Anupambharat News Bureau
କଟକ,୧୯ା୫(ଅନୁପମମିଡ଼ିଆ): ମାଧ୍ୟମିକ ଶିକ୍ଷା ପରିଷଦ ପକ୍ଷରୁ ପରିଚାଳିତ ୨୦୧୯ ମାଟ୍ରିକ ପରୀକ୍ଷା ଫଳ ପ୍ରକାଶନରେ ବିଳମ୍ବ ଘଟିଥିଲେ ସୁଦ୍ଧା ନିର୍ଦ୍ଦିଷ୍ଟ ସମୟସୀମା ମଧ୍ୟରେ ପରୀକ୍ଷା ଫଳ ପ୍ରକାଶ ପାଇଁ ବୋର୍ଡ଼ କର୍ତ୍ତୃପକ୍ଷ ସୁଧାର ଆଣି ପାରି ନାହାନ୍ତି । ତେବେ ଗତ ୩ରେ ବାତ୍ୟା ‘ଫନି’ ରାଜ୍ୟରେ ପ୍ରଳୟ ଆଣିବା ପରେ ଚଳିତ ମାସ ପ୍ରଥମ ସପ୍ତାହରେ ପ୍ରକାଶ ପାଇବାକୁ ଥିବା ମାଟ୍ରିକ ଫଳକୁ ସ୍ଥଗିତ ରଖାଯାଇଥିଲା । ଏହାପରେ ଖୋଦ ବିଭାଗୀୟ ସଚିବ, ମାଧ୍ୟମିକ ପରିଷଦର ସଭାପତି ଓ ସମ୍ପାଦକ ସହମତି କ୍ରମେ ତୃତୀୟ ସପ୍ତାହରେ ଫଳ ପ୍ରକାଶ କରାଯିବ ବୋଲି ବୋର୍ଡ଼ ପକ୍ଷରୁ ଘୋଷଣା କରାଯାଇଥିଲା । ତେବେ ବାତ୍ୟା ପରେ ଅଧିକାଂଶ କର୍ମଚାରୀ ରିଲିଫ କାର୍ଯ୍ୟରେ ନିୟୋଜିତ ରହିଥିବାରୁ ତୃତୀୟ ସପ୍ତହାରେ ମଧ୍ୟ ଫଳ ଘୋଷଣା ଲଟକିଛି । ଆସନ୍ତାକାଲି ମାଟ୍ରିକ ପରୀକ୍ଷା ଫଳ ପ୍ରକାଶନ ନେଇ ଚର୍ଚ୍ଚା ହେଉଥିବା ବେଳେ ଆମ ପ୍ରତିନିଧି ବୋର୍ଡ଼ ସଭାପତି ଜହନ ଆରା ବେଗମ୍ଙ୍କ ସହ ଏ ସଂକ୍ରାନ୍ତରେ ଯୋଗାଯୋଗ କରିଥିଲେ । ବେଗମ୍ କହିଥିଲେ ଯେ, ଫଳ ପ୍ରକାଶ ସଂକ୍ରାନ୍ତରେ ଆଜି ସଚିବାଳୟରେ ଗଣଶିକ୍ଷା ସଚିବ ଏବଂ ଉପସଚିବଙ୍କ ସହ ବିଚାରବିମର୍ଷ ହୋଇଥିଲା । ଆସନ୍ତାକାଲି ଅପରାହ୍ନ ୪ଟାରେ ବୋର୍ଡ଼ ପକ୍ଷରୁ ଏକ ସାମ୍ବାଦିକ ସମ୍ମିଳନୀ ଆୟୋଜିତ କରି ମାଟ୍ରିକ ପରୀକ୍ଷା ଫଳ ତାରିଖ ସମ୍ପର୍କରେ ସ୍ପଷ୍ଟ କରାଯିବ ବୋଲି ବେଗମ୍ କହିଛନ୍ତି ।
