆ):
ଓଡିଶାରେ ବାତ୍ୟା ସମ୍ପର୍କରେ ନିର୍ଦ୍ଦିଷ୍ଟ ସୂଚନା ନଥିଲେ ହେଁ ସମ୍ଭାବ୍ୟ ବାତ୍ୟା ଓ ବର୍ଷାର ମୁକାବିଲା ପାଇଁ ୧୫ଟି ଜିଲ୍ଲାର ଜିଲ୍ଲାପାଳମାନେ ପ୍ରସ୍ତୁତ ରହିବାପାଇଁ ନିର୍ଦ୍ଦେଶ ଦିଆଯାଇଛି ବୋଲି ସ୍ୱତନ୍ତ୍ର ରିଲିଫ୍ କମିଶନର ପ୍ରଦୀପ ଜେନା ମଙ୍ଗଳବାର ପ୍ରକାଶ କରିଛନ୍ତି । ଏସଆରସି କହିଛନ୍ତି ଯେ, ବାତ୍ୟା ହେଲେ ଓଡ଼ିଶା ଉପକୂଳ ଛୁଇଁ ନ ପାରେ । ବାତ୍ୟା କେଉଁଠି ସ୍ଥଳଭାଗ ଛୁଇଁବ ତାହା ଏଯାଏ ସ୍ପଷ୍ଟ ହୋଇନାହିଁ । ଏଥିପାଇଁ ଭୟଭୀତ ନ ହେବାକୁ ଏସଆରସି ରାଜ୍ୟବାସୀଙ୍କୁ ପରାମର୍ଶ ଦେଇଛନ୍ତି । ସମସ୍ତ ଜିଲ୍ଲାର ପ୍ରଶାସନ ବିଶେଷ କରି ଉପରୋକ୍ତ ୧୫ ଜିଲ୍ଲାର ପ୍ରଶାସନ ବର୍ଷା ପରବର୍ତ୍ତୀ ସମ୍ଭାବ୍ୟ ବନ୍ୟା ଏବଂ ଜଳବନ୍ଦୀ ସମସ୍ୟାର ମୁକାବିଲା କରିବା ଲାଗି ସତର୍କ ରହିବା ପାଇଁ ଆଡଭାଇଜାରୀ ଜାରି କରାଯାଇଛି । ଅନ୍ୟପକ୍ଷରେ ବର୍ଷା ସମ୍ପର୍କରେ ଚାଷୀ ମାନଙ୍କ ପାଇଁ ଆଡଭାଇଜରୀ ଜାରୀ କରିବା ପାଇଁ କୃଷି ମନ୍ତ୍ରୀ ଡ. ଅରୁଣ ସାହୁ ଓୟୁଏଟିକୁ ନିର୍ଦ୍ଦେଶ ଦେଇଛନ୍ତି ।
ଏସଆରସି ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ ପୁରୀ ,ବାଲେଶ୍ୱର , ଭଦ୍ରକ , କେନ୍ଦ୍ରାପଡା , ଜଗତସିଂହପୁର, ବୌଦ୍ଧ, କୋରାପୁଟ ,ରାୟଗଡା , ନବରଙ୍ଗପୁର, ଗଞ୍ଜାମ , ଗଜପତି, ନୂଆପଡା, ମାଲକାନଗିରି,କନ୍ଧମାଳ ଓ କଳାହାଣ୍ଡି ଜିଲ୍ଲାର ଜିଲ୍ଲାପାଳମାନଙ୍କୁ ସତର୍କ ରହିବାକୁ କୁହାଯାଇଛି । ପୂର୍ବ-କେନ୍ଦ୍ରୀୟ ବଙ୍ଗୋପସାଗରରେ ସୃଷ୍ଟ ଲଘୁଚାପ ମଙ୍ଗଳବାର ଅବପାତରେ ପରିଣତ ହୋଇଛି । ଆସନ୍ତା ୧୨ ଘଣ୍ଟା ଭିତରେ ଏହା ଗଭୀର ଅବପାତରୂପ ନେବ । ପରବର୍ତ୍ତୀ ୧୨ ଘଣ୍ଟାରେ ବାତ୍ୟାରେ ପରିଣତ ହେବାର ସମ୍ଭାବନା ରହିଛି । ଭାରତୀୟ ପାଣିପାଗ ବିଭାଗ (ଆଇଏମଡି)ଏହି ପୂର୍ବାନୁମାନ କରିବା ପରେ ଓଡ଼ିଶା ସରକାର ତପିର ହୋଇପଡ଼ିଛନ୍ତି । ଆଇଏମଡିର ଅନୁମାନ କହୁଛି ଆସନ୍ତା ୭ ତାରିଖରୁ ୧୦ ତାରିଖ ମଧ୍ୟରେ ଉପରୋକ୍ତ ଜିଲ୍ଲା ଗୁଡିକରେ ସ୍ୱଳ୍ପରୁ ମଧ୍ୟମ ଧରଣର ବର୍ଷା ହେବ । ଏହାର ପ୍ରଭାବ ଆଭ୍ୟନ୍ତରୀଣ ଓଡିଶାରେ ବିଶେଷ ପଡିବ ନାହିଁ । ଉତ୍ତର ଆଣ୍ଡାମାନରେ ସୃଷ୍ଟି ଲଘୁଚାପ ଅବପାତର ରୂପ ନେଇଛି । ବର୍ତ୍ତମାନ ଏହା ପାରାଦ୍ୱୀପ ଠାରୁ ୯୨୦ କିମି ଦୂରରେ ରହିଛି । ଏହା ପଶ୍ଚିମବଙ୍ଗ ଓ ବାଲାଂଦେଶର ମଧ୍ୟ ଭାଗରେ ସ୍ଥଳଭାଗ ଛୁଇଁପାରେ । ୭ ତାରିଖରେ ଘଣ୍ଟା ପ୍ରତି ୪୦ରୁ ୫୦ କିମି ବେଗରେ ପବନ ବୋହିବ । ୯ ତାରିଖ ବେଳକୁ ପବନର ବେଗ ବୃଦ୍ଧି ପାଇ ୫୦ରୁ ୬୦ କିମି ବେଗରେ ବୋହିବ । ବର୍ତ୍ତମାନ ରାଜ୍ୟର ସବୁ ବିମାନ ବନ୍ଦରରେ ୧ ନମ୍ବର ବିପଦ ସଙ୍କେତ ଜାରୀ କରାଯାଇଛି । ମାଛ ମାରିବାକୁ ସମଦ୍ର ମଧ୍ୟକୁ ଯାଇଥିବା ମତ୍ସ୍ୟଜୀବୀମାନେ ୮ ତାରିଖ ସୁଦ୍ଧା ଫେରିଆସିବାକୁ କୁହାଯାଇଛି ।
