Anupambharat News Bureau
ନୂଆଦିଲ୍ଲୀ: କୃଷି ଆଇନ ରଦ୍ଦ କରିବା ଦାବି କରି ଜିଦରେ ଚାଷୀ ନେତା । ଅନ୍ୟପଟେ ଆଇନ ରଦ୍ଦ ହେବନି ବୋଲି କେନ୍ଦ୍ର ସରକାର କହିଛନ୍ତି । ଆଗକୁ ଜାନୁଆରୀ ୨୬, ଏହି ଅବସରରେ ଟ୍ରାକଫର ରାଲି କରିବେ ବୋଲି ଚାଷୀ ନେତା ସରକାରଙ୍କୁ ଚେତାବନୀ ଦେଇ ସାରିଛନ୍ତି । ଏହାପୂର୍ବରୁ ପରେଡ ରିହରଶାଲ ହେବା ଭଳି ଟ୍ରାକଫର ରାଲିର ରିହରଶାଲ୍ ଦେଖାଇ ସାରିଛନ୍ତି ଚାଷୀ ନେତା ।
ଭାରତୀୟ କୃଷକ ୟୁନିଅନର ଜାତୀୟ ମୁଖପାତ୍ର ରାକେଶ ଟିକାଇତ କହିଛନ୍ତି, ଗଣତନ୍ତ୍ର ଦିବସ ପରେଡରେ ଗୋଟିଏ ପଟେ ଟ୍ୟାଙ୍କର ଚାଲିବ ଅନ୍ୟପଟେ ତାଙ୍କର ଟ୍ରାକଫର ରାଲି ଚାଲିବ । ଆମ ମାନଙ୍କ ଉପରେ ପୁଲିସ ଲାଠି ମାଡ଼ କଲେ ଆମେ ଜାତୀୟ ସଂଗୀତ ଗାଇବୁ । ତିନି କୃଷି ଆଇନ ରଦ୍ଦ ନହେବା ଯାଏ ଘରକୁ ଫେରିବୁ ନାହିଁ । ସୂଚନାଯୋଗ୍ୟ, ଆଜି (ସୋମବାର) ସୁପ୍ରିମକୋର୍ଟ ନୂଆ କୃଷି ଆଇନ ତଥା ଦିଲ୍ଲୀ ସୀମାରେ ଚାଲୁଥିବା ଚାଷୀଙ୍କ ପ୍ରଦର୍ଶନକୁ ନେଇ ଚ୍ୟାଲେଞ୍ଜ ହୋଇଥିବା ଆବେଦନର ଶୁଣାଣି କରିବେ । ଜାନୁଆରୀ ୭ରେ କେନ୍ଦ୍ର ଏବଂ କୃଷକ ସଂଗଠନ ମଧ୍ୟରେ ଅଷ୍ଟମ ପର୍ଯ୍ୟାୟ ଆଲୋଚନା ବିଫଳ ହୋଇଥିଲା ।
କାରଣ କେନ୍ଦ୍ର ଏହି କୃଷି ଆଇନକୁ ରଦ୍ଦ କରିବାକୁ ମନା କରିଦେଇଥିଲା । ଏହାପରେ ପରବର୍ତ୍ତୀ ବୈଠକ ଜାନୁଆରୀ ୧୫ରେ ବସିବ ବୋଲି ଜଣାପଡ଼ିଛି । ଏହି ପ୍ରସଙ୍ଗରେ ସୁପ୍ରିମକୋର୍ଟ ଶୁଣାଣି କରିଥିଲେ । ଏହି ସମୟରେ ସରକାର କହିଥିଲେ ଚାଷୀ ସଂଗଠନ ମଧ୍ୟରେ ସରକାରଙ୍କ ଆଲୋଚନା ଠିକ୍ ଠାକ୍ ରହିଛି । ନିକଟ ଭବିଷ୍ୟତରେ ଉଭୟ ପକ୍ଷ ଏହାର ସମାଧାନ ବାହାର କରିବେ । ଏହା ପରେ କୋର୍ଟ ସରକାରଙ୍କୁ ଆଶ୍ୱାସନା ଦେଇଥିଲେ ଯେ ଯଦି ଆଲୋଚନା ମାଧ୍ୟମରେ ସମାଧାନ ହେବ ତାହେଲେ ଜାନୁଆରୀ ୧୧ରେ କୋର୍ଟ ଶୁଣାଣି କରିବେନି । ହେଲେ ଅଷ୍ଟମ ପର୍ଯ୍ୟାୟ ଆଲୋଚନା ବେଳେ ଚାଷୀ ନେତାଙ୍କୁ କୋର୍ଟ ଯିବାକୁ ସରକାର କହି ସାରିଛନ୍ତି । ତେଣୁ ଆଜି ସୁପ୍ରିମକୋର୍ଟ ଏ ପ୍ରସଙ୍ଗରେ ଚୂଡ଼ାନ୍ତ ରାୟ ପ୍ରକାଶ କରିପାରନ୍ତି । ଉଲ୍ଲେଖଥାଉକି, ସୁପ୍ରିମକୋର୍ଟ ସୋମବାର କୃଷକ ଆନ୍ଦୋଳନ ସହ ଜଡିତ ବିଭିନ୍ନ ଆବେଦନର ଶୁଣାଣି କରିଛନ୍ତି ।
ଶୁଣାଣି ବେଳେ ସରକାରଙ୍କ ଉପରେ ବର୍ଷିଛନ୍ତି କୋର୍ଟ । ଆନ୍ଦୋଳନ ବେଳେ କୃଷକଙ୍କ ଜୀବନ ଯାଉଛି । ସରକାର ଏବେ ଆଇନ ଉପରେ ରୋକ୍ ଲଗା;ୁ ନହେଲେ ଅଦାଲତ ନିର୍ଦ୍ଦେଶ ଜାରି କରିବେ ବୋଲି କହିଛନ୍ତି ସୁପ୍ରିମକୋର୍ଟ । କୋର୍ଟରେ ଶୁଣାଣି ବେଳେ ପ୍ରଧାନ ବିଚାରପତି ଜଷ୍ଟିସ ଏସଏ ବୋବଡେ କହିଛନ୍ତି ଯେ, କୋର୍ଟ ଆନ୍ଦୋଳନକୁ ବନ୍ଦ କରିବାକୁ ଚାହୁଁ ନାହାଁନ୍ତି । କୃଷକମାନେ ଏହାକୁ ଜାରି ରଖିପାରିବେ । ରିପୋର୍ଟ ନ ଆସିବା ଯାଏଁ ଆନ୍ଦୋଳନ ସ୍ଥାନ ପରିବର୍ତ୍ତନ କରି ହେବ କି ବୋଲି କୋର୍ଟ ପଚାରିଥିଲେ । ଯଦି କିଛି ଭୁଲ ହୁଏ ତେବେ ସମସ୍ତେ ଦାୟୀ ରହିବେ । କୃଷକମାନେ ଏହାକୁ ବିରୋଧ କଲେ କମିଟି ଏହାର ସମାଧାନ ଦିଗରେ ଆଗକୁ ଆସିବା ଦରକାର । କୋର୍ଟ ଆହୁରି କହିଥିଲେ ଯେ, ସରକାର ଯେଉଁ ଦଲିଲରେ ଏହାକୁ ଆଉ କିଏ ଆରମ୍ଭ କରିଥିବା କହୁଛନ୍ତି ତାହା ଚଳିବ ନାହିଁ । ୪୧ଟି କୃଷକ ସଙ୍ଗଠନ ଆଇନକୁ ପ୍ରତ୍ୟାହାର ପାଇଁ ଦାବି କରୁଛନ୍ତି । ନହେଲେ ସେମାନେ ଆନ୍ଦୋଳନ ଜାରି ରଖିବେ ବୋଲି କହୁଛନ୍ତି । କୋର୍ଟରେ ଏପରି ଗୋଟିଏ ବି ଦଲିଲ ନାହିଁ ଯେଉଁଥିରେ ଆଇନକୁ ପ୍ରଶଂସା କରାଯାଇଛି । ଯଦି ସରକାର ଏହାକୁ ନରୋକିବେ ତେବେ କୋର୍ଟ ପଦକ୍ଷେପ ଗ୍ରହଣ କରିବେ ।
ଅଦାଲତ ଆହୁରି କହିଥିଲେ ଯେ, ଲୋକମାନେ ମରୁଛନ୍ତି ଓ ଥଣ୍ଡାରେ ବସୁଛନ୍ତି । ମହିଳା ଓ ବୟସ୍କମାନେ ମଧ୍ୟ ଧାରଣା ଦେଉଛନ୍ତି । କୋର୍ଟ ବିଶେଷଜ୍ଞ କମିଟି ଗଠନ କରିବାକୁ ଚାହୁଁଛନ୍ତି । ସେବେସୁଦ୍ଧା ସରକାର ଏହି ଆଇନ ଉପରେ ରୋକ୍ ଲଗା;ୁ ନଚେତ କୋର୍ଟ ପଦକ୍ଷେପ ଗ୍ରହଣ କରିବେ । ସରକାର ଯେପରି ଭାବେ ଆନ୍ଦୋଳନକୁ ଗ୍ରହଣ କରିଛନ୍ତି ତାହା ଠିକ୍ ନୁହେଁ । ସରକାରଙ୍କ ଆଭିମୁଖ୍ୟ ଓ ପଦକ୍ଷେପ ଉପରେ କୋର୍ଟ ଅସନ୍ତୋଷ ଜାହିର କରିଛନ୍ତି । ସେହିପରି ସରକାର ସମସ୍ୟାର ଅଂଶବିଶେଷ ନା ସମାଧାନର ବୋଲି ଜଣା ପଡୁନାହିଁ ବୋଲି କହି କୋର୍ଟ ଅସନ୍ତୋଷ ବ୍ୟକ୍ତ କରିଛନ୍ତି ।
ହରିୟାଣାର କରନାଲରେ ମୁଖ୍ୟମନ୍ତ୍ରୀ ମନୋହରଲାଲ ଖଟ୍ଟରଙ୍କ ସଭା ସମୟରେ ହୋଇଥିବା ହିଂସାରେ ପୋଲିସ୍ କାର୍ଯ୍ୟାନୁଷ୍ଠାନ ନେଇଛି । ମାମଲାରେ ଜଡ଼ିତ ଥିବା ୭୧ଜଣଙ୍କ ବିରୋଧରେ ପୋଲିସ୍ ମାମଲା ରୁଜୁ କରିଛି । ଏହି ମାମଲାରେ ସାର୍ବଜନୀକ ସମ୍ପତ୍ତିକୁ କ୍ଷତି ପହଞ୍ଚାଇବା ଅଭିଯୋଗରେ ମାମଲା ହୋଇଛି । କୃଷକଙ୍କ ଆନ୍ଦୋଳନ କାରଣରୁ ମୁଖ୍ୟମନ୍ତ୍ରୀ ଖଟ୍ଟରଙ୍କୁ ତାଙ୍କ କାର୍ଯ୍ୟକ୍ରମ ବାତିଲ୍ କରିବାକୁ ପଡ଼ିଥିଲା ।
