Anupambharat News Bureau
ରାୟଗଡ଼ା/ଅମ୍ବାଦଳା,୧ା୯(ଅନୁପମ ମିଡିଆ): ବହୁ ମାସର ନୀରବତା ପରେ ରାୟଗଡ଼ା ଜିଲ୍ଲା ଅମ୍ବାଦଳା ଥାନା ସ୍ଥିତ ଡ଼ିମିରିଗୁଡା ପଞ୍ଚାୟତରେ ପୋଲିସ ଇନଫର୍ମର ସନ୍ଦେହରେ ଟିକରପଡାର ଗ୍ରାମରକ୍ଷୀ ସନ୍ତୋଷ ଦଣ୍ଡସେନାକୁ ମାଓବାଦୀମାନେ ଅତି ନିର୍ମମ ଭାବେ ହତ୍ୟା କରିଛନ୍ତି । ମିଳିଥିବା ସୂଚନା ପ୍ରକାରେ ଗତକାଲି ରାତିରେ ୧୦ରୁ ଅଧିକ ମାଓବାଦୀ ଆସି ସନ୍ତୋଷକୁ ଘରୁ ଡ଼ାକିନେଇ ଗାଁଠୁ ୫୦ ମିଟର ଦୂରରେ ଗୁଳିକରି ହତ୍ୟା କରିଥିଲେ । ପୋଲିସକୁ ନକ୍ସଲଙ୍କ ସମ୍ପର୍କରେ ସୂଚନା ଦେବା ଅଭିଯୋଗରେ ସନ୍ତୋଷକୁ ହତ୍ୟା କରିଛନ୍ତି ମାଓବାଦୀ । ହତ୍ୟାପରେ ମୃତଦେହ ନିକଟରେ ପୋଷ୍ଟର ମଧ୍ୟ ଛାଡି ଯାଇଛନ୍ତି । ବଶଧାରା-ଘୁମୁସର-ନାଗାବଳି ଡିଭିଜିନାଲ କମିଟି ତରଫରୁ ଏହି ପୋଷ୍ଟରରେ ଜାହିର କରିଛି । ପୂର୍ବରୁ ସନ୍ତୋଷକୁ ବହୁବାର ତାଗିତ କରାଯାଇଥିଲା । ତଥାପି ସନ୍ତୋଷ ଇନ୍ଫର୍ମର ସାଜିଥିଲେ ଓ ଅଞ୍ଚଳର କିଛି ଯୁବକଙ୍କୁ ଟଙ୍କା ଲୋଭ ଦେଖାଇ ଇନ୍ଫର୍ମର ତିଆରି କରିବାରେ ମୁଖ୍ୟ ଭୁମିକା ସାଜିଥିଲା ସନ୍ତୋଷ, ତେଣୁ ହତ୍ୟା କରାଯାଇଥିବା ପୋଷ୍ଟେରରେ ଉଲ୍ଲେଖ ରହିଛି । ଅନ୍ୟମାନେ ଯଦି କ୍ଷମା ନ ମାଗନ୍ତି ସେମାନଙ୍କୁ ମଧ୍ୟ ସନ୍ତୋଷ ଭଳି ମୃତୁ୍ୟ ଦଣ୍ଡ ଦିଆଯିବ ବୋଲି ପୋଷ୍ଟରରେ ଉଲ୍ଳେଖ ରହିଛି । ସନ୍ତୋଷଙ୍କ ହତ୍ୟା ପରେ ରଘୁବରୀ ଏବଂ ଡ଼ିମିରିଗୁଡା ପଞ୍ଚାୟତରେ ଭୟର ବାତାବରଣ ଦେଖା ଦେଇଛି । ଘଟଣା ସ୍ଥଳରେ ଅମ୍ବାଦଳା ପୋଲିସ ପହଞ୍ଚି ପୋଷ୍ଟର ଜବତ କରି ତଦନ୍ତ ଜାରି ରଖିଛି ।
