Anupambharat News Bureau
ମଞ୍ଚେଷ୍ଟର,୧୫ା୬: ଆସନ୍ତାକାଲି ବିଶ୍ୱକପ୍ରେ ମୁହାଁମୁହିଁ ହେବେ ଦୁଇ ପାରମ୍ପରିକ ପ୍ରତିଦ୍ୱନ୍ଦୀ ଭାରତ ଓ ପାକିସ୍ତାନ । ମ୍ୟାଚ ଉତ୍କଣ୍ଠା ଏବଂ ରୋମାଞ୍ଚଭରା ରହିବ । ତେବେ ବିଶ୍ୱକପ୍ରେ ଭାରତର ପଲ୍ଳା ଭାରି ରହିଛି । ଯେହେତୁ ଏଯାବତ୍ ବିଶ୍ୱକପ୍ରେ ଉଭୟ ଦେଶ ଛ’ଥର ପରସ୍ପର ଭେଟିଥିବା ବେଳେ ସମସ୍ତ ମ୍ୟାଚରେ ଭାରତ ବିଜୟ ହୋଇଛି । ଆସନ୍ତାକାଲି ବିରାଟ ବାହିନୀ ସପ୍ତମ ମ୍ୟାଚ ବିଜୟ ଲକ୍ଷ୍ୟରେ ପଡ଼ିଆକୁ ଓହ୍ଳାଇବ । ଅନ୍ୟପକ୍ଷେ ଏହି ବିଜୟ ଅଭିଯାନରେ ବ୍ରେକ୍ ଲଗାଇବା ଲକ୍ଷ୍ୟ ରଖିଛି ପାକିସ୍ତାନ । ଏଯାବତ ଭାରତ ଖେଳିଥିବା ତିନୋଟି ମ୍ୟାଚ ମଧ୍ୟରୁ ଦୁଇଟିରେ ବିଜୟୀ ହୋଇଥିବା ବେଳେ ନୁ୍ୟଜିଲାଣ୍ଡ ବିପକ୍ଷ ମ୍ୟାଚ ବର୍ଷା ଯୋଗୁ ବାତିଲ ହୋଇଥିଲା । ଫଳରେ ପାଞ୍ଚ ପଏଣ୍ଟ ହାସଲ କରି ଭାରତ ପଏଣ୍ଟ ଟେବୁଲ୍ର ଚତୁର୍ଥ ସ୍ଥାନରେ ରହିଛି । ଅନ୍ୟପକ୍ଷେ ପାକିସ୍ତାନ ନିଜ ପ୍ରଥମ ମ୍ୟାଚରେ ଆୟୋଜକ ଇଂଲଣ୍ଡକୁ ପରାଜିତ କରିଥିବା ବେଳେ ଅଷ୍ଟେଏିଆ ବିପକ୍ଷ ମ୍ୟାଚରେ ପରାଜୟ ବରଣ କରିଥିଲା । ସେହିଭଳି ଶ୍ରୀଲଙ୍କା ବିପକ୍ଷ ମ୍ୟାଚ ବର୍ଷା ଯୋଗୁ ବାତିଲ ହୋଇଥିଲା । ପାକିସ୍ତାନ ତିନୋଟି ମ୍ୟାଚରୁ ତିନି ପଏଣ୍ଟ ହାସଲ କରିଛି । ଗତ ଦୁଇଟି ଯାକ ମ୍ୟାଚରେ ଭାରତୀୟ ଟିମ୍ ସବୁ କ୍ଷେତ୍ରରେ ଉଚ୍ଚକଟୀର ପ୍ରଦର୍ଶନ କରିଥିଲା । ତେବେ ଆଘାତ ଜନିତ କାରଣରୁ ଧାୱନ ବାଦ୍
ପଡ଼ିଥିବାରୁ ରୋହିତ ନୂଆ ଯୋଡ଼ି ସହ ବ୍ୟାଟିଂ ଓପନିଂ କରିବେ । ଶକ୍ତିଶାଳୀ ବ୍ୟାଟିଂ ଲାଇନ ଥିବା ଭାରତୀୟ ଦଳର ବୋଲର ବିଶ୍ୱକପ୍ରେ ଦମଦାର ପ୍ରଦର୍ଶନ କରିଛନ୍ତି । ଆସନ୍ତାକାଲିର ମ୍ୟାଚରେ ମଧ୍ୟ ସେମାନଙ୍କଠାରୁ ଭଲ ପ୍ରଦର୍ଶନ ଆଶା ରଖିଛନ୍ତି ଦର୍ଶକ । ଅନ୍ୟପକ୍ଷେ ନୂଆ ଓ ପୁରୁଣା ଖେଳାଳିଙ୍କୁ ନେଇ ଗଠିତ ପାକ୍ ଦଳ ମଧ୍ୟ ନୂଆ ରଣନୀତି ନେଇ ଆସନ୍ତାକାଲି ପଡ଼ିଆକୁ ଓହ୍ଳାଇବ । ଭାରତୀୟ ଦଳର ପ୍ରାରମ୍ଭିକ ବ୍ୟାଟିଂ କ୍ରମରେ ବିପର୍ଯ୍ୟୟ ଆଣିବା ଲକ୍ଷ୍ୟରେ ପାକ୍ ବୋଲର ରହିଛନ୍ତି । ତେବେ ଆସନ୍ତାକାଲିର ମ୍ୟାଚରେ ସ୍ପିନ୍ରଙ୍କ ଭୂମିକା ଗୁରୁତ୍ୱପୂର୍ଣ୍ଣ ରହିବ । ଉଭୟ ଦଳରେ ପ୍ରଭାବପୂର୍ଣ୍ଣ ସ୍ପିନର ରହିଥିବାରୁ ମ୍ୟାଚ ପୁରା ଦମ୍ଦାର ହେବ ବୋଲି କୁହାଯାଇଛି । ଉଭୟ ଦଳର ମ୍ୟାଚରେ ଜାତୀୟତାବାଦ ଏବଂ ଭାବପ୍ରବଣତା ରହିଥିବାରୁ ଖେଳାଳିମାନେ ପ୍ରତିଶ୍ରୁତିପୂର୍ଣ୍ଣ ପ୍ରଦର୍ଶନ କରିବାକୁ ପଛାଇ ନଥାନ୍ତି । ତେବେ ଯଦି ମ୍ୟାଚରେ ବର୍ଷା ବାଧକ ନହୁଏ ତାହେଲେ ଆସନ୍ତାକାଲି ଏକ ହାଇଭଲଟେଜ ମ୍ୟାଚ ଦେଖିବାକୁ ମିଳିବ ।
