Anupambharat News Bureau
ବ୍ରହ୍ମପୁର,୨୬ ।୧୧(ଅନୁପମ ମିଡ଼ିଆ): ବ୍ରହ୍ମପୁର ସିଟି ବସ୍ଷ୍ଟାଣ୍ଡ୍ ପୁନରୁଦ୍ଧାରକୁ ନେଇ ଘରୋଇ ବସ୍ ମାଲିକ -ପ୍ରଶାସନ ମଧ୍ୟରେ ବିବାଦୀୟ ପରିସ୍ଥିତି ସୃଷ୍ଟି ହୋଇଛି । ଏହି ପ୍ରସଙ୍ଗକୁ ନେଇ ଉଭୟ ନିଜ ଜିଦ୍ରେ ଅଟଳ ରହିଛି । ଫଳରେ ଯାତ୍ରୀମାନେ ନାହିଁ ନଥିବା ହଟହଟାର ସମ୍ମୁଖିନ ହୋଇଛନ୍ତି ।
ମାଲିକ ମାନେ ନୂତନ ବସ୍ଷ୍ଟାଣ୍ଡ୍କୁ ନଯିବାକୁ ନିଜ ଜିଦ୍ରେ ଆଜି ବ୍ରହ୍ମପୁରରୁ କୌଣସି ଗାଡ଼ି ଚଳାଚଳ କଲେ ନାହିଁ । ଅନ୍ୟପକ୍ଷେ ଏହି ବିବାଦ ଯୋଗୁ ଯାତ୍ରୀମାନେ ଯେଭଳି ଅସୁବିଧାର ସମ୍ମୁଖିନ ନହୁନ୍ତି ସେନେଇ ପ୍ରଶାସନ ପକ୍ଷରୁ ବିଭିନ୍ନ ରୁଟ୍ରେ ୫୦ ଟି ସରକାରୀ ବସ୍ ଚଳାଚଳ କରିବାକୁ ନିଷ୍ପତ୍ତି ନେଇଛନ୍ତି । ପ୍ରଶାସନ ଓ ବିଡ଼ିଏ ପକ୍ଷରୁ ପୂର୍ବ ନିର୍ଦ୍ଧାରିତ ସୂଚନା ଅନୁଯାୟୀ ଆଜି ସକାଳୁ ବ୍ରହ୍ମପୁର ସିଟି ବସ୍ଷ୍ଟାଣ୍ଡ୍ରେ ପୁନରୁଦ୍ଧାର କାର୍ଯ୍ୟକ୍ରମ ଆରମ୍ଭ କରିଥିଲେ । ଅନ୍ୟପକ୍ଷେ ଗତକାଲି ପ୍ରଶାସନ
ସହ ଆଲୋଚନା ବିଫଳ ପରେ ଆଜି ସମସ୍ତ ଘରୋଇ ବସ୍ ଗୁଡ଼ିକର ଚଳାଚଳକୁ ମାଲିକମାନେ ବନ୍ଦ କରି ଦେଇଥିଲେ । ଏନେଇ ପୂର୍ବ ଘୋଷଣା ନକରି ଘରୋଇ ବସ୍ ଚଳାଚଳ ବନ୍ଦ ଯୋଗୁ ବ୍ରହ୍ମପୁରରୁ ଅନ୍ୟାନ୍ୟ ସ୍ଥାନକୁ ଯିବାକୁ ଅପେକ୍ଷାରତ ଯାତ୍ରୀ ନାହିଁ ନଥିବା ହଟହଟା ହୋଇଥିଲୋ । ଅନ୍ୟପକ୍ଷେ ପ୍ରଶାସନ ପକ୍ଷରୁ ଗଟସଲ୍ର ସିଟିବସ୍ ଗୁଡ଼ିକୁ କେତେକ ରୁଟ୍ରେ ଚଳାଚଳ କରାଯାଇଛି । ଏପରିିକି ଘରୋଇ ବସ୍ ଚଳାଚଳ ନ କଲେ ପ୍ରଶାସନ ପକ୍ଷରୁ ବ୍ରହ୍ମପୁର-ଭଞ୍ଜନଗର ରୁଟ୍ରେ ୪ ଟି, ଫୁଲବାଣୀ ରୁଟ୍ରେ ୪, ରାୟଗଡ଼ା ରୁଟ୍ରେ ୨ ଟି, ଗଜପତି ରୁଟ୍ରେ ୨ ଟି, କଟକ ରୁଟ୍ରେ ୪ ଟି ଅତିରିକ୍ତ ବସ୍ ଚଳାଚଳ ପାଇଁ ନିଷ୍ପତ୍ତି ଗ୍ରହଣ କରାଯାଇଥିବା ବେଳେ ଗଟସଲ୍ ପକ୍ଷରୁ ଚାଲୁଥିବା ସିଟି ବସ୍ ଗୁଡ଼ିକୁ ଆସନ୍ତାକାଲି ଠାରୁ ଗୋପାଳପୁର-ବ୍ରହ୍ମପୁର ବସ୍କୁ ଦିଗପହଣ୍ଡି ପର୍ଯ୍ୟନ୍ତ ୮ ଟି ବସ୍, ବ୍ରହ୍ମପୁର-ଛତ୍ରପୁର ୮ ଟି ବସ୍କୁ ଖଲିକୋଟ ପର୍ଯ୍ୟନ୍ତ, ବ୍ରହ୍ମପୁର-କନିଷି ରାସ୍ତାର ୫ ଟି ବସ୍କୁ ଚିକିଟି ଦେଇ ପାତ୍ରପୁର ପର୍ଯ୍ୟନ୍ତ ଓ ବ୍ରହ୍ମପୁର-ହିଞ୍ଜିଳିକାଟୁ ପର୍ଯ୍ୟନ୍ତ ଚାଲୁଥିବା ୫ ଟି ବସ୍କୁ ଆସିକା ପର୍ଯ୍ୟନ୍ତ ଚଳାଚଳ କରିବେ ବୋଲି ବିଡ଼ିଏ ଅଧ୍ୟକ୍ଷ ଚକ୍ରବର୍ତ୍ତି ସିଂ ରାଠୋର ସୂଚନା ଦେଇଛନ୍ତି । ଏପରିକି ଆସନ୍ତାକାଲି ଠାରୁ ଆଉ ଅଧିକ ୧୦ ଟି ବସ୍ ବ୍ରହ୍ମପୁର-ହଳଦିଆପଦର ମଧ୍ୟରେ ଚଳାଚଳ କରିବ ବୋଲି ସୂଚନା ମିଳିଥିବା ବେଳେ ଆବଶ୍ୟକ ସ୍ଥଳେ ଅଧିକ ବସ୍ ଭୁବନେଶ୍ୱରରୁ ଅଣାଯିବା ପାଇଁ ବ୍ୟବସ୍ଥା କରାଯାଉଥିବା ଜଣାପଡ଼ିଛି ।
