Anupambharat News Bureau
ପୁରୀ ୧୮ା୬ (ଅନୁପମମିଡ଼ିଆ): ଦେବସ୍ନାନ ପୂର୍ଣ୍ଣିମାରେ ବିଗ୍ରହମାନେ ୧୦୮ ଗଡୁ ଜଳଲାଗି ହେବା ପରେ ଏବେ ଜ୍ୱରରେ ପୀଡିତ ହୋଇ ଅସୁସ୍ଥ ହୋଇପଡିଛନ୍ତି । ଅସୁସ୍ଥ ଥିବାରୁ ଅଣବସର ଘରେ ବିଶ୍ରାମ ନେଇଛନ୍ତି । ସେଠାରେ ଚାଲିଛି ମହାପ୍ରଭୁଙ୍କର ଗୁପ୍ତ ପୂଜାନୀତି । ଦାରୁ ବିଗ୍ରହମାନେ ଅସୁସ୍ଥ ଥିବାରୁ ଅଣସର ଘରେ ଆଜିଠାରୁ ପଟ୍ଟିଦିଅଁ ଠାକୁରମାନେ ପାରମ୍ପରିକ ନୀତିକାନ୍ତି ଅନୁଯାୟୀ ପୂଜା ପାଇଛନ୍ତି । ବଡଠାକୁର ବଳଭଦ୍ରଙ୍କ ପ୍ରତୀକ ରୂପେ ଅନନ୍ତ ବାସୁଦେବ, ଜଗନ୍ନାଥଙ୍କ ପ୍ରତୀକ ରୂପେ ଅନନ୍ତ ନାରାୟଣ ଓ ଦେବୀ ସୁଭଦ୍ରାଙ୍କ ପ୍ରତୀକ ରୂପେ ମା ଭୁବନେଶ୍ୱରୀ ପୂଜା ପାଇଛନ୍ତି । ବିଗ୍ରହମାନେ ଅସୁସ୍ଥ ଥିବାରୁ ୧୫ଦିନ ଧରି ଅଣବସର ଘରେ ଗୁପ୍ତ ନୀତିରେ ପୂଜା ପାଇବେ । ଦଇତାପତି ସେବକମାନେ ମହାପ୍ରଭୁଙ୍କର ଗୁପ୍ତ ନୀତି କରିବା ସହ ଚକଟା ଓ ପଣା ଭୋଗ ଲାଗି କରିଛନ୍ତି । ଅସୁସ୍ଥତା ଯୋଗୁଁ ବିଗ୍ରହମାନେ ଶୁକ୍ଳ ଫୁଲ ଏବଂ ସୂତାବସ୍ତ୍ର ପରିଧାନ କରଛନ୍ତି । ବିଗ୍ରହମାନଙ୍କୁ ଫୁଲୁରି ତେଲ, ଦଶମୂଳ ମୌଷଧୀ ଏବଂ ଖଳିଲାଗି କରାଯିବ । ଏହାପରେ ଶ୍ରୀଜିଉ ସଂପୂର୍ଣ୍ଣ ସୁସ୍ଥ ହୋଇ ଚକାବିଜେ କରିବେ । ପାରମ୍ପାରିକ ବିଧିବିଧାନ ଅନୁଯାୟୀ ପଟ୍ଟିଦିଅଁଙ୍କ ପାଖରେ ଆଜି ମଙ୍ଗଳ ଆଳତୀ, ଅବକାଶ, ଗୋପାଳ ବଲ୍ଲଭ, ସକାଳ ଧୂପ, ଭୋଗମଣ୍ଡପ, ରୋଷହୋମ, ସନ୍ଧ୍ୟା ଧୂପ, ବଡସିଂହାର ବେଶ, ବଡସିଂହାର ଭୋଗ ଆଦି ଅନୁଷ୍ଠିତ ହୋଇଛି । ମଧ୍ୟାହ୍ନ ଧୂପ ପରେ ପତି ମହାପାତ୍ର ଦକ୍ଷିଣ ଘର ଖୋଲିଥିଲେ । ଦଇତାପତି ସେବକମାନେ ବିଗ୍ରହମାନଙ୍କୁ ଚକଟା ଭୋଗ ଓ ପଣା ଭୋଗ ଲାଗି କରିଛନ୍ତି । ସୁସ୍ଥ ହେବା ପର୍ଯ୍ୟନ୍ତ ବିଗ୍ରହମାନଙ୍କୁ ଦିନକୁ ଦୁଇଥର ଚକଟା ଭୋଗ ଓ ପଣାଭୋଗ ଲାଗି ହେବ । ଆସନ୍ତା ଜୁଲାଇ ୧ ତାରିଖ ପର୍ଯ୍ୟନ୍ତ ବିଗ୍ରହମାନେ ଅଣବସର ଘରେ ଏହି ପଣାଭୋଗ ପାଇବେ । ପଣାଭୋଗ ସରିବା ପରେ ମହାପ୍ରଭୁଙ୍କର ସେବକ ପତି ମହାପାତ୍ର ଦ୍ୱାର ବନ୍ଦ କରିବେ । ପୁନର୍ବାର ସଞ୍ଜ ଧୂପ, ବଡସିଂହାର ବେଶ ପରେ ବିଗ୍ରହମାନଙ୍କୁ ଚକଟା ଓ ପଣାଭୋଗ ଲାଗି ହେବ । ଏହି ଅଣବସର ୧୫ଦିନ ଧରି ବ୍ରହ୍ମଗିରି ସ୍ଥିତ ଅଲାରନାଥ ମନ୍ଦିରରେ ମହାପ୍ରଭୁ ଭକ୍ତମାନଙ୍କୁ ଦର୍ଶନ ଦେବେ ।
