Anupambharat News Bureau
ବାଗଦାଦ, ୪ା୧: ୨୪ ଘଣ୍ଟା ମଧ୍ୟରେ ଆମେରିକା ଦ୍ୱିତୀୟ ଥର ପାଇଁ ଆକାଶ ମାର୍ଗରୁ ଇରାନ ସମର୍ଥକଙ୍କ ଉପରେ ଏୟାର ଷ୍ଟ୍ରାଇକ୍ କରିଛି । ଏଥିରେ ୬ ଜଣ ଲୋକଙ୍କ ମୃତୁ୍ୟ ଘଟିଛି । ୩ ଜଣ ଗୁରୁତର ଆହତ ହୋଇଛନ୍ତି । ମୃତକ ଓ ଆହତମାନେ ପପୁଲାର ମୋବିଲାଇଜେଶନ ଫୋର୍ସର ସଦସ୍ୟ । ଏମାନେ ମିଲିଶିଆ ବୋଲି କୁହାଯାଏ । ଇରାକର ରାଜଧାନୀ ବାଗଦାଦର ତାଜି ଅଞ୍ଚଳରେ ଏହି ଆକ୍ରମଣ ହୋଇଛି ।
ସୂଚନାଯୋଗ୍ୟ, ଶନିବାର ବିଳମ୍ବିତ ରାତି ପାଖାପାଖି ୧.୧୨ ମିନିଟରେ ମିଲିଶିଆ ସଦସ୍ୟ ମାନେ କାରରେ ଯାଉଥିଲେ । ଏହି ସମୟରେ ଆମେରିକା ତାଙ୍କୁ ଲକ୍ଷ୍ୟ କରି ଏୟାର ଷ୍ଟ୍ରାଇକ୍ କରିଥିଲା । ଫଳରେ ଗୋଟିଏ ଗାଡ଼ିରେ ଯାଉଥିବା ୫ ମିଲିଶିଆ ସଦସ୍ୟ ଜୀଅନ୍ତା ଜଳିଯିବାରୁ ତାଙ୍କର ମୃତୁ୍ୟ ଘଟିଛି । ମୋଟ୍ ୩ଟି ଗାଡ଼ି ଯାଉଥିଲା ବେଳେ ଏଥିରୁ ୨ଟି ସମ୍ପୂର୍ଣ୍ଣ ଜଳିଯାଇଛି । ମୃତକଙ୍କ ମଧ୍ୟରେ ପପୁଲାର ମୋବିଲାଇଜେଶନ ଫୋର୍ସର ଜଣେ ପ୍ରମୁଖ ନେତାଙ୍କର ମୃତୁ୍ୟ ଘଟିଛି । ହେଲେ ଏ ନେଇ ସ୍ପଷ୍ଟ ସୂଚନା ମିଳିପାରି ନାହିଁ ।
ଶୁକ୍ରବାର ବିଳମ୍ବିିତ ରାତିରେ ଆମେରିକା ଏୟାର ଷ୍ଟ୍ରାଇକ୍ ଯୋଗେ ଇରାନର ରିଭୋଲ୍ୟୁସନାରୀ ଗାର୍ଡର କମାଣ୍ଡର ମେଜର ଜେନେରାଲ କସିମ ସୁଲେମାନୀଙ୍କୁ ମାରିଥିଲା । ଇରାକର ବାଗଦାଦ ଅନ୍ତର୍ଜାତୀୟ ବିମାନ ବନ୍ଦରକୁ ସୁଲେମାନୀ ଓ ତାଙ୍କ ସମର୍ଥକମାନେ ଯାଉଥିବା ବେଳେ ଆମେରିକା ସେନା ଏୟାର ଷ୍ଟ୍ରାଇକ କରିଥିଲା । ଏହାପରେ ଇରାନ ଓ ଆମେରିକା ମଧ୍ୟରେ ବିବାଦ ବଢ଼ିଛି । ତେବେ ଆମେରିକା ଇରାନ ସହ ପ୍ରଥମେ ଯୁଦ୍ଧ କରିବା ପାଇଁ ଚାହୁଁନଥିବା କହିଥିଲେ ରାଷ୍ଟ୍ରପତି ଡୋନାଲï ଟ୍ରମ୍ପ । ଯଦି କୌଣସି ଇସଲାମିକ ଦେଶ ଯୁଦ୍ଧ କରିବା ପାଇଁ ଆସିବେ ତାହେଲେ ଆମେରିକା ମଧ୍ୟ ଏଥିପାଇଁ ପ୍ରସ୍ତୁତ ବୋଲି ସେ କହିଥିଲେ । ହେଲେ ନିଜ ମନ୍ତବ୍ୟର କିଛି ସମୟ ପରେ ଇରାକରେ ଇରାନର ମିଲିଶିଆ ସଦସ୍ୟଙ୍କ ଉପରେ ଆକ୍ରମଣ କରିବା ବିବାଦକୁ ଆହୁରି ବଢ଼ାଇଛି । ସୂଚନାଯୋଗ୍ୟ,
ନିକଟରେ ଇରାକର ବାଗଦାଦରେ ଥିବା ଆମେରିକାର ଦୂତାବାସ ଉପରକୁ ଇରାନ ମିଲିଶିଆ ସମର୍ଥନରେ ଆକ୍ରମଣ କରିଥିଲା । ତେଣୁ ଆମେରିକା ଏଭଳି ଆକ୍ରମଣ କରିଛି ବୋଲି ଜଣାପଡ଼ିଛି ।
ପ୍ରକାଶ ଥାଉକି, ଏକ ଭୟଙ୍କର ଯୁଦ୍ଧ ପାଇଁ ପ୍ରସ୍ତୁତି ଆରମ୍ଭ କରିଦେଇଛି ଇରାନ । ଏହାର ସଂକେତ ଏକ ମସଜିଦରୁ ମିଳିଛି । ଇରାନର କୋମଠାରେ ଥିବା ଐତିହାସିକ ଜାମକରନ୍ ମସଜିଦ ଉପରେ ଇତିହାସରେ ପ୍ରଥମ ଥର ପାଇଁ ଲାଲ୍ ପତାକା ଉଡ଼ାଯାଇଛି । ଏହା ଯୁଦ୍ଧର ସଂକେତ ବୋଲି କୁହାଯାଉଛି । ଏଣୁ ଏହା ସ୍ପଷ୍ଟ ହୋଇଯାଇଛି ଯେ ବିଶ୍ୱ ପୁଣି ଏକ ଯୁଦ୍ଧର ଘଟଘଟା ମଧ୍ୟରେ ଠେଲି ହୋଇଯାଉଛି । ଅନ୍ୟପକ୍ଷରେ ଇରାନର ରିଭୋଲ୍ୟୁସନାରୀ ଗାର୍ଡସ ଫୋର୍ସର କମାଣ୍ଡର ଗୋଲାମାଲି ଆବୁହାମଜେ କହିଛନ୍ତି ଯେ ଆମେରିକା ଓ ଇସ୍ରାଏଲର ପ୍ରାୟ ୩୫ଟି ଗୁରୁତ୍ୱପୂର୍ଣ୍ଣ ପ୍ରତିଷ୍ଠାନ ଇରାନର ଟାର୍ଗେଟରେ ଅଛନ୍ତି । ସେ ଆହୁରି ମଧ୍ୟ କହିଛନ୍ତି ଆମେରିକା ବିରୁଦ୍ଧରେ କାର୍ଯ୍ୟାନୁଷ୍ଠାନ ନେବାର ଅଧିକାର ଇରାନ ସେନାର ରହିଛି । ଅନ୍ୟପକ୍ଷରେ ଇରାନ ସମର୍ଥିତ ଆତଙ୍କବାଦୀ ସଂଗଠନ ହିଜବୋଲ୍ଲା ମଧ୍ୟ ଇସ୍ରାଏଲ ଓ ଆମେରିକୀୟ ପ୍ରତିଷ୍ଠାନ ଉପରେ ଆକ୍ରମଣ କରିବାକୁ ପ୍ରସ୍ତୁତ ହେଉଛି ।
ଶୁକ୍ରବାରଦିନ ଆମେରିକା ଦ୍ୱାରା କୁଦସ୍ ଫୋର୍ସ କମାଣ୍ଡର ମେଜର ଜେନେରାଲ କାସିମ ସୁଲେମାନୀଙ୍କ ହତ୍ୟା ପରେ ଇରାନର ସର୍ବୋଚ୍ଚ ନେତା ଆୟୋତୋଲ୍ଲା ଅଲ୍ଲି ଖାମନେଇ ବ୍ରିଗେଡିୟର ଜେନେରାଲ ଇସମାଇଲ କାନିଙ୍କୁ ସୁଲେମାନିଙ୍କ ଉତ୍ତରାଧିକାରୀ ନିଯୁକ୍ତ କରିଥିଲେ । ଇସମାଇଲ ମଧ୍ୟ ଆମେରିକା ଉପରେ ଆକ୍ରମଣ କରିବାକୁ ଧମକ ଦେଇଛନ୍ତି । ସେ କହିଛନ୍ତି ଯେ ଇରାନର ପ୍ରତିଆକ୍ରମଣ ବେଶ ଭୟାବହ ହେବ ।
