Anupambharat News Bureau
ମୁମ୍ବାଇ,୨୫ା୧୧: ମହାରାଷ୍ଟ୍ର ନିର୍ବାଚନ ଫଳାଫଳ ଘୋଷଣା ପରଠାରୁ ରାଜ୍ୟରେ ସୃଷ୍ଟି ହାଇଡ୍ରାମାର ଅନ୍ତ ଘଟୁ ନାହିଁ । ମୁଖ୍ୟଢ଼ନ୍ତ୍ରୀ ଭାବେ ଶପଥ ନେବାପରେ ଆଜି ଦାୟିତ୍ୱ ଗ୍ରହଣ କରିଛନ୍ତି ଫଡ଼ନାଭିସ । ଅନ୍ୟପକ୍ଷେ ଆସନ୍ତାକାଲି ସୁପ୍ରିମକୋର୍ଟରେ ମହାରାଷ୍ଟ୍ର ରାୟ ଶୁଣାଣି ହେବ । ଏହାପରେ ମହାରାଷ୍ଟ୍ର କାହାର ସ୍ପଷ୍ଟ ହେବ ବୋଲି ଆଶା ରହିଛି । ଅନ୍ୟଏକ ରୋଚକ ଘଟଣାକ୍ରମେ ଆଜି ଶିବସେନା, ଏନ୍ସିପି ଏବଂ କଂଗ୍ରେସ ବିଧାୟକମାନେ ଶକ୍ତି ପ୍ରଦର୍ଶନ କରିଛନ୍ତି । ତିନି ଦଳର ୧୬୨ ବିଧାୟକ ହୋଟେଲ ଗ୍ରାଣ୍ଡ ହୟାତରେ ମେଳି କରିଛନ୍ତି । ଏପରିକି ବିଜେପି ବିରୋଧରେ ସେମାନେ ରହିବେ ବୋଲି ହାତ ଉଠାଇ ଶପଥ ପାଠ କରିଛନ୍ତି । ଏନ୍ସିସିର ନିଖୋଜ ଚାରି ବିଧାୟକ ପୁଣି ଶିବିରକୁ ଫେରିଥିବା କୁହାଯାଇଛି । ଫଳରେ ଅଜିତ ପାୱାରଙ୍କୁ ଛାଡ଼ିଦେଲେ ଦଳର ଅନ୍ୟ ସବୁ ବିଧାୟକ ବର୍ତ୍ତମାନ ଶରଦଙ୍କ ଶିବିରରେ ରହିଛି । ଏହାପରେ ଏନ୍ସିପି ମୁଖ୍ୟ କହିଛନ୍ତି ସରକାର ଗଠନ ନେଇ ଆମ ପାଖରେ ସଂଖ୍ୟା ରହିଛି ଏବଂ ଖୁବ୍ ଶୀଘ୍ର ରାଜ୍ୟପାଳଙ୍କୁ ଏନେଇ ଦାବି ଜଣାଇବୁ । ଏଥିସହିତ ଦଳୀୟ ହୁଇପ୍ ଅବମାନନାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଛନ୍ତି ।
ଆଜି ସୁପ୍ରିମକୋର୍ଟରେ ମହାରାଷ୍ଟ୍ର ମାମଲା ନେଇ ଦେଢ଼ ଘଣ୍ଟା ଧରି ଜବାବ ସୁଆଲ ହୋଇଥିଲା । ସମସ୍ତ ପକ୍ଷର ଯୁକ୍ତି ଶୁଣିବା ପରେ ଅଦାଲତ ରାୟ ସଂରକ୍ଷିତ ରଖିଛନ୍ତି । ମଙ୍ଗଳବାର ସାଢ଼େ ଦଶଟାରେ ରାୟ ପ୍ରକାଶ ପାଇବ । ତେବେ ଆଜିର ଆଉ ଗୋଟିଏ ଉଲ୍ଳେଖନୀୟ ଘଟଣା ହେଲା ଯେ, ମୁଖ୍ୟମନ୍ତ୍ରୀ ଫଡ଼ନାଭିସ ବିଧାନଭବନରେ ପହଞ୍ଚି ନିଜ ଦାୟିତ୍ୱ ନେଇଛନ୍ତି । ଆସନ୍ତା ୩୦ରେ ଫଡ଼ନାଭିସ ଗୃହରେ ବହୁମତ ସାବ୍ୟସ୍ତ କରିବା ଧାର୍ଯ୍ୟ ହୋଇଛି । ବିଜେପି ପାଖରେ ବର୍ତ୍ତମାନ ୧୦୫ ଦଳୀୟ ବିଧାୟକ, ଏନ୍ସିପିର ଜଣେ ଏବଂ ନିର୍ଦ୍ଦଳୀୟ ୧୩ ବିଧାୟକ ରହିଛନ୍ତି । ଏସବୁ ସତ୍ତେ୍ୱ ଦଳ କୁହୁକ ନମ୍ବର ଛୁଇଁବା କଷ୍ଟସାଧ୍ୟ ରହିଛି ।
