Anupambharat News Bureau
ପଟ୍ଟାମୁଣ୍ଡାଇ,୧୧ା୧୧(ଅନୁପମ ମିଡିଆ):ସଂପ୍ରତି ସାମୁଦ୍ରିକ ଝଡବାତ୍ୟା ବୁଲବୁଲ ଯୋଗୁଁ ପଟ୍ଟାମୁଣ୍ଡାଇ ଅଞ୍ଚଳରେ ନାହିଁନଥିବା କ୍ଷତି ଘଟିଛି । ବହୁ କଚାଘର ଭାଙ୍ଗି ଯିବା ସହିତ ଧାନ, ବିରି ଓ ପନିପରିବା ଫସଲହାନି ଘଟିଛି । ଏଭଳି ସ୍ଥିତିରେ ବିଭିନ୍ନ ସୁତ୍ରରୁ ଋଣ ଆଣି ଫସଲ କରିଥିବା ଚାଷୀମାନେ ଭାଙ୍ଗି ପଡିଥିବାବେଳେ ବାସହରା ହୋଇ ଗରିବ ଲୋକମାନେ ବେସାହାରା ହୋଇପଡିଛନ୍ତି । ବାତ୍ୟା ପରେ ନାନା ପ୍ରକାର ଦୂର୍ଦ୍ଦଶାରେ ଥିବା ଚାଷୀ ଓ ଗରିବ ଲୋକମାନେ ଏବେ ବିଜୁଳି ଅଭାବରୁ ଘନ ଅନ୍ଧକାର ମଧ୍ୟରେ ନର୍କଯନ୍ତ୍ରଣା ଭୋଗ କରୁଛନ୍ତି । ବାତ୍ୟା ପରେ ବିଜୁଳି ଦାଉ ସାଧୁଛି ବୋଲି ସାଧାରଣରେ ଚର୍ଚ୍ଚା ଆରମ୍ଭ ହୋଇଛି । ସାମୁଦ୍ରିକ ଝଡବାତ୍ୟା ବୁଲବୁଲ ଓଡିଶା ଉପକୂଳ ଅତିକ୍ରମ କରିବା ପରେ ପଟ୍ଟାମୁଣ୍ଡାଇ ସହରରେ ବିଦୁ୍ୟତ ଯୋଗାଣ କରାଯାଇଥିଲା । ମାତ୍ର ବାତ୍ୟାର ୩ ଦିନ ପରେ ମଧ୍ୟ ପଟ୍ଟାମୁଣ୍ଡାଇ ବ୍ଲକର ବହୁ ଅଞ୍ଚଳ ବିଜୁଳି ଅଭାବରୁ ଅନ୍ଧକାରାଛନ୍ନ ହୋଇପଡିଛି । ବିଜୁଳି ଯୋଗାଇବା ପାଇଁ ସେସୁ ଓ ଏନଜେନ ଲୁଚକାଳି ଖେଳ ଖେଳୁଥିବା ସାଧାରଣରେ ଅଭିଯୋଗ ହୋଇଛି । ପଟ୍ଟାମୁଣ୍ଡାଇ ବ୍ଲକର ଡାମରପୁର, ଶ୍ରୀରାମପୁର, ବଳଭଦ୍ରପୁର, ଶାସନ ଆଦି ପଞ୍ଚାୟତରେ ଅଦ୍ୟାବଧି ବିଦୁ୍ୟତ ସେବା ଯୋଗାଇ ଦିଆଯାଇନାହିଁ । ଯାହାଫଳରେ ଲୋକମାନେ ଘନ ଅନ୍ଧକାର ମଧ୍ୟରେ ଯନ୍ତ୍ରଣା ଭୋଗ କରୁଛନ୍ତି । ଖୁଣ୍ଟ ଆସିଲେ ବିଦୁ୍ୟତ ବ୍ୟବସ୍ଥାକୁ ସୁସଙ୍ଗଠିତ କରାଯିବ ବୋଲି ବିଭାଗୀୟ ଯନ୍ତ୍ରୀଙ୍କ ଉତ୍ତରରେ ଜନସାଧାରଣ ଅସନ୍ତୋଷ ପ୍ରକାଶ କରିଛନ୍ତି । ରାଜ୍ୟ ସରକାର ତଥା ବିଭାଗୀୟ କର୍ତ୍ତୃପକ୍ଷ ଅବିଳମ୍ବେ ଅନ୍ଧକାରାଛନ୍ନରେ ଥିବା ଡାମରପୁର, ଶ୍ରୀରାମପୁର, ବଳଭଦ୍ରପୁର ସମେତ ସମସ୍ତ ଅଞ୍ଚଳକୁ ବିଦୁ୍ୟତସେବା ଯୋଗାଇ ଦେବା ପାଇଁ ପଟ୍ଟାମୁଣ୍ଡାଇ ସଂଗ୍ରାମ ସମିତିର ସଭାପତି ନୃସିଂହ ଚରଣ ଆଚାର୍ଯ୍ୟ ଦାବି କରିଛନ୍ତି ।
