Anupambharat News Bureau
କେନ୍ଦୁଝର, ୧୦ା୧୦: କେନ୍ଦୁଝର ଏସ୍ପି ମିତ୍ରଭାନୁ ମହାପାତ୍ର ଗୁରୁବାର ବାରିଆ ଥାନା ପରିଦର୍ଶନରେ ଯାଇ ସେଠାରୁ ତୁରୁୁମୁଙ୍ଗା ଥାନା ପରିଦର୍ଶନ ପାଇଁ ଆସୁଥିବାବେଳେ ଚମ୍ପୁଆ ରାସ୍ତାରୁ ଝାରବେଡା ଛକ ନିକଟରେ ୪୯ନଂ ଜାତୀୟ ରାଜପଥକୁ ଏସ୍ପିଙ୍କ ସ୍କୋର୍ପିଓ ତୁରୁମୁଙ୍ଗା ଥାନା ମୁହାଁ ହେଉଥିବାବେଳେ ଦିନ ପ୍ରାୟ ୧୨ଟା ସମୟରେ ରାସ୍ତା ନିର୍ମାଣକାରୀ ମଣ୍ଟେକାର୍ଲୋ କମ୍ପାନୀର କଂକ୍ରିଟ ତିଆରୀ ମିକ୍ସର ମେସିନ ବୋଝେଇ ଗାଡି ଏସ୍ପିଙ୍କ ସ୍କୋର୍ପିଓ ସମ୍ମୁଖ ଭାଗ ଦୂର୍ଘଟଣାରେ ଭାଙ୍ଗି ରୁଜି ଯାଇଥିଲେ ମଧ୍ୟ ଏସ୍ପି ମିତ୍ରଭାନୁ ମହାପାତ୍ରଙ୍କ ସମେତ ସ୍କୋର୍ପିଓ ଚାଳକ ଓ ପିଏସ୍ଓ ଦ୍ୱୟ ଅଳ୍ପକେ ବର୍ତ୍ତି ଯାଇଛନ୍ତି । ଦୂର୍ଘଟଣା ଘଟିବା ପଛରେ ଏସ୍ପିଙ୍କ ଗାଡି ଚାଳକର ଦାୟିତ୍ୱହୀନତା ଏଠାରେ ଚର୍ଚ୍ଚା ହେଉଥିବାବେଳେ ଖବରପାଇ ତୁରୁମୁଙ୍ଗା ଥାନାଧିକାରୀ ବରେନ୍ଦ୍ର ଶିଆଳ ଘଟଣାସ୍ଥଳକୁ ଯାଇ ଏସ୍ପିଙ୍କ ଦୂର୍ଘଟଣାଗ୍ରସ୍ତ ଗାଡିକୁ ଥାନାକୁ ଆଣିବା ସହ ଦୂର୍ଘଟଣା ଘଟାଇଥିବା ମିକ୍ସର ଗାଡିକୁ ଜବତ କରିଛନ୍ତି । ତେବେ ଏସ୍ପି ଦୂର୍ଘଟଣା ପରେ ତୁରୁମୁଙ୍ଗା ଥାନାକୁ ଆସି ଥାନା ପରିଦର୍ଶନ କରିବା ପରେ ପୁନଃ ଥାନା ଗାଡିରେ ଚମ୍ପୁଆ ଗସ୍ତ କରିଥିବା ଜଣାପଡିଛି । ମିକ୍ସର ମେସିନ ଗାଡିଟି ବୈତରଣୀ ପୋଲ ପଟୁ ଖିରେଇଟାଙ୍ଗିରୀ କ୍ୟାମ୍ପକୁ ଫେରୁଥିବା ସମୟରେ ଚମ୍ପୁଆ ରାସ୍ତା ପଟୁ ତୁରମୁଙ୍ଗା ଜାତୀୟ ରାଜପଥ ୪୯କୁ ଆସୁଥିବା ଏସ୍ପିଙ୍କ ସ୍କୋର୍ପିଓଟି ଦୂର୍ଘଟଣାଗ୍ରସ୍ଥ ହୋଇଛି ।
