Anupambharat News Bureau
ବ୍ରହ୍ମପୁର,୨୧ା୩(ଅନୁପମ ମିଡ଼ିଆ): ପ୍ରସିଦ୍ଧ ବ୍ରହ୍ମପୁର ମା’ ଠାକୁରାଣୀଙ୍କ ଯାତ୍ରା ୭ଦିନ ପାଇଁ କରାଯିବାକୁ ଜିଲ୍ଲା ପ୍ରଶାସନ ତରଫରୁ ଅନୁମତି ମିଳିଛି । ଫଳରେ ସୋମବାର ବିଳମ୍ବିତ ରାତିରେ ମା’ଙ୍କ ଯାତ୍ରା ପାଇଁ ଦେଶୀ ବେହେରା ସାହିଠାରେ ଶୁଭଖୁଣ୍ଟି ସ୍ଥାପନ କରାଯିବାକୁ ସ୍ଥିର ହୋଇଛି । ଏହି ଯାତ୍ରା ପାଇଁ ୧୯ ତାରିଖରେ ଶୁଭଖୁଣ୍ଟି ସ୍ଥାପନ କରାଯିବାର କାର୍ଯ୍ୟକ୍ରମ ରହିଥିଲା । ତେବେ ସମୟ ନିର୍ଣ୍ଣୟକୁ ନେଇ ସଠିକ୍ ନିଷ୍ପତ୍ତି ନହେବା ଫଳରେ ଶୁଭଖୁଣ୍ଟି ସ୍ଥାପନ କାର୍ଯ୍ୟକ୍ରମ ସ୍ଥଗିତ ରହିବା ସହ ଯାତ୍ରା ହେବ ନାହିଁ ବୋଲି କୁହାଯାଇଥିଲା । ତେବେ ରବିବାର ମହାନଗର ନିଗମ ପରିସରରେ ବ୍ରହ୍ମପୁର ବିଧାୟକ ବିକ୍ରମ କୁମାର ପଣ୍ଡାଙ୍କ ଉପସ୍ଥିତିରେ ପୁଣି ଏକ ବୈଠକ ଆୟୋଜନ କରାଯାଇ ଯାତ୍ରା କରାଯିବାକୁ ନିଷ୍ପତ୍ତି ନିଆଯାଇଛି । କରୋନା କଟକଣା ମଧ୍ୟରେ ପ୍ରଥମେ ୭ଦିନ ପାଇଁ ଯାତ୍ରା ଆୟୋଜିତ ହେବ ପରେ ପରିସ୍ଥିତିକୁ ଦୃଷ୍ଟିରେ ରଖି ୧୪ଦିନ ପାଇଁ ଯାତ୍ରା ହେବ ବୋଲି ସୂଚନା ମିଳିଛି । ଏହି ବୈଠକରେ ଯାତ୍ରା ପରିଚାଳକ ପି. ଦୁର୍ଗା ପ୍ରସାଦ ଦେଶୀ ବେହେରା, ନିଗମ କମିଶନର ଡ. ସିଦ୍ଧେଶ୍ୱର ବଳିରାମ ବନ୍ଦାର ଓ ବ୍ରହ୍ମପୁର ଉପଜିଲ୍ଲାପାଳ ଭି. କିର୍ତ୍ତୀ ଭାସନଙ୍କ ସମେତ ବହୁ କର୍ମକର୍ତ୍ତା ଉପସ୍ଥିତ ଥିଲେ ।
