Anupambharat News Bureau
ପୁରୀ,୧୪ା୭(ଅନୁପମମିଡ଼ିଆ): ଆଷାଢ଼ ଶୁକ୍ଳ ପକ୍ଷ ତ୍ରୈୟଦଶୀ ନୀତି ତଥା ସୁନାବେଶ ପରଦିନ ତିନି ରଥରେ ବିଗ୍ରହମାନଙ୍କ ଅଧରପଣା ନୀତି ଅନୁଷ୍ଠିତ ହୋଇ ଯାଇଛି ।
ପରମ୍ପରା ଅନୁଯାୟୀ ନିଳାଦ୍ରୀ ବିଜେ ପୂର୍ବଦିନ ରଥାରୁଢ଼ ବିଗ୍ରହମାନଙ୍କ ଅଧରପଣା ନୀତି ଅନୁଷ୍ଠିତ ହୋଇଥାଏ । ମହାସୁଆର ସେବକମାନେ ଏହି ଅଧରପଣା ପ୍ରସ୍ତୁତ କରିଥାନ୍ତି । ତିନୋଟି ବଡ଼ ବଡ଼ ମାଟି ହାଣ୍ଡି ରଥ ଉପରେ ବିଗ୍ରହଙ୍କ ନାକ ପର୍ଯ୍ୟନ୍ତ ଉଚ୍ଚରେ ରଖାଯାଏ । ଶ୍ରୀମନ୍ଦିର ସମ୍ମୁଖରେ ଥିବା ଗରୁଡ଼ ସ୍ତମ୍ଭ ନିକଟରେ ଥିବା କୂଅର ପାଣିରେ ଏହି ଅଧରପଣା ପ୍ରସ୍ତୁତ ହୋଇଥାଏ । ଏଥିରେ କ୍ଷୀର, କଦଳି ଏବଂ ଲହୁଣି ସମେତ ବିଭିନ୍ନ ବ୍ୟଞ୍ଜନ ଦ୍ରବ୍ୟରେ ପ୍ରସ୍ତୁତ ହୋଇଥାଏ । ଏହାକୁ ମହାପ୍ରଭୁଙ୍କ ପୂଜାପଣ୍ଡା ସେବକମାନେ ସମର୍ପଣ କରିଥାନ୍ତି । ପରେ ରଥ ଉପରେ ଥିବା ଅଧରପଣା ହାଣ୍ଡିକୁ ଭାଙ୍ଗି ଦିଆଯାଇଥାଏ । ଏହି ଅଧରପଣା ରଥର ଚତୁପାଶ୍ୱର୍ରେ ବିଛୁରିତ ହୋଇ ପଡ଼ିଥାଏ । କିମ୍ବଦନ୍ତୀ ଅନୁଯାୟୀ ବିଗ୍ରହମାନେ ନିଳାଦ୍ରୀ ବିଜେ ପୂର୍ବରୁ ରଥ ପାଶ୍ୱର୍ ଦେବାଦେବୀଙ୍କ ସନ୍ତୁଷ୍ଟ କରିବା ପାଇଁ ଅଧରପଣା ଭୋଗ ହୋଇଥାଏ । ବିଗ୍ରହଙ୍କ ଏହି ଅଧରପଣା ପାଇ ବିଭିନ୍ନ ଚଣ୍ଡିଚାମୁଣ୍ଡି ଓ ପାଶ୍ୱର୍ଦେବତାମାନେ ମୁକ୍ତି ଲାଭ କରିଥାନ୍ତି । ଆଜି ଅଧରପଣା ଲାଗି ସ୍ୱତନ୍ତ୍ର ନୀତିକାନ୍ତି ଅନୁଷ୍ଠିତ ହୋଇଥିଲା । ୬ଟା ୪୫ରୁ ୭ଟା୫୫ ମଙ୍ଗଳଆଳତୀ, ୭ଟା ୧୫ରୁ ସରାଢ଼େ ୮ଟା ଅବକାଶ ନୀତି ହୋଇଥିଲା । ୭ଟା୪୫ରୁ ୮ଟା୫୦ ପର୍ଯ୍ୟନ୍ତ ବେଶ, ୯ଟାରୁ ୯ଟା୪୫ ବଲ୍ଳଭ, ୧୦.୦୫ରୁ ସାଢ଼େ ୧୧ଟା ସକାଳ ଧୂପ, ଯାତ୍ରାଙ୍ଗୀ ମହାସ୍ନାନ ସାଢ଼େ ୧୨ଟାରେ ଶେଷ ହୋଇଥିଲା । ସର୍ବାଙ୍ଗ ୧୨ଟା ୫୦ରେ ଶେଷ ହୋଇଥିବା ବେଳେ ମଧ୍ୟାହ୍ନ ଧୂପ ୨ଟା୧୦ରେ ଶେଷ ହୋଇଥିଲା । ସନ୍ଧ୍ୟା ସାଢ଼େ ୬ଟାରେ ଅଧରପଣା ନୀତି ଆରମ୍ଭ ହୋଇଥିଲା । ଆସନ୍ତାକାଲି ମହାପ୍ରଭୁଙ୍କ ପବିତ୍ର ନିଳାଦ୍ରୀବିଜେ ଅନୁଷ୍ଠିତ ହେବ । ରସଗୋଲା ଭୋଗ ଖାଇ ବିଗ୍ରହମାନେ ଶ୍ରୀମନ୍ଦିରକୁ ପହଣ୍ଡି ବିଜେ କରିବେ । ଏଥି ପାଇ ସ୍ୱତନ୍ତ୍ର ନୀତି ନିର୍ଘଣ୍ଟ ସ୍ଥିର ହୋଇଛି । ରଥାରୁଢ଼ ବିଗ୍ରହଙ୍କ ଦୈନନ୍ଦିନ ନୀତିକାନ୍ତି ପରେ ସନ୍ଧ୍ୟା ୪ଟାରୁ ବିଗ୍ରହଙ୍କ ପହଣ୍ଡି ବିଜେ ଆରମ୍ଭ କରାଯାଇ ରାତି ୧୦ଟାରେ ଶେଷ ହେବାକୁ ସ୍ଥିର କରାଯାଇଛି ।
