Anupambharat News Bureau
କେନ୍ଦୁଝର, ୧୪ା୬ (ଅନୁପମ ମିଡିଆ): କେନ୍ଦୁଝର ବନଖଣ୍ଡ ଭୂୟାଁଜୁଆଙ୍ଗ ପୀଢ ବନାଞ୍ଚଳର ବିଭିନ୍ନ ସ୍ଥାନରେ ୪୫ଟି ବଣୁଆ ହାତୀ ଥିବାବେଳେ ନିକଟସ୍ଥ ଖରାଦିନିଆ ଧାନ ଚାଷ ଜମି ଏବଂ ଗାଁଗୁଡିକରେ ବ୍ୟାପକ ଉପିାତ ମଚାଇଥିବା ଖବର ମିଳିଛି । ହାତୀପଲ ଏକର ଏକର ଧାନ ଫସଲ ଖାଇଯିବା ସହ ପାଚିବା ଅବସ୍ଥାରେ ଥିବା ଧାନକିଆରିକୁ ମାଡିମକଚି ନଷ୍ଟ କରିଥିବା ଜଣାପଡିଛି । ବିଶେଷ କରି ଖଣ୍ଡାଧାର,ଶଙ୍ଖାଳୀ,ସାରକୁଦର,ସାହାରପୁର ଏବଂ ଦଅଁଳା ଆଦି ଅଞ୍ଚଳର ଲୋକେ ହାତୀପଲଙ୍କୁ ନେଇ ଆତଙ୍କିତ ଅବସ୍ଥାରେ ଅଛନ୍ତି । ରାତି ହେଲେ ହାତୀପଲ ଗାଁ ମୁହାଁ ହେବା ସମ୍ଭାବନା ଥିବାରୁ ଲୋକେ ଚିନ୍ତାରେ ଅଛନ୍ତି । ଏହି ହାତୀପଲରେ ୫ଟି ଦଳରେ ମୋଟ ୪୫ଟି ହାତୀ ଥିବା ସୂଚନା ମିଳିଛି । ଖଣ୍ଡାଧାର ଅଞ୍ଚଳରେ ଖରାଦିନିଆ ଧାନ ଚାଷ ଖାଇବା ସହ ବ୍ୟାପକ କ୍ଷୟକ୍ଷତି ହୋଇଥିବା ଜଣାପଡିଛି । ଖଣ୍ଡାଧାର ଅଞ୍ଚଳରେ ଗୋଟିଏ ଦଳରେ ୧୮ଟି ହାତୀ,ଶଙ୍ଖାରୀରେ ୯ଟି,ସାରକୁଦରରେ ୪ଟି,ସାହାରପୁୁରରେ ୭ଟି ଏବଂ ଦଅଁଳାରେ ୬ଟି ହାତୀ ଅଛନ୍ତି । ଗୋଟିଏ ଦନ୍ତାହାତୀ ଏହି ରେଞ୍ଜର ବିଭିନ୍ନ ଅଞ୍ଚଳରେ ବ୍ୟାପକ କ୍ଷୟକ୍ଷତି କରୁୁଥିବା ଜଣାପଡିଛି । ଗତକାଲି ବିଳମ୍ବିତ ରାତିରେ ବିଜେପି ରେଞ୍ଜର ଶଂଖାରୀ ସାହିର ଭାଗିରଥି ଘଣାଙ୍କର ଘର ଭାଙ୍ଗି ଧାନ,ଚାଉଳ ଓ ମMା ଏହା ସହ ଧାନ ଭିତରେ ରଖିଥିବା କିଛି ଟଙ୍କାକୁ ମଧ୍ୟ ଖାଇଯାଇଛି ଦନ୍ତା । କିଛି ଦିନ ଧରି ଗୋଠଛଡା ହୋଇ ବୁଲୁଥିବା ଏକ ବିରାଟକାୟ ଦନ୍ତା ହଠାତ୍ ଗତକାଲି ରାତିରେ ଆସି ଶଂଖାରୀ ସାହୀର ଭାଗିରଥୀ ଘଣା ଙ୍କର ଘର ଦୁଆର ମୁହଁରେ ପହଁଚି ଥିଲା । ଦନ୍ତା ହାତୀଟି ଭାଗିରଥି ଘଣାଙ୍କ ଘରର କାନ୍ଥ ଭାଙ୍ଗି ଘର ଭିତରେ ଥିବା ଧାନ,ଚାଉଳ,ମMା ଆଦି ଖାଇଯିବା ସହ ଧାନ ଭିତରେ ଲୁଚାଇ ରଖିଥିବା କିଛି ଟଙ୍କା ମଧ୍ୟ ଖାଇଯାଇଛି । ହାତୀ ଆସିବା ଜାଣିପାରି ଭାଗିରଥି ତାର ସ୍ତ୍ରୀ,ପିଲା ଛୁଆଙ୍କୁ ଭାଡି ତଳେ ପୁରାଇ ଦେଇ କୌଶଳ କ୍ରମେ ବାହାରକୁ ବାହାରି ଯାଇ ଲୋକଙ୍କୁ ଡାକିଥିଲା । ହେଲେ ବର୍ଷା ହେଉଥିବାର ମାତ୍ର ୪ଜଣ ଲୋକ ହାତୀ ତଡିବାକୁ ବାହାରକୁ ବାହାରିଥିଲେ । ସେମାନେ ଏକ ସ୍କୁଲ ଘର ଉପରେ ଚଢି ହାତୀକୁ ଟେକା ପଥର ଫିଙ୍ଗିଥିଲେ ହେଁ ହାତୀ ତାକୁ ବି ନମାନି ପେଟ ପୁରା ଖାଇ ପ୍ରାୟ ଦେଢ ଘଣ୍ଟା ପରେ ସେ ସ୍ଥାନ ଛାଡି ଯାଇଥିଲା । ଏବେ ପାଖ ଜଙ୍ଗଲରେ ଦନ୍ତାଟି ଥିବାରୁ ଆଖପାଖ ଗାଁ ଲୋକେ ଭୟଭିତ ହୋଇ ପଡିଛନ୍ତି । ହାତୀପଲ ଦିନରେ ଜଙ୍ଗଲରେ ରହି ରାତିରେ ଗ୍ରାମରେ ପଶି ଉପଦ୍ରବ କରୁଥିବାରୁ ଲୋକମାନେ ଭୟରେ ଶୋଇ ପାରୁନାହାଁନ୍ତି । ଖରାଦିନିଆ ଧାନ ଚାଷ କରିଥିବା ଚାଷୀମାନେ ଚାଷ ହରାଇବା ଆଶଙ୍କାରେ ମୁଣ୍ଡରେ ହାତ ଦେଇ ବସିଛନ୍ତି । ବନବିଭାଗ ହାତୀପଲଙ୍କୁ ଅନ୍ୟତ୍ର ଘଉଡାଇବାକୁ ଅଞ୍ଚଳବାସୀ ଦାବୀ ଜଣାଇଛନ୍ତି ।
